Makaaramidkayo Aya ti Ad-adu Pay a Panangidayaw ken Jehova?
1 Dayta ti nasken a saludsod kadatayo amin a rumbeng nga usigen. Kas matalek a tumutulad iti Apotayo, ni Jesu-Kristo, dayawentayo ita ti Diostayo babaen iti panangiwaragawag ti naganna iti publiko. Daytoy ti responsabilidad a masapul nga ibaklay no kayattayo a magun-odan iti pabor ti Dios. (Mar. 13:10; Luc. 4:18; Ara. 4:20; Heb. 13:15) Anian a di mailadawan a pribilehio—wen, panagdayaw—ti panangawit iti daytoy a naimbag a damag kadagidiay natda a nawarawara a “karnero” a mabalin nga agkameng pay iti unibersal a pagtaraknan ni Jehova!—Juan 10:16.
2 Makaaramidkayo kadi agraman annakyo iti ad-adu pay a panangidayaw ken Jehova babaen ti panangpawadwad iti aktibidadyo ti ministerio? Iti awan sarday a panagadu ti bilang iti sangalubongan, dagiti kakabsattayo a lallaki ken babbai ti sumsumrek iti payunir a serbisio. Bayat ti bulan iti Abril 1992, maysa a peak dagiti 34,313 ditoy Pilipinas ti adda iti espesial, regular, wenno auxiliary payunir a serbisio. Impamaysayo kadin a bukbukod ti serioso a panangusig iti panagpayunir? Pinaregtayo aya dagiti annakyo a mangragpat iti karera ti amin-tiempo a ministerio?
3 Apay a dikay tingitingen ti bukodyo a rikna a maipaay iti payunir a serbisio? Kada madakamat daytoy a suheto, dagus kadi a kunaenyo a ti kasasaadyo ket saanna a palubosan iti panagserbiyo kas payunir a ministro? Pudno a ti kinapayunir ket saan a posible iti tunggal maysa. Dagiti Nainkasuratan a responsabilidad ken sabsabali a limitasion ti manglapped iti adu nga agserbi ti amin a tiempo. (1 Tim. 5:8) Ngem pinadasyo kadin a pinanunot daytoy iti nabiit pay a binuyog ti kararag? Napagsaritaanyon aya daytoy a suheto kas maysa a pamilia tapno kitaenyo no uray adda maysa laeng a miembro a makapayunir? Ti Nobiembre 15, 1982, a ruar iti The Watchtower (Mayo 15, 1983 ti Iloko) nangted iti makatukay ti panunot a sasao iti panid 23: “Kinapudnona, tunggal Kristiano a ministro masapul a sikakararag nga usigenna no isu ket makapayunir wenno saan. Maysa a pagasawaan idiay Sud Africa a nagpayunir iti sangapulo ket lima a tawenen ti nagkuna: ‘Apay nga agpaypayunirkami? Maikalinteganmi aya iti saklang ni Jehova no saankami nga agpayunir?’ Adu dagiti saan a payunir ti mabalin a mangisaludsod: ‘Pudno kadi a maikalintegak iti saklang ni Jehova ti kinapudno no apay a saanak a payunir?’”
4 Ti sabali nga artikulo iti Watchtower maipapan daytoy a suheto ti nangaramid iti daytoy natadem a komento: “Tunggal maysa kadatayo ti masapul a napudno iti mismo a bagina. Kunaenyo kadi, “Situtulok ti espiritu, ngem nakapoy iti lasag’? Ngem ti kadi espiritu ket pudno a situtulok? Liklikantayo koma ti panangusar iti kinakapoy ti lasag a kas pambar iti saan a natulok nga espiritu.”—w78 8/15 p. 23 (w79 2/15 p. 25 ti Iloko).
5 Nagannak nga Agtarigagay iti Balligi Dagiti Annakda: Impasiguro kadatayo ti Proverbio 15:20: “Ti masirib nga anak paragsakenna ni amana.” Dagiti nadiosan a nagannak ti awan duadua nga agragsak no dagiti annakda a babbaro ken babbalasang ket surotenda iti biag ti dedikado a serbisio ken Jehova. Nupay kasta, dagiti annakyo ket saanda nga automatiko a pilien iti nainsiriban a kurso. Ti pangargari daytoy lubong ket nabileg unay. Nagannak, ti balor dagiti annakyo ket matubay babaen kadakayo. No kanayonkayo nga agsao a positibo maipapan ti gunggona iti amin-tiempo a serbisio, no paregtaenyo dagiti annakyo a sapulen ti timpuyog dagiti debotado a payunir, no pudno a kombensidokayo a ti amin-tiempo a ministerio isut’ kadawyan a karera a ragpaten iti annakyo, daytoy a positibo a kapanunotan ti awan duadua nga addaan iti puersa kadakuada. Tulonganyo ida a mangipateg iti balor ti panangaramid iti naimbag a nagan ken Jehova imbes a kadagiti tattao.
