Panagapit a Maiyataday iti Bukodtayo a Panagregget

¹ Indemostra ni Jehova ti ayatna iti sangatauan iti nagduduma a pamay-an. Inlawlawag ni Jesus iti di maartapan nga ayat ti Dios, nga intudona kadagiti nagtataripnong nga ummong a ti Dios ket “palgakenna ti init nga agpadpada kadagiti nadangkes ken naimbag a tattao ken pagtuduenna nga agpadpada kadagiti nalinteg ken nakillo a tattao.” (Mat. 5:43-48) Iti sabali nga okasion, impabigbig ni Jesus iti kantan-okan nga ebkas ti ayat ni Amana​—ti sakripisio iti bugbugtong nga Anakna, isu nga inted ti Dios a pakaisalakanantayo. (Juan 3:16) Imbalakad ni Jesus kadagiti nagimdeng kenkuana nga awatenda koma a sipapateg iti ayat ni Jehova. Ikagkagumaantayo aya nga aramiden dayta?

² Tapno maiyebkastayo a naan-anay iti panangipateg ken pananggun-od iti manayon a gunggona manipud iti ayat ni Jehova, masapul a dumtengtayo ti pannakaammo kenkuana. (Juan 17:3) Kasapulantayo ti pammagbaga ken direksion no kasanotayo a makaserbi kenkuana iti wagas a maawat. Indemostra ni Jehova ti maseknan nga ayatna babaen ti pannangtedna iti Saona, ti Biblia, ken babaen ti panamataudna iti nakaskasdaaw nga organisasionna, a babaen kenkuana ket umawattayo iti balakad ken panangiwardasna. (Mat. 24:45-47; 2 Tim. 3:16, 17) Kas dedikado a tattao ni Jehova, naisurotayo iti danana. Ngem ipakpakitatayo aya babaen iti bukod a reggettayo ti panangipategtayo iti ayat ni Jehova? Ipangpangagtayo kadi ti balakadna tapno isut’ maay-ayotayo ken magunggonaantayo a mismo? (Isa. 48:17; Sant. 1:22) Nagsurat ni apostol Pablo iti 1 Corinto 3:8: “Ita daydiay nagmula ken daydiay nagsibug ket maymaysada, ngem tunggal tao isut’ umawat iti bukodna a gunggona a maiyataday iti mismo a panagbannogna.”

³ Wen, masapul nga agtrabahotayo nga agaramid iti daydiay kayat ti Dios a paaramid kadatayo. Saan a tunggal maysa ket agpadpada ti espiritual a panagprogresona. Adu dagiti paktor nga adda singgalutna iti progresotayo, ket saan a nainsiriban no maaramid iti makapaupay a panamagdilig. Nupay kasta, ti nasken unay isu daydiay panagregget iti tunggal maysa nga agaramid iti banag a rumbeng nga aramiden. Ania ti maaramidtayo tapno maiyasidegtayo iti organisasion? Adda kadi beddeng a mabalintayo a pasayaaten iti panangawat kadagiti personal a responsabilidad kas Kristiano? Ania a pinget iti alaentayo tapno maited iti nasaysayaat a suportar kadagiti ar-aramid ti kongregasion? Adda kadi dagiti puntos a masapultayo nga iyaplikar a maitunos iti instruksion nga inted ti organisasion kadatayo?​—1 Tim. 4:16.

TULADEN DAGIDIAY MATALEK

⁴ Ti naimbag a damag iti Pagarian ti maikaskasaban iti dinekada babaen dagiti matalek a kakabsat a lallaki ken babbai. Dagitoy a mapagtalkan, kas ken Pablo, ti maikari a pagtuladan. (1 Cor. 11:1) Impangagda ti ayat iti Dios ken nagapitda ti nawadwad a gunggona gapu iti panagbannogda ken bukodda a pinget a nangsurot iti balakad ti Biblia. Buklenda iti solido a bugas dagiti aktibo a trabahador iti kongregasion, a saanda a nagtukkiad kadagiti bukodda a responsabilidad. Makitatayo iti bunga dagiti nagbannogan ti tunggal maysa.​—Roma 1:13; 2 Cor. 3:1-3.

