SUHETO ITI AKKUB
Ania ti Kuna ti Dios Maipapan iti Gubat?
Ania ti sungbatmo? Adu ti mangibaga a pabor ti Dios iti gubat. Imbilin kano ngamin ti Dios iti dadduma nga agdaydayaw idi kenkuana a makigubatda, ket paneknekan dayta ti Biblia. Ngem kuna ti dadduma nga insuro ni Jesus, ti Anak ti Dios, nga ayaten dagiti pasurotna dagiti kabusorda. (Mateo 5:43, 44) Isu nga irasonda nga uray anamongan idi ti Dios ti gubat, saan itan.
Sika ngay? Panagkunam, pabor kadi ti Dios iti gubat? No wen, ania a grupo kadagiti aggugubat ita ti supsuportaranna? No maammuam ti sungbat dagita, mabalin a maapektaran ti mismo a panagriknam ken kapanunotam iti gubat. Kas pagarigan, no ammom nga anamongan ti Dios ti gubat ken agpadakayo pay iti dasdasigan iti aglablaban a grupo, mabalin a mariknam a husto ti supsuportaram ket kombinsidoka a dayta ti mangabak. Ngem ania ngata ti mariknam no maammuam a ti gayam kalaban a grupo ti supsuportaran ti Dios? Mabalin a baliwam ti grupo a dasigam.
Adda pay napatpateg ngem iti dayta. No maammuam ti kuna ti Dios maipapan iti gubat, mabalin a maapektaran ti panagriknam ken kapanunotam iti Dios. No maysaka kadagiti minilion a nakaro a naapektaran iti gubat, masapul a maammuam ti sungbat dagiti saludsod a, Pudno kadi ti ipagarup ti dadduma nga iparparegta ti Dios ti gubat ken ipalpalubosna wenno kayatna pay ketdi ti panagrigrigat a kakuykuyog dayta? Awan kadi bibiangna iti pagimbagan dagiti maparparigatan?
Baka masdaawka a makaammo a dakkel gayam ti nakaidumaan ti sungbat ti Biblia kadagita nga opinion. Manipud idi agingga ita, saan a nagbaliw ti takder ti Dios maipapan iti gubat. Iti tulong ti Biblia, ammuentayo no ania ti kuna ti Dios maipapan iti gubat idi nagkauna a panawen ken idi umuna a siglo—idi nagbiag ni Jesus ditoy daga. Makatulong dagitoy tapno maammuantayo no ania ti kuna ti Dios maipapan iti gubat ita ken no pasetto pay laeng dayta ti biag ti tao iti masanguanan.