Pagarian ti Dios​—Maysa a Gobierno nga Awanan Kurapsion

Umanamongka kadi a no nakusit ti kagimongan ti tao, nakusit met ti aniaman a gobierno a paset dayta? No kasta, sigurado a saan nga agtaud iti kagimongan ti tao ti maysa a gobierno nga awanan kurapsion. Kasta ti iladladawan ti Biblia a gobierno​—ti Pagarian ti Dios, ti gobierno nga insuro ni Jesus nga ikararag dagiti pasurotna.​—Mateo 6:9, 10.

Ti Pagarian ti Dios ket maysa a pudno a gobierno nga agturturay manipud langit. Sukatannanto ti amin a gobierno ti tao. (Salmo 2:8, 9; Apocalipsis 16:14; 19:19-21) Karaman kadagiti bendision nga itden ti Pagarian iti sangatauan ket ti pannakaikkat ti kurapsion iti gobierno. Kas pammaneknek, usigentayo ti innem nga aspeto ti Pagarian.

1. PANNAKABALIN

PROBLEMA: Agtaud kadagiti umili ti pondo dagiti gobierno ti tao, a kaaduanna babaen kadagiti buis. Gapu kadagiti makolekta a kuarta, masulisog nga agtakaw ti dadduma nga opisial, adda met dagiti umawat iti pasuksok manipud kadagiti tattao a mayat a makissayan ti buisda wenno dadduma pay a babayadanda iti gobierno. Mabalin nga agresulta dayta iti awan patinggana a problema​—ingato ti gobierno dagiti buis tapno masulnitan dagiti pukawna, a pakaigapuan iti nakarkaro pay a kurapsion. Iti kasta a kasasaad, mabalin a dagiti mapagpiaran a tattao ti ad-adda nga agsagaba.

SOLUSION: Ti pannakabalin ti Pagarian ti Dios ket naggapu iti mannakabalin-amin a Dios, ni Jehova.a (Apocalipsis 11:15) Saanna a kasapulan ti agkolekta iti buis. Imbes ketdi, gapu iti nakaskasdaaw a “pannakabalin” ti Dios ken iti di agimbubukodan a kinaparaburna, sigurado a maipaayto a naan-anay ti Pagarian dagiti kasapulan ti amin nga iturayanna.​—Isaias 40:26; Salmo 145:16.

2. AGTURAY

PROBLEMA: Ti panagregget a mangikkat iti kurapsion ket “masapul a mangrugi iti ngato,” kuna ni Susan Rose-Ackerman, a nadakamat iti immuna nga artikulo. Mapukaw ti kredibilidad ti gobierno no ikagumaanna nga ikkaten ti kurapsion kadagiti polis wenno opisial ti customs idinto ta panuynoyanna met ti kurapsion kadagiti nangato nga opisial. Ken nakatawid iti kinaimperpekto uray ti kasayaatan nga agturay a tao. Kas kuna ti Biblia, “awan ti tao a nalinteg iti daga nga agtultuloy nga agaramid iti naimbag.”​—Eclesiastes 7:20.

SOLUSION: Saan a kas kadagiti imperpekto a tattao, ni Jesu-Kristo a pinili ti Dios nga Agturay iti Pagarian ket saan a masulisog nga agaramid iti dakes. Pinaneknekan dayta ni Jesus idi saanna nga inawat ti kadakkelan a pasuksok​—“dagiti amin a pagarian ti lubong ken ti dayagda.” Naikari dayta ken Jesus kas kasukat ti maysa a tignay ti palso a panagdayaw iti agturay iti lubong, ti Diablo. (Mateo 4:8-10; Juan 14:30) Uray idi natutuok ni Jesus agingga iti ipapatayna, determinado a nangsalimetmet iti kinatarnawna ta dina inawat ti ipapainumda kenkuana a mangep-ep iti ut-ot ngem mabalin a mangdadael met iti nasayaat a panagandar dagiti sentidona. (Mateo 27:34) Ni Jesus ket pinagungaren ti Dios iti nailangitan a biag. Napaneknekannan nga isu ket naan-anay a kualipikado nga agturay iti Pagarian.​—Filipos 2:8-11.

3. PERMANENTE

PROBLEMA: Regular a maar-aramid dagiti eleksion iti adu a pagilian tapno adda kano gundaway dagiti tattao a mangikkat kadagiti nakapuesto a suitik nga opisial. Ngem ti agpayso, masansan nga adda kurapsion kadagiti kampania ken eleksion, uray kadagiti maibilbilang a nabaknang a pagilian. Gapu kadagiti donasion iti kampania ken dadduma pay nga ar-aramiden dagiti babaknang, maimpluensiaanda dagiti agdama ken masanguanan nga agturay.

Insurat ni Judge John Paul Stevens iti U.S. Supreme Court a ti kasta nga impluensia pagpeggadenna “saan laeng a ti kinalehitimo ken kalidad ti Gobierno no di pay ket ti panagtalek dagiti umili.” Saan ngarud a pakasdaawan no panunoten ti adu a tattao iti intero a lubong a kadagiti amin nga institusion, dagiti partido iti politika ti kakaruan iti kurapsion.

SOLUSION: Iti Pagarian ti Dios, awan ti kurapsion gapu iti kampania wenno eleksion ta agtalinaed ken permanente ti panagturayna. (Daniel 7:13, 14) Yantangay ti Dios ti nangpili iti Agturay iti Pagarian, saan a maisaad wenno mapaksiat babaen kadagiti eleksion. Gapu ta permanente, sigurado a dagiti aramidenna ket kanayon a para iti pagimbagan dagiti iturayanna.

