Protektaram ti Panunotmo

UMAYEN ti kalabanmo! Asino? Ni Satanas! Us-usarenna ti napigsa nga armas—propaganda. Nairanta dayta tapno puntiriaenna, saan a ti bagim, no di ket ti panunotmo.

Ammo ni apostol Pablo dagiti ipakpakat ni Satanas a propaganda, ngem di ammo dayta ti amin a padana a Kristiano. Kas pagarigan, mabalin a pinanunot ti dadduma a taga-Corinto a nakabilbileg ti pammatida ken dida pulos maallilaw. (1 Cor. 10:12) Gapuna, impakdaar ni Pablo: “Maamakak a di la ket ta, kas iti panangallilaw ti serpiente ken Eva babaen ti kinasikapna, dagiti panunotyo mapagbalin a rinuker a mayadayo iti kinapasnek ken iti kinadalus a maiparbeng iti Kristo.”—2 Cor. 11:3.

Ipakita dayta a saan koma a sobra ti panagtalektayo iti bagitayo. Tapno maprotektaram ti panunotmo, masapul nga ammom ti pagdaksan ti propaganda.

KASANO KAPEGGAD TI PROPAGANDA?

Ania ti propaganda? Iti daytoy nga artikulo, ti propaganda ket di umiso wenno mangallilaw nga impormasion a mangimpluensia iti panunot ken aramid ti maysa a tao. Kuna ti dadduma a ti propaganda ket kas iti “panagulbod, panangtiritir, panangallilaw, panangimpluensia, panangkontrol [ken] panangsabidong iti panunot” ken adda koneksionna iti “di umiso, delikado, ken saan a patas nga estratehia.”—Propaganda and Persuasion.

Kasano kapeggad ti propaganda? Kas iti di makita, awan angotna, ken makasabidong a gas, di madmadlaw ken in-inut a mangsabidong dayta iti panunottayo. Gapu ta mabalin a ditay dagus madlaw dayta, kuna ti psychologist a ni Vance Packard: “Adu kadatayo ti maim-impluensiaan ken makonkontrol—a nakarkaro ngem iti ipagaruptayo.” Imbaga pay ti maysa nga eksperto a gapu iti propaganda, adu a tattao ti “nalaka a makaaramid kadagiti kadadaksan a banag” kas iti ‘panangibus iti sabali a puli, pannakigubat, panangidumduma iti puli ken relihion, ken dadduma pay a di umiso nga aramid.’—Easily Led—A History of Propaganda.

No kabaelannatayo nga allilawen ti propaganda ti tao, saan kadi a mas kabaelannatayo nga allilawen ni Satanas? Inad-adalnan ti ugali dagiti tattao manipud pay pannakaparsuada. Konkontrolenna ti “intero a lubong.” Kabaelanna nga usaren ti aniaman a paset dayta a mangiwaras iti kinaulbod. (1 Juan 5:19; Juan 8:44) Nakalalaing ni Satanas a ‘mangbulsek iti pampanunot dagiti tattao’ isu a ‘mayaw-awanna ita ti intero a mapagnaedan a daga.’ (2 Cor. 4:4; Apoc. 12:9) Kasanom a malabanan dagiti propagandana?

PAPIGSAEM TI DEPENSAM

Imbaga ni Jesus ti simple a pangdepensa iti propaganda: ‘Ammuenyo ti kinapudno, ket ti kinapudno wayawayaannakayto.’ (Juan 8:31, 32) Mayarig daytoy iti gubat. Gapu ta ti kinapudno ti masansan nga umuna a maapektaran, masapul nga ammotayo, kas iti soldado, no sadino ti pagalaantayo iti mapagtalkan ken mapagpannurayan nga impormasion tapno dinatayo maallilaw ti kalabantayo. Inted ni Jehova ti Biblia a pakasarakantayo iti amin a kasapulan tapno malabanantayo ti propaganda ni Satanas.—2 Tim. 3:16, 17.

