Tuladenyo ti Kababalin Dagiti Propeta

ADDA kadi aniaman a pakaipadaantayo kadagiti nagkauna a propeta? Ti 2013 nga edision ti New World Translation, iti “Glossary of Bible Terms,” masarakan daytoy a depinasion ti sao a propeta: “Maysa a nakaipakaammuan kadagiti panggep ti Dios. Nagserbi dagiti propeta kas pannakangiwat ti Dios, nga ipakaammoda saan laeng a dagiti padto no di ket uray dagiti pannursuro, bilin, ken panangukom ni Jehova.” Nupay saantayo nga agipadto, agserbitayo kas pannakangiwat ti Dios, nga ipakpakaammotayo dagiti linaon ti Sao ti Dios.​—Mat. 24:14.

Nagsayaat la ketdin a pribilehio ti mangipakaammo iti sabsabali maipapan iti Diostayo a ni Jehova, ken ti mangisuro kadakuada iti pagayatanna para kadagiti tattao! Makiramramantayo iti daytoy a trabaho a kadua ti “anghel nga agtaytayab iti nagtangatangan.” (Apoc. 14:6) Ngem mabalin a maipasangotayo kadagiti pakarigatan ket mabalin a malipatantayo a nagsayaat a pribilehio ti makipaset iti daytoy a trabaho. Ania ti dadduma kadagitoy a pakarigatan? Mabalin a mabannog, maupay, wenno mariknatayo nga awan serserbitayo. Saan a naiduma dagiti nagkauna a matalek a propeta, ngem saanda a simmuko. Ken tinulongan ida ni Jehova a mangitungpal kadagiti annongenda. Usigentayo ti dadduma a pagarigan, ket kitaentayo no kasano a matuladtayo ida.

INARAMIDDA TI AMIN A KABAELANDA

Mabalin a mabannogtayo iti inaldaw a trabahotayo ket mabalin a mariknatayo a saantayo a kabaelan ti makipaset iti ministerio. Ipapantayon a kasapulantayo ti aginana; nabannog met ni Jesus ken dagiti apostolna. (Mar. 6:31) Ngem panunotem ni Ezequiel idiay Babilonia ken ti annongenna kadagiti Israelita a naadipen manipud Jerusalem. Imbaga idi ti Dios ken Ezequiel a mangala iti ladrilio ket ikitikitna iti dayta ti siudad ti Jerusalem. Kalpasanna, ipakitana ti mangiladawan a pannakalakub ti naikitikit a siudad babaen ti panagiddana a nakasikig iti kannigid iti 390 nga aldaw ken kalpasanna iti kannawanna iti 40 nga aldaw. Imbaga ni Jehova ken Ezequiel: “Adtoy! mangikabilakto kenka kadagiti singdan tapno saanmo a maipusipos ta bagim manipud iti maysa a sikigam agingga iti sabali a sikigam, inggana a naturposmonton dagiti aldaw ti pananglakubmo.” (Ezeq. 4:1-8) Mabalin a nakatignay dayta kadagiti naadipen nga Israelita. Iti nasurok a makatawen, mapasaran ni Ezequiel daytoy a makatuok nga aramid. Kasano a maitungpal ti propeta ti annongenna?

Naawatan ni Ezequiel no apay a naibaon kas maysa a propeta. Idi naibaon ni Ezequiel, imbaga ti Dios kenkuana: “Uray no dumngegdanto [dagiti Israelita] wenno agkedkeddanto . . . , sigurado a maammuandanto met a ti maysa a mammadto adda iti tengngada.” (Ezeq. 2:5) Linaglagipna ti panggep ti annongenna. Gapuna, situtulok nga impakitana ti mangiladawan a pannakalakub ti Jerusalem. Pinaneknekanna nga isu ket maysa a pudno a propeta. Adda damag a nakadanon kenkuana ken kadagiti padana nga Israelita: “Nakabilen ti siudad!” Wen, nabigbig dagiti Israelita nga adda propeta iti tengngada.​—Ezeq. 33:21, 33.

Iti kaaldawantayo, pakpakdaarantayo dagiti tattao maipapan iti idadateng ti pannakadadael ti intero a sistema ti bambanag ni Satanas. Uray no nabannogtayo, us-usarentayo latta ti pigsatayo a mangikasaba iti Sao ti Dios, agsarungkar, ken mangyadal iti Biblia. Bayat a matungtungpal dagiti padto maipapan iti panungpalan daytoy a sistema, maragsakantayo a maibilang a “maysa a nakaipakaammuan kadagiti panggep ti Dios.”

INIBTURANDA TI PANNAKAUPAY

Babaen iti tulong ti espiritu ni Jehova, sigagaget nga agtrabahotayo. Ngem mabalin a maupaytayo no dadduma gapu iti saan a panangawat dagiti tattao iti mensahetayo. Nagsayaat no lagipentayo ti ulidan ni propeta Jeremias. Napasaranna ti nalalais, nainsulto, ken nauy-uyaw gapu iti panangipakaammona iti mensahe ti Dios kadagiti Israelita. Naminsan, kinuna pay ni Jeremias: “Isu saanko a dakamaten, ket saanakton nga agsao iti naganna.” Ni Jeremias ket maysa a tao a kas kadatayo. Nupay kasta, intultuloyna nga impakaammo ti mensahe ti Dios. Apay? Kinuna pay ti propeta: “Ket iti pusok nagbalin dayta a kas sumsumged nga apuy a napupok kadagiti tulangko; ket nabannogak a nangmedmed, ket saanko a nabaelan nga ibturan.”​—Jer. 20:7-9.