6 Agtutubo, ilawlawag ti Proverbio 22:1 maipapan iti panagpili nga aramidenyo: “Ti naimbag a nagan isut’ ad-adda a pilien ngem iti nawadwad a kinabaknang; ti pabor nasaysayaat ngem iti pirak ken balitok.” Ania a kita ti nagan iti ar-aramidenyo nga agpaay kadakayo? Panunotenyo dagiti lallaki ken babbai a nabasatayo iti Biblia a nangaramid ti maysa a nagan iti Dios babaen ti dedikado a serbisio. Adda ni Lucas, ti ay-ayaten a doktor, ken ni Enoc a nakipagna iti pudno a Dios. Immawat ni Samuel iti kasayaatan nga edukasion a mabalin, a nangrugi a nagserbi idiay templo ni Jehova manipud kinaganusna. Kunaenyo kadi a dagitoy a matalek nga ad-adipen ket nagbabawida iti daydiay napilida? Apay nga agbabawida? Aminda ti naglak-am iti naragsak, nabunga, ken narayray a panagbiag. Ken nakasarakda iti manayon a pabor ken Jehova!—Sal. 110:3; 148:12, 13; Prov. 20:29a; 1 Tim. 4:8b.
7 No dagiti annak ket maragpatda ti balligi iti biag, maipagpannakkel dayta dagiti nagannak. Ti naganarda iti panangsanay, disiplina, ken panangidukar kadagitoy a “tawid manipud ken Jehova” isut’ masubadan ti aglaplapusanan. (Sal. 127:3) Ania pay ti kangrunaan a maiparayag iti maysa a naganak ngem ti kinapudno a dagiti annakna a lallaki ken babbai ket agdaydayawda ken Jehova? Adu dagiti agtutubo iti moderno a tiempo ti mangsursurot iti addang da Lucas, Enoc, ken Samuel, kas iyilustrar ti maysa a surat: “Agtawenak ti 16. Nangrugiak a nagpayunir . . . siam a bulan kalpasan a nabautisaranak, ket umaw-awatak iti bendision ken Jehova manipud pay idi. . . . Ti kinapayunir ket timmulong met kaniak idiay pagadalan. Sakbayna, kanayondak a suronen dagiti kaadalak kas maysa a Saksi. Itan, agsipud ta gimmagetak nga agadal, kabaelakon a ‘sungbatan dagidiay a mangumsi kaniak.’”
8 Edukasion a Mangkabal iti Ministerio: Iti daytoy a punto mabalin a mausig ti saludsod maipapan iti edukasion. Maysa daytoy a beddeng a kasapulan iti natimbang a panangmatmat. Ti Nobiembre 1, 1992, a Pagwanawanan naglaon iti artikulo nga “Edukasion nga Addaan Panggep.” Iti baba ti subtema nga “Umdas nga Adal,” naaramid daytoy a punto: “Rumbeng a masuportaran dagiti Kristiano dagiti bagida, uray no maysada nga amin-tiempo a payunir a ministro. (2 Tesalonica 3:10-12) . . . Kasano kaadu ti edukasion a kasapulan iti maysa nga agtutubo a Kristiano tapno maraem dagitoy a prinsipio ti Biblia ken matungpalna dagiti Nakristianuan nga obligasionna? . . . Ania [ti magunggona] iti makuna nga “umdas,” . . . kadagidiay agtarigagay nga agbalin a payunir a ministro ti naimbag a damag? Kadawyan a kasapulan dagita ti paset-tiempo a trabaho tapno saanda nga agbalin a “padagsen” kadagiti kakabsatda wenno iti pamiliada.—1 Tesalonica 2:9.”
9 No ti kanayonan nga adal ket kasapulan daydiay manamnama a payunir tapno matulongan a mangsurot iti amin-tiempo a serbisio, ti Nobiembre 1, 1992, a Pagwanawanan irekomendana: “Naimbag iti biang ti agtutubo a Saksi, agingga iti mabalin, nga alaenna daytoy bayat nga agnaed iti pagtaenganda, iti kasta mataginayon ti normal nga ugali iti Nakristianuan a panagadal, pannakigimong, ken panangasaba.”
