Agsursuroka iti Sao ti Dios
Mangipasdek Ngata ti Dios iti Sangalubongan a Gobierno?
Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.
1. Apay a kasapulan ti sangalubongan a gobierno?
Masansan nga adu ti problema dagiti tattao iti intero a lubong. Iti dadduma a nasion, marigrigat ken mairurrurumen ti kaaduan a tattao. Iti dadduma a pagilian, agparang nga aglaplapusanan ti adda kadakuada ngem iti kasapulanda. Ti laeng sangalubongan a gobierno ti makaiwaras iti gameng ti daga iti amin a tao.—Basaem ti Eclesiastes 4:1; 8:9.
2. Asino ti mapagtalkan a mangituray iti sangalubongan a gobierno?
Saan a kayat ti kaaduan nga adda maymaysa nga agturay iti intero a lubong gapu ta awan ti kualipikado a mangakem iti dayta. Dina mapatgan ti kayat ti amin a tao. Kasta met, masansan nga agannayas dagiti tattao nga agaramid iti dakes no adda autoridadda. Isu a nakaam-amak a panunoten no adda maymaysa a nauyong nga agturay iti intero a lubong.—Basaem ti Proverbio 29:2; Jeremias 10:23.
Pinili ni Jehova a Dios ti Anakna a ni Jesus a mangituray iti sangatauan iti agnanayon. (Lucas 1:32, 33) Nagbiag a mismo ni Jesus ditoy daga. Nangpaimbag kadagiti masakit, nangisuro kadagiti naemma, ken adda tiempona para kadagiti ubbing. (Marcos 1:40-42; 6:34; 10:13-16) Maikari ngarud ni Jesus nga Agturay.—Basaem ti Juan 1:14.
3. Posible kadi ti sangalubongan a gobierno?
Ti Dios dinutokanna ti Anakna a mangituray iti daga manipud langit. (Daniel 7:13, 14) Kas iti agturay a tao a saan a masapul nga adda a kanayon iti amin a siudad nga iturayanna, saan met a masapul nga adda ni Jesus ditoy daga tapno maiturayanna ti sangatauan.—Basaem ti Mateo 8:5-9, 13.
Bigbigen ngata ti amin a tao ni Jesus kas Agturay? Saan. Dagidiay laeng tattao a mangayat iti kinaimbag ti mangawat kenkuana. Ni Jehova pukawennanto ditoy daga dagidiay mangilaksid iti naayat ken nalinteg nga Agturay a dinutokanna.—Basaem ti Mateo 25:31-33, 46.
4. Anianto ti aramiden ti Agturay iti intero a lubong?
Kas iti panangummong ti pastor kadagiti karnerona, um-ummongen itan ni Jesus dagiti naemma a tattao manipud iti amin a nasion ken sursuruanna ida kadagiti naayat a pagalagadan ti Dios. (Juan 10:16; 13:34) Magagaran dagita a tattao a mangsuporta iti panangituray ni Jesus. (Salmo 72:8; Mateo 4:19, 20) Iti intero a lubong, dagiti matalek nga iturayan ni Jesus, sangsangkamaysada a mangipakpakaammo a ni Jesus nagbalinen nga Ari.—Basaem ti Mateo 24:14.
Dandanin usaren ni Jesus ti pannakabalinna a mangikkat kadagiti dakes a gobierno ti tao. Pinilina ti dadduma kadagiti matalek a pasurotna a mangituray iti intero a daga a kaduana nga ar-ari ken papadi idiay langit. (Daniel 2:44; 7:27) Ti Pagarian ni Jesus punuennanto ti daga iti pannakaammo ken Jehova ken isublinanto ti paraiso a napukaw iti rugi ti pakasaritaan ti tao.—Basaem ti Isaias 11:3, 9; Mateo 19:28.