SUNGBAT DAGITI SALUDSOD MAIPAPAN ITI BIBLIA

Mapakawan kadi dagiti basoltayo?

Sigun iti Biblia, managbasol ti amin a tao. Natawidtayo ti basol manipud iti immuna a tao a ni Adan. Isu a no dadduma makaaramidtayo kadagiti banag a pagbabawyantayo inton agangay. Natay ti Anak ti Dios a ni Jesu-Kristo gapu kadagiti basoltayo ken babaen iti datonna, mapakawan dagiti basoltayo. Sagut dayta manipud iti Dios.​—Basaem ti Roma 3:23, 24.

Nakaaramid ti dadduma iti nadagsen a basol ken pampanunotenda no mapakawan pay ida ti Dios? Makaparagsak ta kuna ti Sao ti Dios: “Ti dara ni Jesus nga Anakna dalusannatayo manipud iti amin a basol.” (1 Juan 1:7) Sibubulos a pakawanen ni Jehova uray ti nadagsen a basol no agbabawitayo ken addaantay iti umiso a kababalin.​—Basaem ti Isaias 1:18.

Ania ti aramidentayo tapno mapakawantayo?

No kayattayo a pakawanennatayo ni Jehova, masapul nga adalentayo ti maipapan kenkuana​—ammuentayo dagiti daldalanna, balakadna, ken kalikagumanna. (Juan 17:3) Sibubulos a pakawanen ni Jehova dagidiay agbalbaliw ken isardengda dagiti dakes nga aramidda.​—Basaem ti Aramid 3:19.

Saan a narigat a gun-oden ti anamong ti Dios. Matarusan ni Jehova dagiti pagkapuyantayo. Isu ket naasi ken naanus. Saan kadi a ti kinamanangngaasi ti Dios ti mangtignay kenka a mangammo iti ad-adu pay maipapan kenkuana ken no kasano a maparagsakmo?​—Basaem ti Salmo 103:13, 14.