⁵ Ita, pinullo a ribo dagiti agdadamo a sumsumrek iti organisasion ti kada tawen. (Isa. 60:8) Seriosoda met iti panagbannog tapno agmataenganda kas espiritual a tattao, ket ti regtada iti panangasaba a trabaho ti maikari unay a komendasionan. Nagunggonaanda manipud pannakakitada no kasano a binendisionan ni Jehova dagidiay napinget a nagtrabaho iti serbisiona. Ti ehemplo dagiti nataengan a kakabsat a lallaki ken babbai isut’ timmulong kadagiti agdadamo a mangipateg a saanen a tiempo iti panagpammayan wenno panagsarimadeng iti serbisio ti Dios. Agdadamo man wenno eksperiensiadotayon nga agibumbunannag, agtultuloytayo kadi a dumakkel iti espiritual, nga awatentayo dagiti bukodtayo a Kristiano a responsabilidad ken gundawayantayo amin dagiti teokratiko a parabor?

PANANGALAGAD ITI MAADALTAYO

⁶ Sakbay pay nga insurat ni Santiago a masapul a ‘managaramidtayo koma iti trabaho,’ imbagan ni Moises kadagiti Judio: “Masapul a tungpalenyo dagitoy a sasao.” (Sant. 1:25; Deut. 11:18) Gapuna a ti pannakaammo laeng ket saan nga umdas. Kasapulan dagiti Judio nga alagaden dagiti sasao ti Linteg kas panagtulnog ken Jehova. Daytoy a pamunganayan a prinsipio ti agtalinaed a kasta. Ni Jesus, nga Anak ti Dios, sigurado nga ammona iti importansia ti panagtulnog. (Juan 8:28) Nakunana iti Mateo 7:24: “Tunggal maysa a dumngeg kadagitoy a sasaok ken aramidenna ida isut’ pumada iti maysa a nasaririt a tao.”

⁷ Iyaplikartayo met laeng dagiti maadaltayo kadagiti asamblea ti sirkito? Patgentayo kadi no apay a nasken iti daytoy a tiempo ti panagridam ken panagalibtak? Naalertotayo aya kadagiti nasikap nga atake ken silo nga impakat ti Diablo? Tagipatgentayo kadi iti pammagbaga ken pakdaar a masansan a maited kadatayo babaen ti organisasion maipapan iti panagkasapulan iti moral ken espiritual a kinadalus iti kongregasion? Iti ania a getleng wenno gerger iti naabottayon a nangalagad iti daydiay nangngegtayo?​—Sant. 1:23-25.

⁸ Ti agdama a programa iti espesial nga aldaw ti asamblea ket igunamgunamna iti panagkasapulan nga agsanto, kas ken Jehova a nasantuan. (1 Ped. 1:14-16) Ti kinasanto kaipapananna iti relihioso a kinadalus, wenno kinasin-aw, nasagrado. Ipasimudaagna iti estado ti pannakaipuera a maipaay iti serbisio ti Dios. Naitalek kadatayo iti ministerio ti naimbag a damag. Gapuna, masapul a nadalustayo iti espiritual, moral, ken pisikal tapno maiparbengtayo nga agawit iti nasantuan a Sao ti kinapudno. Kasapulanna daytoy iti labes ngem ti gagangay nga asikaso iti mismo a bagbagitayo. (Heb. 2:1) Bayat nga aramidentayo dayta, apitentayo dagiti bendision a maiyataday iti bukodtayo a kinaregget.