10 Manipud Africa adda kapadasan ti maysa nga agtutubo nga agtawen ti 22 a napan iti pagadalan ti panggedan, nupay ti pusona adda iti payunir a serbisio. Bayat ti kaaddana iti pagadalan, nagpalista kas auxiliary payunir. Pagang-angawan dagiti kapatadanna, a sigurado kano a matnag iti eksamen. Ti sungbatna kadakuada isut’ kanayon nga: “Birukem nga umuna iti Pagarian ti Dios ken iti kinalintegna.” Babaen ti panangdisiplina iti bagina, isut’ bumangon a nasapa iti kada bigat ken aramidenna ti dua nga oras a panagsagana iti leksionna ken makiraman idiay tay-ak ti serbisio iti malem kalpasan ti klaseda. Ti intero a pagadalan ket nagsiddaaw idi a daytoy nga agtutubo ket nakalugar a maikatlo iti espesial nga eksamen tapno mapili dagiti tallo a kalaingan nga estudiante a mangibagi ti espesial a maipaay a gunggona. Ti kumadua nga estudiante isut’ maysa nga interesado a tao nga ad-adalan iti maysa a kabsat a lalaki a payunir ti Biblia idiay pagadalan. Ti estudiante a nakalugar iti umuna isut’ maysa a sabali a naregta a Saksi nga agtutubo idiay pagadalan.
11 Aramiden Dagiti Panglakayen iti Pasetda: Dagiti panglakayen ti kongregasion, isuda a makaiparammag iti trabaho dagiti payunir, makaitedda met ti pammaregta kadagiti nagaget a ministro. Maragsakan dagiti panglakayen a mangaramid iti daytoy agsipud ta ammoda a dagiti napinget, nabunga a payunir ket bendisionda ti kongregasion. Kalpasan ti makatawen a panagserbi iti regular payunir a serbisio, dagitoy ti mabalin a maipaayan iti kanayonan a panagsanay ti Pioneer Service School. Napaneknekanen a daytoy a kurso ket napateg unay a kagawaan a pangparang-ay iti kinaepektibo dagiti payunir. Nupay dagiti payunir ket makinsangoda iti trabaho, kasapulanda met ti naayat a pammaregta, ket dagiti panglakayen isudat’ naridam a mangpunno iti dayta a kasapulan.—1 Ped. 5:1-3.
12 Kasano a maited dagiti panglakayen ti pammaregta a maipaay iti payunir a trabaho? Ti naimbag a pangrugian isu ti panangtinong no siasino dagiti makita nga adda iti napaboran a takder a makapayunir, agraman adu a masansan nga ag-auxiliary payunir, retirado a tattao, assawa a babbai, ken estudiante. Bayat nga awan ti makarikna a kasla maobligar nga agpalista, dagidiay addaan tarigagay ngem agkedkedda, ti nalabit a babaen iti bassit a praktikal a pammaregta, ket mabigbigda a ti kinapayunir ket magaw-atda.
13 Iti pannangted ti pammaregta kadagidiay agtarigagay nga agaplikar, laglagipen dagiti panglakayen a saan a kasapulan dagiti aplikante iti adu a bulbulan nga ag-auxiliary payunir sakbay nga agpalistada a regular payunir. (km 9/86 insert par. 24-26) Siempre, kayat dagiti panglakayen ti nainrasonan a panangsiguro a daytoy aplikante ket masabetna iti kasapulan nga oras.
14 Kalpasan a marepaso ti aplikasion babaen iti Komite ti Serbisio iti Kongregasion ken siaannad nga usisaen ti sekretario tapno siguruenna a nasungbatan dagiti amin a saludsod, madagdagus a maikoreo iti Sosiedad.
15 Pakaammuan ti sekretario dagiti panglakayen iti aniaman a problema dagiti payunir. Nangruna a nasken daytoy iti kongregasion nga adu dagiti payunir. Mainayon iti panangrepaso ti aktibidad dagiti payunir iti ngudo ti tawen iti serbisio, kas kiddawen ti Congregation Analysis Report (S-10), masapul nga awisen iti sekretario ti manangaywan iti serbisio nga agsabetda inton rugi ti Marso tapno kitaenda no siasino dagiti naudin a mangsabet iti ragpatenda nga oras ket kasapulanda ti asikaso. (Kitaenyo ti Marso 1993 a Ti Ministeriotayo iti Pagarian, Dagiti Pakaammo.) No ti tulong ket maipaay nga awan taktakna, mabalin a ti payunir makamakamna a kompletuen a sibaballigi iti serbisiona bayat ti tawen.
16 Dakkel a bilang dagiti baro a payunir ti agtutubo iti edad ken nabiitda pay iti pammati. Ti natulok nga espirituda ti sigurado a namagragsak kadakuada! Ngem dagitoy nga agdadamo ti agkasapulan iti panagsanay tapno mapalaingda pay ti panagbalaybalay a trabaho, agsarungkar nga epektibo, ken mangisuro iti panagadal ti Biblia. No saanda a maipaayan iti daytoy a panagsanay, ti maysa nga agdadamo ket nalabit a maupay kalpasan iti makatawen wenno nasursurok ket agtinnag ti panagsardengna iti payunir a serbisio agsipud ta saan a naimbag ti bunga iti ministeriona. Dagiti naridam a panglakayen ti makadlaw iti babassit a problema wenno panagbahada ti aktibidadda. No maited ti madagdagus nga asikaso ken matulongan ti payunir iti problemana, pagragsakanna ti adu a tawtawen iti nabunga a serbisiona.
