SUNGBAT DAGITI SALUDSOD MAIPAPAN ITI BIBLIA
Ania ti masakbayan dagiti tattao?
Kasano a ti ipapatay ni Jesus pagbalinenna a posible ti maysa a kagimongan a sadiay maseknan dagiti tattao iti tunggal maysa?
Awan duadua nga agtultuloy a makaaramid dagiti tattao iti panagrang-ay iti siensia. Ngem makapataudda ngata iti maysa a kagimongan dagiti tattao a pudpudno a maseknan iti tunggal maysa? Saan. Managimbubukodan ken naagum ti adu a tattao ita. Nupay kasta, adda nasaysayaat a panggep ti Dios para kadagiti tattao.—Basaem ti 2 Pedro 3:13.
Deskribiren ti Sao ti Dios ti maysa a sangalubongan a kagimongan a sadiay agiinnayatto dagiti tattao. Agbiagdanto a natalged, ken awanto ti mangdangran kadakuada.—Basaem ti Mikias 4:3, 4.
Kasanonto a mapukaw ti kinamanagimbubukodan?
Pinarsua ti Dios ti tao nga awanan iti tendensia nga agbalin a managimbubukodan. Ngem gapu ta pinili ti immuna a tao ti agsukir iti Dios, napukawna ti perpekto a biagna. Natawidtayo ti tendensia nga agbalin a managimbubukodan. Kaskasdi, ti Dios usarennanto ni Jesus a mangisubli iti kinaperpekto kadagiti tattao.—Basaem ti Roma 7:21, 24, 25.
Maitunos iti pagayatan ti Dios, natay ni Jesus kas maysa a sakripisio tapno maikkat ti epekto ti kinasukir ti umuna a tao. (Roma 5:19) Pinagbalin ngarud ni Jesus a posible ti maysa a nakasaysayaat a masanguanan a sadiay awanton ti tendensia dagiti tattao nga agaramid iti dakes.—Basaem ti Salmo 37:9-11.