4. LINTEG

PROBLEMA: Iti damo, mabalin a mapanunotmo a sumayaat ti bambanag no adda maaramid a baro a linteg. Ngem kaaduanna, natakuatan dagiti eksperto a no manayonan ti linteg, manayonan met ti kurapsion. Maysa pay, dakkel ti magastos tapno maipatungpal dagiti linteg a mangkissay iti kurapsion, ngem bassit ti magunggona kadagita.

SOLUSION: Adayo a natantan-ok dagiti linteg ti Pagarian ti Dios ngem kadagiti linteg ti gobierno ti tao. Kas pagarigan, imbes a mangaramid ni Jesus iti atiddog a listaan dagiti pagannurotan, intedna ti maaw-awagan iti Nabalitokan a Bilin. Kinunana: “Amin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.” (Mateo 7:12) Napatpateg pay, naipamaysa dagiti linteg ti Pagarian kadagiti motibo ken tigtignaytayo. “Masapul nga ayatem ti padam a tao a kas iti bagim,” kuna ni Jesus. (Mateo 22:39) Siempre, ti Dios ti makabasa iti puso isu a maipatungpalna dagita a linteg.​—1 Samuel 16:7.

5. MOTIBO

PROBLEMA: Ti kinaagum ken kinamanagimbubukodan ti kangrunaan a pakaigapuan ti kurapsion. Masansan a kasta ti kababalin dagiti opisial ti gobierno ken umili. Iti narpuog a department store iti Seoul a nadakamat iti immuna nga artikulo, immawat iti pasuksok dagiti opisial ti gobierno manipud kadagiti kontraktor. Ammoda a makamenosda no mangtedda iti pasuksok ngem iti agusarda kadagiti dekalidad a materiales iti panagibangon ken surotenda dagiti pagalagadan iti konstruksion.

Tapno ngarud maikkat ti kurapsion, masapul a masuruan dagiti tattao a mangparmek kadagiti nairamut a motibo kas iti kinaagum ken kinamanagimbubukodan. Ngem uray masuruanda, awanan dagiti gobierno iti tarigagay ken kabaelan a mangipatungpal iti kasta a kita ti panangisuro.

SOLUSION: Ti Pagarian ti Dios naan-anay nga ikkatenna ti kurapsion babaen ti panangisurona kadagiti tattao no kasano a parmeken dagiti di umiso a motibo a pakaigapuan dayta.b Daytoy a panangisuro tulonganna ida a ‘mangpabaro iti puersa a mangtigtignay iti panunotda.’ (Efeso 4:23) Masursuroda nga ikkaten ti kinaagum ken kinamanagimbubukodan ket agbalinda a kontento ken maseknan iti sabsabali.​—Filipos 2:4; 1 Timoteo 6:6.

6. ITURAYAN

PROBLEMA: Uray iti kapintasan nga aglawlaw ken kasayaatan a panangisuro iti moral, kaykayat ti dadduma a tattao ti agbalin a suitik ken di mapagpiaran. Aminen dagiti eksperto a dayta ti makagapu a saan a maikkat ti kurapsion kadagiti gobierno ti tao. Ti laengen mainanama ket makissayan ti kurapsion ken dagiti makadadael nga epektona.

SOLUSION: Kuna ti United Nations Convention Against Corruption a tapno malabanan ti kurapsion, masapul nga itandudo dagiti gobierno ti “integridad, panagbalin a mapagpiaran ken responsable.” Nupay nasayaat dayta a kalat, saan laeng nga itantandudo ti Pagarian ti Dios dagita a kualidad​—ikalkalikagumna pay dagita kadagiti iturayanna. Kuna ti Biblia a dagiti “naagum” ken ‘naulbod’ a tattao saandanto a tawiden ti Pagarian.​—1 Corinto 6:9-11; Apocalipsis 21:8.

Mabalin a sursuruen dagiti tattao ti agtulnog kadagitoy a nangato a moral a pagalagadan, kas iti inaramid dagiti nagkauna a Kristiano. Kas pagarigan, idi pinadas ti adalan a ni Simon a gatangen ti nasantuan nga espiritu kadagiti apostol, saanda nga inawat ti pasuksokna ket kinunada: “Agbabawika iti daytoy a kinadakesmo.” Idi nakita ni Simon a napeggad ti di umiso a tarigagayna, kiniddawna kadagiti apostol nga ikararaganda tapno maparmekna dayta.​—Aramid 8:18-24.

NO KASANO TI AGBALIN NGA ITURAYAN TI PAGARIAN

Aniaman ti nasionmo, adda gundawaymo nga agbalin nga iturayan ti Pagarian ti Dios. (Aramid 10:34, 35) Ti programa a panangisuro nga ituktukon ti Pagarian​—a maar-aramid itan iti intero a lubong​—ipakitana kenka no kasano. Maragsakan dagiti Saksi ni Jehova a mangidemostra iti libre a panangyadal iti Biblia iti pagtaengan a mabalin nga agpaut laeng iti 10 a minuto iti kada lawas. Maammuam ti ad-adu pay maipapan iti “naimbag a damag ti pagarian ti Dios” ken no kasano nga ikkatenna ti kurapsion iti gobierno. (Lucas 4:43) Mabalinmo ti makisarita kadagiti Saksi iti lugaryo wenno kitaem ti Web site-mi a jw.org.