17 Makakalapkayo Aya Kadagiti Adayo a Dandanum? Dadduma kadagiti disipulo ni Jesus ti agkalkalap. No dadduma, kalpasan iti agpatnag a panagkalap, kaskasdi nga awan ti maala dagiti iketda. (Juan 21:3) Iti dadduma a paset daytoy a pagilian a nakaaramidanen ti adu a tawtawen iti ‘panagkalap iti tattao,’ makuna dagiti dadduma a payunir a sumagmamano laengen ti “ikan” a natda iti “dandanum” ti kongregasionda. (Mat. 4:19) Maisupadi, saantayo kadi a maragsakan a makabasa iti report manipud sabsabali a pagilian a dagiti agibumbunannag ken payunir ket mangidadauloda iti adu panagadal ti Biblia? (w92 9/1 p. 20 par. 15) Ngarud, no dadduma kadagiti nagaget a payunir ket addada iti kasasaad nga umakar babaen ti bukodda a gastos iti sabali a pagilian nga adda dakkel a panagkasapulan, tinungenda koma daytoy a kadua ti sanga nga opisina sakbay nga aramidenda dayta.
18 Iti damo, nagpayunir dagiti dadduma agsipud ta ammoda a dayta ti maitutop nga aramidenda ngem agduaduada no agballigida iti dayta. Nalabit a nagaplikarda nga agpangpangadua ken dida a maigaranteya. Iti rugina, ti resulta iti serbisioda ti nalabit a kalalainganna. Inton agbayag, nupay kasta, maparang-ay ti laingda, ket adda ebidensia iti bendision ni Jehova kadagiti trabahoda. Pagtinnaganna, rumang-ay ti rag-o ken talekda. Kadagiti dadduma, ti kinapayunir isut’ maysa a bato a tukad nga umaddang iti serbisio ti Bethel, misionero a trabaho, Ministerial Training School, ken uray ti panagbaniaga a trabaho.
19 Nalabit a saan a posible kadakayo ti umakar iti sabali a lugar wenno agmisionero iti sabali a pagilian, ngem kaskasdi nga adda oportunidad a mapan agkalap ti sabali a dandanum iti mismo a pagilianyo no dayta agdama a teritoriayo ket saan unayen a nabunga. Dayta a panagakar ti agkasapulan iti panangihusto iti istilo ti panagbiagyo, ngem pudno a nagpaiduma unay iti espiritual a magunggona.—Mat. 6:19-21.
20 Wenno no ti kasasaadyo ket palubosanna, mabalinyo a tulongan dagiti kaarubayo a kongregasion iti sirkitoyo a mismo. No kualipikadokayo, ti manangaywan iti sirkitoyo ti siraragsak a mangitukon kadakayo iti maisingasing a kongregasion dita sirkitoyo a magunggonaan manipud ti sabali a payunir.
21 Dadduma a payunir ken agibumbunannag ti makabael nga agserbi a maipaay iti kasapulan ti bukodda a lugar bayat nga agintekda iti mismo a taengda. Nalabit nga ammoda ti agsao iti sabali a pagsasao. Makasarakkayo kadi dita mismo a teritoriayo iti kalalainganna a benneg ti populasion nga agsasao iti sabali a lenguahe? Adda kadi tattao nga agkasapulan iti mensahe ti Pagarian babaen iti senias a sasao? Dagidiay a makaammo iti sabali a pagsasao ti makatulong a mangdanon iti amin a kita dagiti tattao babaen ti damag iti Pagarian. Nupay daytoy ket maysa a karit, napatalgedan met a makagunggona unay.—1 Tim. 2:4; Tito 2:11.
22 No agdamakayo a mangar-aramid ti amin a kabaelanyo a mangidayaw ken Jehova, agrag-okayo iti agdama a pribilehio ti serbisioyo. No mariknayo nga ad-adu pay ti maaramidyo, idatagyo dayta ken Jehova iti kararag. Sipupudno nga tinungenyo no ania a panagbalbaliw iti kasasaad ti maipalubos nga aramidenyo. Sawenyo ti planoyo kadagiti panglakayen nga addaan iti espiritu ti panagpayunir wenno iti manangaywan ti sirkito. No naaramidyon ti nainkararagan, praktikal a desision, surotenyo dayta a madagdagus, a sitatalekkayo iti kari ni Jehova a dayawenna dagidiay a mangdayaw kenkuana.—Heb. 13:3, 6; 1 Sam. 2:30.