Salsaludsod Dagiti Agbasbasa

Apay a maiparit nga i-post ti publikasion dagiti Saksi ni Jehova iti personal a website wenno iti social media?

Gapu ta libre dagiti naibatay iti Biblia a publikasiontayo, pagarupen ti dadduma a saan a dakes no kopiaen ken i-post dagita iti sabali a website wenno iti social media. Ngem maikontra dayta iti Pagannurotan iti Panagusara dagiti website-tayo ken nangpataud dayta kadagiti serioso a problema. Kas nalawag a naibaga iti Pagannurotan, saan a maipalubos nga “i-post iti Internet (aniaman a website, file-sharing site, wenno social network) dagiti artwork, elektroniko a publikasion, legal a simbolo, musika, ladawan, video, wenno artikulo manipud iti daytoy a website.” Apay a maiparit?

Adda copyright ti amin a linaon ti website-tayo. Dagiti apostata ken dagiti bumusbusor us-usarenda dagiti publikasiontayo iti website-da tapno allilawenda dagiti Saksi ni Jehova ken ti dadduma. Nairaman iti website-da dagiti material a mangimula iti panagduadua iti panunot dagiti agbasa. (Sal. 26:4; Prov. 22:5) Us-usaren met ti dadduma dagiti material iti publikasiontayo wenno ti logo ti jw.org kadagiti adbertismen, mailako a produkto, ken mobile device app. Gapu ta addaantayo iti copyright ken trademark, adda dagiti legal a rasontayo a mangiparit iti kasta a di umiso a panagusar. (Prov. 27:12) No bay-antayo ti dadduma, uray dagiti kakabsattayo, nga agi-post kadagiti linaon ti website-tayo iti sabali a website wenno bay-antayo nga usarenda ti jw.org trademark kadagiti lakoda a produkto, mabalin a saan a suportaran ti korte ti panangikagumaantayo a manglapped kadagiti bumusbusor ken agnegnegosio.

Delikado ti agi-download kadagiti publikasiontayo manipud iti sabali a website, malaksid iti jw.org. Ti laeng “matalek ken masirib nga adipen” ti nangitalkan ni Jehova iti responsabilidad a mangipaay iti naespirituan a taraon. (Mat. 24:45) Ti laeng www.jw.org, tv.jw.org, ken wol.jw.org ti us-usaren dayta nga “adipen” nga opisial a website-na a mangipablaak iti naespirituan a taraon. Ken addaantayo laeng iti tallo nga opisial a mobile device app​—ti JW Language^®, JW Library^®, ken JW Library Sign Language^®. Makapagtalektayo nga awan ti adbertismen kadagitoy ken saan a kontaminado iti lubong ni Satanas. No sabali ti naggapuan dagiti naespirituan a taraon, ditay masigurado no nabaliwan wenno kontaminado dagita.​—Sal. 18:26; 19:8.

Kasta met, no i-post-tayo dagiti publikasiontayo kadagiti website a maipalubos ti agkomento, gundawayan dayta dagiti apostata ken dagiti bumusbusor tapno agimulada iti panagduadua iti organisasion ni Jehova. Dadduma a kakabsat ti naallukoy a makidebate iti internet, nga ad-adda a pakaumsian ti nagan ni Jehova. Saan a maitutop dagiti forum iti internet a ‘pangisuruan buyogen ti kinaalumamay kadagidiay saan a sidadaan nga umannugot.’ (2 Tim. 2:23-25; 1 Tim. 6:3-5) Napaliiw met nga adda dagiti peke a social media account ken website a naipanagan iti organisasion, Bagi a Manarawidwid, ken iti tunggal miembrona. Nupay kasta, awan ti personal a Web page wenno social media account ti asinoman a miembro ti Bagi a Manarawidwid.

No iturongtayo dagiti tattao iti jw.org, ad-adda a maisaknap ti “naimbag a damag.” (Mat. 24:14) Agtultuloy a mapaspasayaat dagiti elektroniko a material nga us-usarentayo iti ministerio. Kayattayo a magunggonaan ti amin kadagita. Gapuna, kas naibaga iti Pagannurotan iti Panagusar, mabalin nga ipatulodmo iti e-mail ti elektroniko a kopia ti maysa a publikasion wenno ited ti link ti material a masarakan iti jw.org. No iturongtayo dagiti interesado a tattao iti website-tayo, iturturongtayo ida iti kakaisuna a pudpudno a pagtataudan ti naespirituan a taraon, “ti matalek ken masirib nga adipen.”