Panangbirok iti Tulong Tapno Maawatan ti Biblia

Ibagatayon a damom ti agpasiar iti sabali a lugar. Makakitaka sadiay kadagiti tattao, tradision, taraon, ken kuarta a saan a pamiliar kenka. Siempre, mabalin a maikawa ken masuronka.

Mabalin a kasta met ti mariknam no damom a basaen ti Biblia. Kasla agsublika no kua iti nagkauna a lubong a naidumduma unay para kenka. Maam-ammom dita dagiti tattao a maaw-awagan iti Filisteo, makitam ti naidumduma a kaugalian a panangpigis iti bado, wenno maammuam ti maipapan iti maysa a taraon a maaw-awagan iti manna ken ti baria a pagaammo kas drakma. (Exodo 16:31; Josue 13:2; 2 Samuel 3:31; Lucas 15:9) Mabalin a makatikaw amin dagita. Kas iti panagpasiar iti sabali a lugar, dimo kadi kayat ti agpatulong iti maysa a makailawlawag kadagiti bambanag nga itam la a maammuan?

TULONG ITI NAPALABAS

Manipud iti damo a pannakaisurat dagiti sagrado a sursurat idi 1513 B.C.E., addan naited a tulong kadagiti tattao tapno maawatanda dagita. Kas pagarigan, ti immuna a lider ti Israel a ni Moises, inawatna ti responsabilidad a ‘mangilawlawag’ kadagita.​—Deuteronomio 1:5.

Agarup 1,000 a tawen kalpasanna, adda latta dagiti kualipikado a mangisuro iti Kasuratan. Idi 455 B.C.E., naummong ti dakkel a grupo dagiti Judio, a pakairamanan ti adu nga ubbing, iti plasa iti siudad ti Jerusalem. Adda sadiay dagiti mangisursuro iti Biblia nga agbasbasa a “sipipigsa manipud iti libro [nga imbasa met idi ni Moises].” Ngem saan la a dayta ti inaramidda. “Intuloyda ti nangipaay iti pannakaawat iti panangbasa.”​—Nehemias 8:1-8.

Lima gasut a tawen kalpasanna, nakiraman met ni Jesu-Kristo iti dayta a trabaho a panangisuro. Kinapudnona, pagaammo isuna dagiti tattao kas maysa a mannursuro. (Juan 13:13) Insurona dagiti aguummong a tattao, kasta met dagiti indibidual. Naminsan, iti sanguanan ti rinibu a tattao, impalawagna ti popular a Sermon iti Bantay, ket “nagsiddaaw unay dagiti bunggoy iti wagas ti panangisurona.” (Mateo 5:1, 2; 7:28) Idi 33 C.E., nakisarita ni Jesus iti dua kadagiti adalanna bayat a magmagnada nga agturong iti purok nga asideg iti Jerusalem, ket ‘lukluktanna idi a naan-anay [wenno, silalawag nga isalsalaysayna] kadakuada dagiti Kasuratan.’​—Lucas 24:13-15, 27, 32.

Nangisursuro met idi iti Sao ti Dios dagiti adalan ni Jesus. Naminsan, basbasaen ti maysa nga opisial ti Etiopia ti maysa a paset ti Kasuratan. Immasideg ti adalan a ni Felipe sa dinamagna: “Ammom kadi nga agpayso no ania ti basbasaem?” Insungbat ti Etiope: “Pudno unay, kasano koma a maawatak, malaksid no adda nangidalan kaniak?” Inlawlawag ngarud ni Felipe ti kaipapanan ti basbasaen ti Etiope.​—Aramid 8:27-35.

TULONG A MAIPAPAAY ITA

Kas kadagiti mannursuro iti Biblia iti napalabas, makiramraman met dagiti Saksi ni Jehova ita iti trabaho a panangisuro iti Biblia iti 239 a dagdaga iti intero a lubong. (Mateo 28:19, 20) Linawas a tultulonganda ti nasurok a siam a milion a tattao tapno maawatanda ti Biblia. Adu kadagita a mayad-adalan ti saan a Kristiano. Libre dagitoy a panangyadal ken mabalin a maaramid iti mismo a balayda wenno iti sabali a kombiniente a lugar. Adda pay ketdi dagiti mayad-adalan babaen iti telepono wenno video, iti tulong ti kompiuter wenno gadyet.

Pangngaasim ta umasidegka iti maysa kadagiti Saksi ni Jehova no kayatmo a matulonganka met nga agadal iti Biblia. Makitamto a saan gayam a narigat a maawatan ti Biblia, no di ket “makagunggona [wenno, makatulong] iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg,” tapno “naan-anay[ka] koma a makabael, naan-anay a nakabalan maipaay iti tunggal naimbag nga aramid.”​—2 Timoteo 3:16, 17.