Apay a Mangaskasaba Dagiti Saksi ni Jehova iti Binalaybalay?

▪ Iti Biblia, kastoy ti imbilin ni Jesus kadagiti pasurotna: “Inkayo ngarud ket mangaramidkayo iti ad-adalan kadagiti tattao iti amin a nasion, . . . nga isuroyo [ida].” (Mateo 28:19, 20) Agaplikar kadi daytoy iti amin a Kristiano? Wen, kasta ti pannakaawat dagiti nagkauna nga adalan ni Jesus. Kas pagarigan, kuna ni apostol Pedro: “Imbilinna [ni Jesus] a mangasabakami kadagiti tattao ken mangipaay iti naan-anay a pangsaksi.” (Aramid 10:42) Ken insurat ni apostol Pablo: “Ti panagkasapulan naipabaklay kaniak. Pudno unay, asiak pay no diak indeklara ti naimbag a damag!”​—1 Corinto 9:16.

Saan laeng a da Pablo ken Pedro ti nagtulnog iti bilin ni Jesus no di ket amin a Kristiano idi umuna a siglo. Ti panangasaba ti kangrunaan a trabahoda. (Aramid 5:28-32, 41, 42) Dayta met ti ikagkagumaan nga aramiden dagiti Saksi ni Jehova. Ikaskasabada ti mensahe nga inkasaba ni Jesus, “ti pagarian ti langlangit.”​—Mateo 10:7.

Siasino ti pangikasabaanda iti mensahe ti Pagarian? Impakita ni Jesus a masapul a maikasaba dayta iti amin a tattao. Kinunana kadagiti adalanna: “Dakayto dagiti saksik . . . agingga iti kaadaywan a paset ti daga.” (Aramid 1:8) Impadtona pay a sakbay nga agpatingga ti sistema ti bambanag, “daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi.” (Mateo 24:14) Isu nga inkagumaan dagiti Kristiano idi umuna a siglo a kasabaan ti amin a tattao, saan laeng a dagiti am-ammoda wenno dagiti awanan relihion. (Colosas 1:23; 1 Timoteo 2:3, 4) Kasta met, ikagkagumaan dagiti Saksi ni Jehova a kasabaan ti amin a tattao.a

Ania ti kasayaatan a pamay-an a panangisaknap iti mensahe ti Pagarian? Ammo ni Jesus no sadino ti pakasarakan iti adu a tattao, isu nga imbaonna dagiti adalanna a mapan kadagiti siudad, purpurok, ken balbalay. (Mateo 10:7, 11, 12) Kalpasan ti ipapatay ken panagungar ni Jesus, intultuloy dagiti adalanna ti nangasaba “iti binalaybalay.” (Aramid 5:42) Kas ken Jesus, nangasabada met iti sadinoman a pakasarakan kadagiti tattao ken kadagiti publiko a lugar. (Juan 4:7-26; 18:20; Aramid 17:17) Kasta met laeng ti ar-aramiden dagiti Saksi ni Jehova ita tapno makasabaanda ti amin a tattao.

Kinuna ni Jesus a saan nga amin ket dumngeg. (Mateo 10:14; 24:37-39) Dayta kadi ti mangupay kadagiti Kristiano a mangasaba? Usigem daytoy: No maysaka kadagiti mapan ag-rescue kalpasan ti napigsa a ginggined, sumardengka kadin gapu laeng ta manmano ti nasarakam a nakalasat? Siempre saan, itultuloymo agingga nga adda pay namnama a mangisalakan iti uray maysa laeng a tao. Binilin ni Jesus dagiti adalanna nga agtultuloyda agingga nga adda pay masarakan a dumngeg iti naimbag a damag maipapan iti Pagarian ti Dios. (Mateo 10:23; 1 Timoteo 4:16) Babaen ti panangbirok kadakuada iti binalaybalay, ipakpakita dagiti Saksi ni Jehova ti panagayatda iti Dios ken iti kaarrubada, ta ti biagda ket agpannuray iti panangipangagda iti mensahe ti Pagarian.​—Mateo 22:37-39; 2 Tesalonica 1:8.

Dayta a mensahe ti Biblia ti ilawlawag daytoy magasin a basbasaem. Para iti kanayonan nga impormasion, makisaritaka kadagiti Saksi ni Jehova inton sumaruno a sumarungkarda, wenno agsuratka iti nangipablaak iti daytoy a magasin.

[Footnote]