Dayawenyo ti Dios iti Sangaparsuaan
1 Napintas a minuyongan, nakolor nga ilelennek ti init, nabituen a langlangit, naayug a kanta dagiti tumatayab—iti siasino ti mapadayawan kadagitoy a bambanag? Wen, matignaytayo a mangidayaw iti Dios ti sangaparsuaan. Naimpusuan ti ikakanunongtayo iti deklarasion idiay Apocalipsis 4:11. Gapu ti panamarsuana kadagiti amin a bambanag, maikari ni Jehova a Dios iti panagdayawtayo.
2 Nupay nawadwad dagiti ebidensia ti naparsuaan nga ar-aramidna, intandudo dagiti tattao iti kapanunotan a ti biag ket timmaud nga aksidente wenno babaen iti bulsek nga ebolusion. Daytoy a nagpaiduma a kinaulbod ti nangipababa ken nangimameg kadagiti tattao, ken maysa a tabbaaw nga umsi iti Naindaklan a Namarsuatayo.—Ecl. 12:1; Roma 1:20, 25.
3 Iti Hunio, kas nasungdo nga ad-adipen ni Jehova, addaantayo ti oportunidad a mangibagi iti kinapudno maipapan ti Namarsuatayo ken iti nakaskasdaaw nga ar-aramidna. Ti libro a Life—How Did It Get Here? By Evolution or by Creation? isut’ maitukon iti amin a mangipakita ti interes a mangadal iti kinapudno maipapan ti punganay ken panggep iti biag. Daytoy a publikasion ti mangkabal kadatayo a mangaramid iti natured a panangidepensa ti kinapudno maipapan iti punganay ti biag.
4 Espesial a Tertitoria: Malaksid ti panangasaba iti balaybalay, maipaaytayo ti nagpaiduma a pinget a makisao iti tattao nga addaan ti masinnunuo nga interes iti suheto ti ebolusion wenno panamarsua, a masarakan ida idiay pagtrabahuan wenno pagadalanda. Kas ehemplo, dagiti agtutubo a Saksi maipakitada daytoy kadagiti maestroda. Maysa nga agtutubo a Saksi ti nangted iti maestrona ti maysa a libro a Creation ket nasdaaw a nakakita a saanna laeng nga inadal a naan-anay ngem inrugina pay nga inusar kas basaran iti panangisurona ti klase. (w90 9/1 p. 32; w86 10/1 p. 32) Apay a dikay asitgan ti tunggal maestro ken kaeskuelayo a mariknayo a maragsakan a mangbasa iti daytoy a publikasion?
5 Nagpaiduma koma a pinget ti maiturong a mangdanon kadagiti estudiante iti kolehio ken edukador nga agnanaed wenno agtartrabaho idiay teritoriayo. Dagiti propesional a tattao a kas kadagiti abogado ken dodoktor ti mangipateg iti nauneg a nasukimat ken dokumentado a masarakan iti Creation a libro. (yb87 p. 54) Dagidiay maasitganyo ti nalabit nga agngayangay a maaddaan iti daytoy napintas ti ilustrasionna a publikasion a kas pagreperensiaanda.
6 Nainsiriban nga itukon daytoy Creation a libro iti tunggal maysa a masabet bayat ti Hunio. Awan duadua a bayat a malawagan ti maysa wenno ad-adu a masinnunuo a puntos manipud iti libro kas edukasional ken mamabileg ti pammati iti Namarsua, masarakanyo nga adu dagiti agmayat a mangadal ti ad-adu ken sisasaganada a mangala iti libro.
7 Sapay koma ta daytoy a nagsayaat nga instrumento ti saan laeng a tumulong iti ad-adu a makakita no kasano ti kinaawan kaeskanna iti teoria ti ebolusion ngem tumulong met kadakuada a mangipateg “iti Nangaramid ti langit ken daga.”—Sal. 146:6.