Kasta met, no maupaytayo gapu iti saan a panangawat dagiti tattao iti ipakpakaammotayo a mensahe, malabanantayo dayta a rikna babaen ti panangutobtayo iti mensahe nga ipakpakaammotayo. Mayarig dayta iti ‘sumsumged nga apuy a napupok kadagiti tulangtayo.’ Agtultuloy a sumged dayta nga apuy no iyugalitayo ti inaldaw nga agbasa iti Biblia.

NADAERANDA TI NEGATIBO A RIKRIKNA

Madanagan ti dadduma a Kristiano no naikkanda iti annongen a saanda a dagus nga ammo ti aramidenda. Mabalin a kasta ti narikna idi ni Oseas. Imbilin ni Jehova kenkuana: “Mapanka, mangalaka iti asawa ti pannakiabig ken iti annak ti pannakiabig.” (Os. 1:2) Panunotem no ania ti riknam no mangasawaka ngem imbaga ti Dios a ti asawam ket maysa a balangkantis! Inawat ni Oseas dayta nga annongen. Innalana kas asawa ni Gomer, ket naaddaan iti anak a lalaki. Kalpasanna, nangipasngay iti anak a babai ken maysa pay nga anak a lalaki. Nalawag a dagitoy dua a naud-udi nga annakna ket resulta ti pannakikamalalana. Imbaga idi ni Jehova kenkuana a ti agbalin nga asawana “kamatennanto dagiti naderrep a kaayan-ayatna.” Paliiwem ti sasao a ‘dagiti kaayan-ayatna.’ Kalpasanna, agsublinto ken Oseas. No sika ti propeta, alaem kadi manen ti asawam? Kasta ti imbaga ni Jehova nga aramiden ni Oseas! Dakkel pay ketdi a gatad ti pinanggatang ti propeta kenkuana.​— Os. 2:7; 3:1-5.

Mabalin a pinampanunot ni Oseas no ania ti pagimbagan ti panangitungpalna iti annongenna. Kaskasdi, ti simamatalek a panangaramidna iti dayta iti pudpudno a biag, tinulongannatayo ni Oseas a makaammo iti saem a narikna ti Mannakabalin-amin iti inaramid ti Israel. Kinapudnona, nagsubli iti Dios ti dadduma a naemma nga Israelita.

Saan nga ibaga ti Dios ita iti asinoman a mangasawa iti maysa a balangkantis. Ngem adda masursurotayo ken Oseas iti situtulok a panangitungpalna iti kasta nga annongen. Maysa a leksion a maadaltayo ket situtuloktayo koma a mangipakaammo iti naimbag a damag ti Pagarian “iti publiko ken iti binalaybalay,” uray no marigatantayo no dadduma. (Ara. 20:20) Mabalin a marigatanka a mangaramid iti dadduma a pamay-an ti panangikasaba iti Pagarian. Adu a makipagad-adal iti Biblia kadagiti Saksi ni Jehova ti nangibaga a pagay-ayatda ti agadal iti Biblia ngem pulos a saandanto nga agbalaybalay a mangisaknap iti mensahe. Adu kadakuada ti nangaramiden iti impagarupda idi nga imposible nga aramidenda. Makitam kadi ti leksion ditoy?

Adda pay sabali a masursurotayo ken Oseas iti panangawatna iti narigat nga annongen. Mabalin a nagpambar koma a saanna nga aramiden ti akemna iti simboliko a drama maipapan iti asawana. Asino koma ti nakaammo iti daytoy nga annongen no saan nga insurat ni Oseas daytoy a salaysay? Mabalin a maipasangotayo met iti kasasaad nga adda gundawaytayo nga agsao maipapan ken Jehova ket awan ti sabali a makaammo iti dayta a gundaway. Napasamak daytoy ken Anna, maysa nga estudiante iti hayskul idiay United States. Kiniddaw ti mannursurona iti klaseda a mangisuratda iti salaysay maipapan iti topiko a patienda unay ket kombinsirenda ti klase. Mabalin a binay-an koma ni Anna daytoy a gundaway a mangasaba. Nupay kasta, nabigbigna a gundaway daytoy a naggapu iti Dios. Gapu ta napanunotna a mabalin nga adda saan a mamati, nagkararag ken Jehova, ket natignay a mangisalaysay iti patpatienna. Nangisurat iti salaysay a napauluan iti “Ebolusion: Usigenyo Dagiti Ebidensia.”

Idi imparang ni Anna ti salaysayna iti klase, nagadu ti insaludsod kenkuana ti maysa a balasitang a mamati iti ebolusion. Naballigi nga inkalintegan ni Anna ti takderna. Nagustuan ti mannursurona ti salaysay ni Anna ket napili a kasayaatan. Manipud idin, naaddaan ni Anna iti ad-adu pay a pannakisarita maipapan iti panamarsua iti balasitang a nangsupiat kenkuana. Gapu iti panangawatna iti daytoy nga “annongen” manipud ken Jehova, kuna ni Anna, “Saanakon a maamak a mangikasaba iti naimbag a damag.”

Nupay saantayo a propeta iti naan-anay nga anag, no tuladentayo ti managsakripisio a kababalin dagiti propeta a kas kada Ezequiel, Jeremias, ken Oseas, sibaballigi met a maitungpaltayo ti pagayatan ni Jehova iti kaaldawantayo! Bayat ti panagdaydayaw ti pamilia wenno personal a panagadal, mabalin kadi a basaenyo met ti pakasaritaan ti dadduma a nagkauna a propeta ken utobenyo no kasano a matuladyo dagiti ulidanda?