Sibubuslon a Bendisionan ni Jehova ti Situtulok a Panagserbi

PADPADAYAWANNATAYO ti Namarsua ta impaayannatayo iti di magatadan a sagut a wayawaya a mangngeddeng. Kasta met, sibubuslon a bembendisionanna dagidiay naimpusuan a mangus-usar iti wayawayada a mangngeddeng agpaay iti pudno a panagdayaw ken dagidiay mangikagkagumaan a mangsantipikar iti nasantuan a naganna ken mangsupsuporta iti nadayag a panggepna. Saan a kayat ni Jehova ti mapilpilit a panagtulnog. Imbes ketdi, napateg kenkuana ti situtulok a panagserbi a nabuyogan iti pudpudno nga ayat ken nauneg nga apresasion.

Kas pagarigan, idi adda dagiti Israelita iti let-ang ti Sinai, imbilin ni Jehova a mangaramidda iti maysa a lugar a pagdayawan kenkuana. Kinunana: ‘Mangalakayo iti kontribusion agpaay ken Jehova. Tunggal maysa a situtulok ti pusona iyegna koma dayta kas kontribusion ken Jehova.’ (Ex. 35:5) Mabalin nga ited ti tunggal Israelita ti aniaman a kabaelanna, ket ti tunggal boluntario a kontribusion—aniaman dayta wenno kasano man ti kaaduna—mabalin a mausar iti mayanatup a pamay-an tapno maibanag ti panggep ti Dios. Ania ti inaramid dagiti Israelita?

“Tunggal maysa a tinignay ti pusona” ken “tunggal maysa a ginutugot ti espirituna” nangipaayda iti boluntario a daton buyogen ti ‘situtulok a puso.’ Situtulok nga impaay dagiti lallaki ken babbai ti banag nga adda kadakuada para iti trabaho ni Jehova: maisab-it nga arkos, aritos, singsing, balitok, pirak, gambang, asul a sinulid, delana a purpura, eskarlata a material, napino a lienso, dutdot ti kalding, lallalat ti kalakian a karnero a natinaan iti nalabaga, lallalat ti foka, kayo ti akasia, napapateg a batbato, balsamo, ken lana. Idi agangay, ti impaayda ket ‘immanay a maipaay iti isuamin a trabaho nga aramiden, ket aglaplapusanan.’—Ex. 35:21-24, 27-29; 36:7.

Saan a dagiti material a daton ti ad-adda a nagragsakan ni Jehova no di ket ti kinatulok dagidiay nangsuporta iti nasin-aw a panagdayaw. Natignay pay dagiti Israelita a mangipaay iti panawen ken pigsada. “Amin dagiti babbai a masirib ti pusoda nagtibbida babaen ti im-imada,” kuna ti salaysay. Wen, “amin dagiti babbai a tinignay ti puspusoda buyogen ti kinasirib tinibbida ti dutdot ti kalding.” Kasta met, impaayan ni Jehova ni Bezalel iti ‘kinasirib, pannakaawat ken pannakaammo ken tunggal kita ti kinasigo iti panagtrabaho.’ Kinapudnona, impaay ti Dios ti abilidad a kasapulan da Bezalel ken Oholiab tapno maaramidda ti amin a trabaho a naited kadakuada.—Ex. 35:25, 26, 30-35.

Idi inawis ni Jehova dagiti Israelita a mangipaay iti donasion, naan-anay a nagtalek a “tunggal maysa a situtulok ti pusona” ket sumuporta iti pudno a panagdayaw. Sibubuslon a binendisionanna dagidiay situtulok ti pusona babaen ti panangiwanwan ken panangipaayna kadakuada iti aglaplapusanan a rag-o. Impakita ngarud ni Jehova a no bendisionanna ti kinatulok dagiti adipenna, siguraduenna a maipaay kadakuada ti aniaman a kasapulanda tapno maitungpalda ti pagayatanna. (Sal. 34:9) Sigurado a bendisionannaka ni Jehova bayat a situtulok ken naimpusuan nga agserserbika kenkuana.