Siempre, ammo dayta ni Satanas, isu nga us-usarenna ti lubong tapno ditay basaen ken adalen ti Biblia. Dimo koma pulos ipalubos a maallilawnaka! (Efe. 6:11) Ikagumaam a ‘naan-anay a maawatan’ ti amin a kinapudno. (Efe. 3:18) Kasapulan nga agreggetka a mangaramid iti dayta. Ngem laglagipem ti simple a kinapudno nga imbaga ti autor a ni Noam Chomsky: “Awan ti sabali a mangikabil iti kinapudno iti panunotmo no di laeng sika.” Isu nga aramidem dayta babaen ti ‘naannad a panangsukimatmo iti Kasuratan iti inaldaw.’—Ara. 17:11.

Agbasbasa ti lalaki iti Biblia isu a naprotektaran iti nagduduma a kita ti propaganda — Tapno maprotektaram ti panunotmo, masapul nga ammom ti pagdaksan ti propaganda

Laglagipem a di kayat ni Satanas nga agpanunotka a naimbag. Apay? Sigun iti Media and Society in the Twentieth Century, “agbalin nga epektibo” ti propaganda no “di agpanunot a naimbag” dagiti tattao. Dimo koma ngarud basta patien wenno akseptaren lattan ti mangngegmo. (Prov. 14:15) Usarem ti inted ti Dios nga abilidadmo nga agpanunot a naimbag ken agrason tapno maipapusom ti kinapudno.—Prov. 2:10-15; Roma 12:1, 2.

AGANNADKA ITI MAMAGSISINA A TAKTIKA

Mabalin nga usaren dagiti soldado ti propaganda tapno kumapsut ti pakinakem dagiti kalabanda ken sumukoda. Mabalin a mangaramidda iti pamay-an tapno aglalaban a mismo dagiti kalabanda wenno allilawenda ida tapno agsisinada. Inamin ti maysa a German a heneral a ti maysa a rason a naabakda idi Gubat Sangalubongan I ket gapu ta “naallilaw [dagiti soldado] iti propaganda dagiti kalabanda a kas iti panangallilaw ti uleg iti koneho.” Kasta met ti ar-aramiden ni Satanas tapno mabingaybingay ken makontrolna dagiti Kristiano. Kas pagarigan, mangaramid iti ditay pagkikinnaawatan wenno impluensiaanna ti maysa a mangisina iti bagina iti organisasion ni Jehova gapu iti ipagarupna a kinaawan hustisia wenno kamali.

Dika agpaallilaw! Agpaiwanwanka iti Sao ti Dios. Kas pagarigan, tapno agtultuloy a makikaykaysaka kadagiti kakabsat, iparparegta ti Biblia nga itultuloymo a “sibubulos a pakawanen” ida ken solbarem a dagus ti di pagkikinnaawatan. (Col. 3:13, 14; Mat. 5:23, 24) Pakdaarannatayo pay ti Biblia a ditay suminsina iti kongregasion. (Prov. 18:1) Kitaem no nadepensaam dagiti propaganda ni Satanas babaen kadagitoy a saludsod: ‘Ania ti nangkontrol iti panunotko idi adda dimi nagkinnaawatan iti maysa a kabsat? Ti espiritu ti lubong wenno ti espiritu ti Dios?’—Gal. 5:16-26; Efe. 2:2, 3.

DIMO IPALUBOS A KUMAPUY TI PANAGTALEKMO

Awanen ti gaganaygayan ti maysa a soldado a makigubat no dinan pagtalkan ti komanderda. Isu a babaen iti propaganda, dadaelen dagiti kalaban ti panagtalek ti soldado iti komanderna. Mabalin nga ibagada: “Saan a mapagtalkan dagiti lideryo!” ken “Isagsagmakdakay laeng!” Tapno pakaruenda dayta, mabalin nga ibagada dagiti nagkamalian ti liderda. Kasta ni Satanas! Di mauma a mangdadael iti panagtalekmo kadagiti us-usaren ni Jehova a mangidaulo kadatayo.