GUNGGONA MANIPUD ITI PERSONAL A PANAGADAL

⁹ Ti personal a panagadal isut’ tumulong kadatayo a bumileg iti pammati, ken paramutenna ti panangipategtayo iti kinapudno. Mangted kadatayo daytoy ti panagtalek ken kabalannatayo nga agsao a buyogen ti autoridad. Itdenna kadatayo ti panangutob ken pannakaawat ken tumulong kadatayo a mangisuot iti baro a kinatao. (Col. 1:9-11) Nupay kasta, ti nabunga a panagadal ket mangala iti tiempo ken pinget, ket awan iti panglintegan tapno magun-od iti umiso a pannakaammo ken espiritual a kinauneg. No ania ti ikabiltayo iti panagadal isu met laeng dayta ti magun-odtayo.​—2 Cor. 9:6, 7; Gal. 6:7.

¹⁰ Nangitaningkayo kadi iti umdas a tiempo ti kada lawas nga agsagana a maipaay kadagiti gimong ti kongregasion? Maysa daytoy a wagas ti panangipateg a maipaay iti espiritual a dieta nga impaay ni Jehova babaen iti matalek ken naannad nga adipen. Ti maitutop a panagsagana a maipaay kadagiti gimong isut’ bumadang kadatayo nga agintek iti iskediol nga agbasa ken mangadal iti Sao ti Dios. Nangitudingtayon aya iti tiempo ti kada lawas a maipaay iti panagbasa ti Biblia kas naiwayat iti programa a maipaay iti Teokratiko a Pagadalan iti Ministerio? Kasapulanna laeng iti sumagmamano a minutos ti kada aldaw a basaen ken utoben iti material. Ti Gimong iti Serbisio isut’ tumulong kadatayo nga agalibtak iti wagas no kasano a maaramid iti publiko a ministeriotayo nga epektibo. Agsagsaganatayo met laeng, mangted iti espesial a kapanunotan no kasano a mausar daytoy a material iti ministerio? Ken ikagkagumaantayo met laeng nga usaren dagitoy a madagdagus? Maaramid met koma iti masinnunuo nga urnos nga agsagana a maipaay iti Panagadal ti Pagwanawanan ken Panagadal ti Libro iti Kongregasion. Ar-aramidentayo kadi dayta?

MAKIRAMANKAYO KADAGITI GIMONG

¹¹ Lalo pay a magunggonaantayo no makiramantayo kadagiti gimong. Ti panagsagana a maipaay kadagiti gimong ken pannakipaset kadagitoy ti mamagtalinaed kadatayo nga atentibo bayat iti taripnong ken nalaklaka kadatayo ti magunggonaan iti komento dagiti dadduma. Adu dagiti makalagip pay laeng iti panangikarigatanda a nagkomento ti umuna a daras iti gimong wenno ti kaunaan a palawagda kas estudiante iti Teokratiko a Pagadalan iti Ministerio. Nupay dakkel a rukod ti kinanerbioso iti naparukman, agtultuloytayo kadi a rumang-ay pay iti espiritual a madlaw dagiti amin? (1 Tim. 4:15) Magunggonaan dagiti dadduma ken maparegtada babaen dagiti komentotayo. No nakasaganatayo a naimbag, a naadaltayo ti material a mawanas bayat iti gimong, ti nabagas a pannakipasettayo isut’ mamaggunay iti dadduma iti ayat ken naimbag nga ar-aramid.​—Heb. 10:23-25.

¹² Dagiti komentotayo ket saan koma nga atiddog ken komplikado. Masansan a kasayaatan no mapaababa dagiti komento a diretso a sungbatanna dagiti saludsod a maisango wenno lawaganna iti aplikasion ti maysa a kasuratan. No nakasaganatayo a naimbag, mabalintayo ti agkomento iti bukodtayo a sasao. No aramidentayo dayta, mas magunggonaantayo ken kasta met dagiti dadduma. Apay? Agsipud ta kasapulanna a panunoten pay nga umuna no ania ti sawen ken ilawlawag a punto bayat a naawatantayo dayta. Mabalin a daytoy met ti mamaglaka a maawatan dagiti dadduma iti material. Kasta met a tumulong daytoy kadatayo a malaglagip a kanayon ti impormasion a mabalin a mausar manen iti sabali nga okasion.