DAGITI PAMAY-AN TI DADDUMA A MANGTED ITI KONTRIBUSION PARA ITI SANGALUBONGAN A TRABAHO

Kas idi kaaldawan ni apostol Pablo, adu ita ti “mangilasin” wenno mangibadyet iti kuarta nga itinnagda kadagiti kahon ti kontribusion a namarkaan iti “Worldwide Work.” (1 Cor. 16:2) Dagiti kongregasion binulan nga ipatulodda dagitoy a kontribusion iti sanga nga opisina dagiti Saksi ni Jehova iti pagilianda. Mabalin met a direkta nga ipatulodmo ti donasionmo iti maysa a korporasion nga us-usaren dagiti Saksi ni Jehova iti pagilianyo. Tapno maammuam no siasino ti pangipatulodam, pangngaasim ta kontakem ti sanga nga opisina iti pagilianyo. Masarakan ti adres iti www.jw.org. Adtoy ti sumagmamano a donasion a mabalinmo a direkta nga ipatulod:

DIREKTA A DONASION

Donasion babaen iti electronic bank transfer, debit card, wenno credit card. Iti dadduma a sangay, mabalin met daytoy babaen iti jw.org wenno sabali pay a napili a Web site.
Donasion a kuarta, alahas, wenno dadduma pay a napapateg a personal a sanikua. Mangaramid iti surat a mangipakaammo a direkta nga idonarmo dayta a kuarta wenno sanikua.

KONDISIONAL A DONASION

Donasion a kuarta a maisubli iti nagdonar no kasapulanna.
Mangaramid iti surat a mangibagbaga a kondisional dayta a donasion.

NAIPLANO A PANANGTED

Malaksid kadagiti direkta a sagut a kuarta ken napapateg a personal a sanikua, adda pay sabali a pamay-an ti panagidonar tapno masuportaran ti sangalubongan a trabaho ti Pagarian. Nailista dagitoy iti baba. Aniaman ti kayatmo a pamay-an ti panagidonar, pangngaasim ta kontakem nga umuna ti sanga nga opisina iti pagilianyo. Nasayaat met no makisaritaka nga umuna iti abogado wenno tax adviser ta nagduduma dagiti kalikaguman ti linteg ken dagiti pagannurotan iti panagbuis.

Insurance: Mapagbalin kas benepisiario iti life insurance policy wenno retirement/pension plan ti maysa a korporasion nga us-usaren dagiti Saksi ni Jehova.

Deposito iti Banko: Deposito iti banko, sertipiko ti deposito, wenno indibidual a deposito iti panagretiro a maitalek wenno maited iti maysa a korporasion nga us-usaren dagiti Saksi ni Jehova inton matay ti nagidonar. Suroten dagiti paglintegan ti banko iti lugaryo.

Stock ken Bond: Dagiti stock ken bond a naidonar iti maysa a korporasion nga us-usaren dagiti Saksi ni Jehova kas direkta a sagut wenno babaen iti naisurat a katulagan a mayakar dagitoy no matay ti nagdonar.

Lote ken Pasdek: Malako a lote wenno pasdek a naidonar iti maysa a korporasion nga us-usaren dagiti Saksi ni Jehova kas direkta a sagut. No balay ti naidonar, mabalin nga agnaed sadiay ti nagdonar bayat a sibibiag.

Gift Annuity: Stock, bond, wenno kuarta a naidonar iti maysa a korporasion nga us-usaren dagiti Saksi ni Jehova. Umawat ti nagidonar iti espesipiko a kantidad iti kada tawen bayat a sibibiag. Mabalin nga adda diskuento ti income tax-na iti tawen a nangipaay iti gift annuity.

Testamento ken Trust: Sanikua wenno kuarta a maipatawid iti maysa a korporasion nga us-usaren dagiti Saksi ni Jehova babaen ti legal a testamento, wenno espesipiko a mainagan dayta a korporasion kas benepisiario ti trust agreement. Mabalin a makissayan ti dadduma a buis iti daytoy nga urnos.

Kas ipasimudaag ti termino a “naiplano a panangted,” dagitoy a kita ti donasion ket agkasapulan iti panagplano. Tapno matulongan dagidiay mayat a mangsuporta iti sangalubongan a trabaho dagiti Saksi ni Jehova babaen ti naiplano a panangted, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naglaon dayta a broshur iti impormasion maipapan iti nadumaduma a pamay-an ti panagdonar, a maited ita wenno inton matay ti agidonar. Mabalin a saan nga agaplikar iti kasasaadmo ti amin a linaon dayta a broshur gapu ta naiduma ti pagannurotan ti panagbuis wenno ti dadduma pay a paglintegan iti pagilianyo. No mabasamon ti broshur, agkonsultaka iti maysa nga abogado wenno tax adviser. Babaen kadagitoy a pamay-an ti panangted, adu ti nakatulong iti sangalubongan a narelihiosuan a trabahotayo ken iti panangsaranay iti sabsabali, ken dakkel pay ti naksay iti bayadanda a buis. No adda kasta a broshur iti pagilianyo, mabalinmo ti agkiddaw iti sekretario ti kongregasionyo.

Para iti kanayonan nga impormasion, mabalinmo a kontaken ti sangay a makinsakup iti pagilianyo.