Panangidayaw ken Jehova iti Kanta
1 Pangaasiyo ta luktanyo ti pagkantaanyo iti pagnguduanna idiay likud. Ania ti makitayo? Maysa a koro dagiti kumakanta a Levita idiay nasantuan a templo ni Jehova, a nalawa ti panangingangada iti ngiwatda, a nagkantada a sirarayray. Ti panagkanta isut’ maysa a napateg a benneg iti pudno a panagdayaw idiay templo ni Jehova. Idi tiempo ni Ari David, nasurok a 10 porsiento kadagiti agserserbi iti templo ti nadutokan a mangidayaw ken Jehova babaen iti musika. Ket iti dayta a bilang, 288 dagiti nasanay a kumakanta, a “nalaingda amin.” Masiguroyo a serioso ti panagkantada.—1 Cron. 23:3, 4; 25:7.
2 Iti tiempo dagiti Kristiano, maammuan a ni Jesus ken dagiti disipulona ket nagkantada iti kanta idi nagngudo ti Pangrabii ti Apo. (Mar. 14:26) Ket dinagullit ni apostol Pablo nga imbaga kadatayo iti panagkanta ti panagdaydayaw iti Diostayo. Insuratna iti Colosas 3:16: “Sapay koma ta ti sao ni Kristo iti agtaeng kadakayo a sibabaknang iti amin a sirib. Agtultuloykayo nga agsisinnuro ken agbibinnalakad iti maysa ken maysa babaen iti salmo, daydayaw iti Dios, dagiti espiritual a kanta a buyogen iti kinagrasia, a kantaenyo kadagiti pusoyo ken Jehova.”—Kitaenyo met iti Efeso 5:19, 20.
3 Ti panagkanta kadagiti kanta iti Pagarian isut’ maysa a wagas iti panangidayawtayo ken Jehova. Saan kadi a rumbeng nga agkantatayo iti amin a pusotayo? No aramiden dayta, mangmangtedtayo iti dayaw ni Jehova. Agimdeng kadagiti kantatayo a maiturong kenkuana a kas met laeng dagiti kararagtayo. No pudno nga ipennektayo ti agkanta, maiyegtayo met iti rag-o dagiti dadduma, ket pudno a magunggonaantayo met a mismo.
4 Utobenyo dagiti nagpipintas a balbalikas dagiti kantatayo. Dagitoy ti pudno a makabadang kadatayo a “mangisuro ken mamalakad iti maysa ken maysa.” Anian a nagimbag a pammagbaga iti linabag dagiti kantatayo! Babaen ti panangawat a serioso kadagiti pammagbaga, makatulongtayo a mangkultibar iti bungbunga ti espiritu, tapno marnuoyantayo kadagitoy ken masaluadantayo a maibusor iti iraraut ti nainlasagan, nailubongan nga impluensia. ‘Ti panagkanta iti puspusotayo’ isut’ mamaregta kadatayo nga agserbi ken Jehova a situtured ken siraragsak.
5 Tapno nasayaat iti rubbuat ti panagkanta kadagiti gimong, masapul nga iyanunsio iti tserman saan laeng a ti numero iti kanta ngem kasta met koma iti temana, ti titulona. Sagpaminsan met a dakamatenna dagiti Nainkasuratan a basaran ti kanta ken makomentuan iti ababa no kasano a maitutop iti impormasion a maipresenta.
6 Dagiti Kingdom Melodies ken kasta met dagiti cassette iti piano dagiti kantatayo isudat’ nagsayaat nga instrumento a tumulong iti pamiliatayo a mangkabisado kadagiti kanta. Ti panangtokar kadagitoy a kas dedenggen a musika isut’ kasayaatan a makaparag-o kadatayo a mangkabisado kadagiti kantatayo.
7 Masansan nga ipalagip kadatayo ti Kasuratan iti obligasiontayo a mangidayaw iti naayat a nailangitan nga Ama a buyogen ti kanta. Aramidentayo koma dayta iti amin a kararua. Iti kasta maitedtayo ti makabang-ar iti puso a pammaneknek kadagiti sangaili a nakigimong kadatayo. Wen, agkanta ken mangaramidtayo iti melodia ken Jehova, kas inaramid ni David idi ugma.—Sal. 108:1-3.