Panangipateg kadagiti Payunirtayo
1 Dagiti trabahador iti Pagarian ti Dios agpipinnaregtada iti maysa ken maysa. (Col. 4:11) No panunotentayo a ti kangrunaan a trabaho ti Kristiano a kongregasion isu ti panangasaba ti naimbag a damag, adu dagiti nabileg a rason no apay a patgentayo dagiti amin-tiempo a trabahador nga adda iti tengngatayo.—Mar. 13:10; Roma 16:2; Fil. 4:3.
APAY?
2 Iti direkta a wagas, dagiti payunir patibkerenda ti kongregasion babaen ti pannakitrabahoda kadagiti basbassit pay ti kapadasanna nga agibumbunannag kadagiti nagduduma a paset ti panangaskasaba a trabaho. Ramanenna daytoy ti panagiwaras ti magasin, panangisagana ken panangaramid kadagiti panagsarungkar, ken panangirugi ken epektibo a panangikondukta kadagiti panangyadal ti Biblia kadagiti pagtaengan. Kanayonanna pay, dagiti payunir makaitedda ti ulidan iti situtured a panangasaba iti impormal. Ti panangsuportarda iti urnos ti panangasaba iti tengnga ti lawas mangited kadakuada iti gundaway a makatulong kadagiti dadduma. Ti positibo nga impluensiada idiay tay-ak ket marikna nangnangruna no suportaranda ti panangasaba kadagiti ngudo ti lawas, maysa a tiempo a kaaduan kadagiti dadduma nga agibumbunannag ket kabaelanda ti makiraman.
3 Dagiti payunir tulonganda dagiti kongregasion iti naan-anay ken kanayon a panangwanas iti teritoria. Pagbalinenna daytoy dagiti tattao a nasaysayaat iti panangammoda iti mensahetayo ken nataltalna ti riknada no sarungkarantayo ida gapu ta ammodan no siasinotayo.
IDIAY UNEG TI KONGREGASION
4 Adun dagiti naparegta a sumrek iti amin-tiempo a serbisio gapu ta natignay dagiti puspusoda iti ganetget ken entusiasmo dagiti matalek a payunir. Maysa a kabsat a babai itantantanna idi ti sumrek iti regular payunir a trabaho gapu ta awan pulos ti payunir idiay kongregasionda. Ngem idi pinaregta ti manangaywan ti sirkito, dagus a nagpasalista a payunir. Di nagbayag dagiti dadduma simmurotda met kenkuana, ket dayta a kongregasion itan ket addaanen ti nagadu a nareregta a payunir.
5 Mabalin nga adda dagiti panawen a dagiti panglakayen kiddawenda ti maysa a payunir a tumulong iti maysa a kabsat a nagbalin nga irregular wenno inaktibo. Daytoy a panangtulong mabalin a ramanenna ti panangikondukta ti panangyadal ti Biblia kenkuana. Ti pammati ken regta ti payunir ket makatulong ngarud iti panangpasged manen iti ayat daydiay kabsat para iti kinapudno ken mangpaaktibo manen kenkuana a mangtungpal kadagiti obligasion ti dedikasionna.—1 Tes. 5:14.
PABILGEN DAGITI PAYUNIR
6 Dagiti payunir, kabayatan nga adu ti ar-aramidenda a panangpabileg kadagiti dadduma, mismo a kasapulanda met ti pammabileg tapno ti kasta ket agtultuloyda a napnuan rag-o iti panagserbida. (Roma 1:12) Positibo kadi ti pannakisarsaritayo maipapan ti ministerio a panagpayunir? Kaano ti naudi a panangkomendaryo iti maysa a payunir gapu iti trabahona ken espirituna ti panagsakripisio? Dagiti payunir apresiarenda la unay no adda kadduada a rummuar kadagiti oras ti aldaw a sumagmamano laeng a kakabsat ti rumrummuar. Mabalinyo kadi a kadduaen dagiti payunir ken nalabit agtalinaedkayo a nabaybayag pay bassit idiay tay-ak bilang panangsuporta iti trabaho a panangasaba?
7 Kasano pay a maparegtayo dagiti payunir? Malaksid iti panangitedyo iti komendasion, mabalin a maiyebkasyo ti apresasionyo para kadagitoy a nagaget a trabahador babaen kadagiti material a sansanikuatayo a kas ti panangimbita kadakuada a mangaldaw idiay balaytayo, boluntario nga itutulong kadakuada kadagiti pamasaheda, ken kadagiti dadduma pay a wagas tulongantayo ida aginggat’ kabaelantayo.—Idiligyo ti 1 Tesalonica 5:12, 13.
8 Babaen ti panangidaulo dagiti panglakayen ken ministerial nga ad-adipen iti uneg ti kongregasion, dagiti payunir ken agibumbunannag mangitedda ti intero a suporta kadagiti nasayaat pannakaorganisarna nga urnos para iti serbisio. Gapuna usarentayo ngarud amin dagiti sagsagut nga adda kadatayo a “tumulong iti maysa ken maysa.”—1 Ped. 4:10, 11.