Usarenyo ti Biblia iti Tay-ak ti Serbisio
1 Dagiti naipaltiing a sasao iti Biblia ti addaan iti nabileg nga epekto kadagiti tattao. Gapuna, idi immuna a siglo, ni Pablo ket ‘nakirinnason manipud iti Kasuratan,’ nga inlawlawag ken pinaneknekanna dagiti puntona babaen kadagiti reperensia. (Ara. 17:2, 3) Ni Apolo, idi nangasaba kadagiti Judio, “indemostrana babaen dagiti Kasuratan a ni Jesus isu ti Kristo.”—Ara. 18:24-28.
2 Sursuroten ita dagiti Saksi ni Jehova dayta nga ehemplo. Kas nadakamat idiay Marso 1, 1986 a Watchtower, panid 26: “Kayatda a mabigbig dagiti tattao a ti damag nga iwarwaragawagda ket saan a namungay kadakuada a mismo ngem nagtaud iti Sao ti Dios. Gapuna a direkta ti panangusarda iti Biblia, nga aktual a basaenda manipud iti dayta nga agpaay iti dadduma agingga ti pakabalinanna.” Ar-aramatenyo kadi a naan-anay ti Biblia iti ministerioyo?
NO APAY NGA EPEKTIBO
3 Apay nga epektibo unay ti Biblia? Agsipud ta “kabaelanna a salputen iti panunot ken panagem ti puso.” (Heb. 4:12) Ti pudno a motibo dagiti tattao ti lumtuad no maibutaktak ti Nainkasuratan a kinapudno. Dagiti nasingpet ti panagpuspusoda a tattao isudat’ maiyadani kenkuana. Kas ehemplo, maysa a pagasawaan nga agtutubo ti napagsaludsodan no apay a nangipangagda a madagdagus iti naimbag a damag. Ti sungbatda? “Gapu iti Biblia.” Nadagdagus a nabigbigda iti timek “ti naimbag a pastor” iti Biblia.—Juan 10:14.
4 Ti maysa a personal a programa iti panagadal, agraman panagsagana iti amin a gimong ti kongregasion isut’ mangkabal kadakayo iti mas natalek a panangusar ti Biblia. (2 Tim. 3:16,17) Mabalin nga aginsayo dagiti miembro ti pamilia a maipaay iti Topiko a Pagsasaritaan. Kasta met, kaaduan kadagiti introduksion idiay pinanid 9-15 iti Panakirinnason a libro ket saklawenna ti panangbasa iti maysa a kasuratan. Apay a dikay sanayen iti dadduma kadagitoy? Usarenyo no ania daydiay praktikal ken makatiliw iti interes dagiti tattao idiay teritoriayo.
USARENYO TI UMISO A PANANGUSIG
5 Adda dagiti tiempo a mabalintayo nga awisen dagiti bumalay a mangiruar iti Bibliada tapno basaentayo dagiti kasuratan. Usarenyo ti umiso a panangusig iti kakastoy a sirkumstansia. No kayatyo a mabiitkayo laeng, mabalin a maikeddengyo a maysa laeng a teksto ti mabasa manipud iti Topiko a Pagsasaritaan. Wenno no ti bumalay ket nalawag a kupado, mabalinyo lattan a kotaren iti maysa a teksto, a kunaenyo a daytoy ket nagtaud iti Biblia. Masansan nga inaramid daytoy ni Jesus ken dagiti apostolna, idinto ta awan iti awitda a kopia. Mabalintayo met nga imemoria dagiti kasuratan tapno sidadaan a mausar iti ministeriotayo.
6 Kayattayo nga ‘aramaten iti sao ti kinapudno a siuumiso.’ (2 Tim. 2:15) Ti panangaramid iti dayta a sieepektibo isut’ mangpatalged a ministronatayo iti Dios nga ti mensahetayo ket naibatay iti Saona.