Kasano a maprotektaram ti panunotmo? Dika suminsina iti organisasion ni Jehova ken kanayon a suportaram dagiti kakabsat nga us-usarenna a mangidaulo—aniaman ti makitam a pagkapuyanda. (1 Tes. 5:12, 13) Dimo koma ipalubos a maimpluensiaan ti patpatiem kadagiti pangallilaw dagiti apostata wenno ti dadduma pay a mangdadael iti panunotmo—uray kasla agpaypayso dagiti pammadakesda. (2 Tes. 2:2; Tito 1:10) Surotem ti naibalakad ken Timoteo. Pagtalinaedem iti panunotmo ti kinapudno a nasursurom, ken laglagipem no naggapuan dagita. (2 Tim. 3:14, 15) Nagadu ti panggapuam nga agtalek kadagiti mangidaldalan kadatayo iti kinapudno, a dandani sangagasut a tawenen nga us-usaren ni Jehova.—Mat. 24:45-47; Heb. 13:7, 17.

DIKA AGBUTENG

Laglagipem met a no dadduma, direkta ti usaren ni Satanas a propaganda. Us-usarenna ti pamutbuteng—“maysa kadagiti kabayaganen a propaganda.” (Easily Led—A History of Propaganda) Kas pagarigan, inabak dagiti Asiriano dagiti kalabanda babaen iti “pamutbuteng nga adda kakuykuyogna a propaganda,” insurat ni Philip M. Taylor, maysa a Briton a propesor. Usaren ni Satanas ti panagbuteng iti tao, panagbuteng iti pannakaidadanes, panagbuteng iti ipapatay, ken dadduma pay a panagbuteng tapno tallikudam ni Jehova.—Isa. 8:12; Jer. 42:11; Heb. 2:15.

Dimo ipalubos a kumapuy ti pakinakemmo wenno madadael ti kinamatalekmo gapu iti pamutbuteng ni Satanas. Kinuna ni Jesus: “Dikay pagbutngan dagidiay mangpapatay iti bagi ket kalpasan daytoy saanda a kabaelan nga aramiden ti aniaman pay a banag.” (Luc. 12:4) Agtalekka iti kari ni Jehova nga aywanannaka, nga ipaayna ti “pannakabalin a nalablabes ngem ti gagangay,” ken tulongannaka a manglaban iti aniaman a mamagbuteng kenka.—2 Cor. 4:7-9; 1 Ped. 3:14.

Siempre, maipasangoka latta iti kasasaad a nakabutbuteng ken mangpakapuy kenka. Ngem laglagipem ti imparegta ni Jehova ken Josue: “Bumilegka ken pumigsaka. Dika mapakigtotan wenno agkullayaw, ta ni Jehova a Diosmo adda kenka iti sadinoman a papanam.” (Jos. 1:9) No madanaganka, dagus nga agkararagka ken Jehova ken ibagam ti amin a pakadanagam. Masiguradom a ‘ti talna ti Dios saluadannanto ti pusom ken ti panunotmo’ tapno nabilegka a manglaban iti amin a propaganda ni Satanas.—Fil. 4:6, 7, 13.

Malagipmo pay kadi ti propaganda nga inusar ti Rabsaque, ti naibaon nga Asiriano, maibusor kadagiti adipen ti Dios? Kasla ibagbagana, ‘Awan ti makaprotektar kadakayo iti Asiria. Uray ti Diosyo a ni Jehova, dinakay maisalakan.’ Nagtured pay a nangibaga: ‘Kuna ni Jehova kadakami a dadaelenmi daytoy a siudad.’ Ania ti insungbat ni Jehova? “Dika agbuteng gapu iti sasao a nangngegmo a babaen kadagita nagsao a sibabassawang maipapan kaniak dagiti katulongan ti ari ti Asiria.” (2 Ar. 18:22-25; 19:6) Iti maysa a rabii, nangibaon ni Jehova iti anghel a nangpapatay iti 185,000 nga Asiriano!—2 Ar. 19:35.

AGMASIRIBKA—KANAYON A DUMNGEGKA KEN JEHOVA

Adda kadin nabuyam a pelikula a maal-allilaw ti maysa a karakter? Kunkunam kadi idi: ‘Dimo patpatien ida! Al-allilawendaka laeng!’ Panunotem met ngarud a kasla kasta ti ipukpukkaw dagiti anghel kenka: “Dimo patpatien dagiti kinaulbod ni Satanas!”