AGMULAKAYO A SIBUBUSLON IDIAY TAY-AK

¹³ Ti Kristiano a ministeriotayo isut’ maysa a gameng iti serbisio. (2 Cor. 4:7) Matmatanyo kadi a kasta? Babaen iti ministerio, addaantayo iti pribilehio a mangiyebkas iti pammatitayo kadagiti sabsabali. Nakuna ni Jesus a ti nawadwad iti puso, isut’ sawen ti ngiwat. (Luc. 6:45) Ti personal a panagreggettayo a makiraman iti tay-ak ti ministerio isut’ mangiturong iti nawadwad a maapit a gunggona. Ti pannakaawattayo iti kinapudno isut’ mapatadem, ken mapatanortayo iti dakdakkel nga abilidad a mangusar iti Biblia. Addaantayo ti rag-o a mangyeg iti kinapudno iti sabsabali ken matulongan ida a makaadal maipapan iti Naindaklan a Namarsua. Agtakdertayo a kas saksi iti nalinteg a panagturay ti Dios ken iti soberaniana. Maragsakantayo agsipud ta ammotayo a maay-ayo ni Jehova, ken nasukogtayo a kaasping iti kinaisuna ken ar-aramidentayo ti pagayatanna.​—Mat. 5:48.

¹⁴ No itultuloytayo a rukoden iti personal a pingettayo, ti panagdayawtayo ken Jehova ket saanto a pulos a tungpal bilin a serbisio. Ania ti kayat a sawen dayta? Kaipapananna a saantayo nga agbalin a kagudua iti puso a panagaramid iti pagayatan ti Dios, a mangipaaytayo laeng iti napammarang a serbisio kenkuana tapno makuna met nga adda naaramidan ngem saan a nagtaud iti napusuan a debosion ken regta. Masapul a ti serbisiotayo ken Jehova ket sibubukel a napusuan. Addaantayo iti Nainkasuratan nga obligasion a mangted iti amintayo a maipaay iti serbisiona. (Col. 3:23, 24) Pudno, nagduduma iti kasasaad, ket saan a sapulen ni Jehova daydiay saantayo a maaramidan. Nupay kasta, no ania ti maaramidtayo, namnamaenna nga aramidentayo koma dayta! (Mat. 22:37) Idinto ta ti natnag a natauan a kasasaad ket agannayas iti kinapambar, naimbag a banag no sagpaminsan nga usigentayo ti bagbagitayo tapno makita no ania iti pangparang-ayantayo a maipaay iti serbisio ti Dios. Nairuamtayo kadin a mangaramid iti dayta?

¹⁵ Masapul a maalagad iti kinaridam tapno maliklikan dagiti personal a gakat ken tarigagay a manglapped kadatayo a mangipaay iti daydiay kasayaatantayo iti serbisio ni Jehova. Dagiti ragragsak, pagay-ayaman, ken paglinglingayan nga ar-aramid ti masapul a mailugar. Kasta met nga agaluadtayo iti tendensia a maigamer kadagiti panggedan. No tungpalen iti balakad ni Jesus iti Mateo 6:22, 23, awan duadua a maikagumaantayo a sanguen dagiti espiritual nga intereses ken agapittayo kas maiyataday.

¹⁶ Bayat nga agtultuloytayo a sipipinget a mangikapet iti baro a personalidad wenno kinatao, awatentayo koma dagiti bukodtayo a pagrebbengan a mangalagad iti balakad ken singasing a maawat manipud kadagiti gimong ti kongregasion, asamblea, kombension, ken babaen dagiti publikasion. Sapay koma ta tunggal maysa kadatayo ket agadal a sireregta, makipaset a siaaktibo kadagiti gimong, ken makiraman iti daytoy naindaklan a panagaramid ti disipulo a trabaho kas ipalubos iti bukodtayo a kasasaad. Babaen ti kasta a sipapateg a panangipangag iti ayat ti Dios, masigurotayo ti agapit iti nawadwad a naespirituan a gunggona itan ken masalimetmetan iti solido a namnama iti biag nga awan patinggana idiay baro a lubong ni Jehova.