Palawaenyo ti Gamengyo iti Serbisio ti Pagarian
1 Inyasping ni Jesus ti namnama ti Pagarian iti napateg unay a gameng. (Mat. 13:44-46) Maipadatay aya kadagiti lallaki iti pangngarig ni Jesus a nangilako iti amin a kupkupikopanda tapno magatangda ti maysa a banag a napatpateg ti gatadna? No kasta, yun-unatay ti Pagarian ti Dios.—Mat. 6:19-22.
2 Tangay ti panagserbitayo iti Pagarian ket maysa a gameng, rumbeng a tarigagayantay a palawaen dayta. Palpalawaentay kadi ti trabahotay iti Pagarian? Mapalawatayo babaen iti pannakiraman iti trabaho a panagbalaybalay, panagsarungkar, panangidaulo iti panangyadal ti Biblia, ken impormal a panangasaba.
3 Kasanok a Mapalawa ti Pannakiramanko?: No mangrugi ti baro a tawen ti serbisio, nasayaat no repasuen ti tunggal maysa ti personal a nagapuananna ken isaludsod: ‘Mayurnosko kadi ti panawenko tapno makapag-auxiliary payunirak sagpaminsan wenno kanayon? Babaen iti bassit a panagbalbaliw, mabalinko kadi ti agserbi a kas regular payunir?’ Dagiti kabbaro a payunir manipud Setiembre 1 mabalin a mairamandanto iti Pioneer Service School inton umay a tawen.
4 Nangisaad iti personal a kalat ti sumagmamano nga agibumbunannag tapno ad-adu ti pannakiramanda iti impormal a panangasaba. Nalabit kasapulan dagiti dadduma a parang-ayen ti epektibo a panagsarungkar wenno panangirugi iti baro a panangyadal ti Biblia.
5 No madlawtayo a limitado ti ministeriotayo, aniat’ mabalintayo nga aramiden tapno mapalawa dayta? Irekomendar dagidiay nagballigin nga ikeddengtayo nga umuna a yun-una dagiti interes ti Pagarian uray aniat’ mapasamak. (Mat. 6:33) Nasken ti naan-anay a panagtalek ken Jehova. (2 Cor. 4:7) Umawag iti tulongna babaen iti kararag. (Luc. 11:8, 9) Mangnamnamatayo a bendisionanto ni Jehova dagiti reggettayo a mangpawadwad iti intay pannakiraman iti serbisiona.—1 Juan 5:14.
6 Makisaritakay iti sabsabali a sibaballigi a nangpalawa iti ministerioda. Imtuodenyo no kasano a napagballigianda dagiti lapped. Nalabit a dagiti kapadasanda maallukoynakayto a mabalin a palawaen ti ministerio.
7 No basaenyo dagiti artikulo iti Pagwanawanan wenno iti Ministeriotayo iti Pagarian maipapan iti panagserbi iti tay-ak, ikararagyo no kasano a yaplikaryo dagiti suhestion. Kasta met lat’ aramidenyo no makigimong iti kongregasion wenno makiasambleakayo. Dagiti singasing iti daytoy nga artikulo ket naibasar iti programa ti asamblea sirkito itay napan a tawen. Isu ti umuna a serye dagiti artikulo a nadisenio a mangtulong kadatayo a mangyaplikar iti pammaregta a naited iti dayta a programa.
8 Impangpangruna ni Jesus ti ministeriona. Kinunana: “Ti taraonko isu ti panangaramidko iti pagayatan daydiay nangibaon kaniak.” (Juan 4:34) Kasta met kadi ti mariknatayo? No kasta ngarud, ganetgetantayo a palawaen ti trabahotayo ken iburay “dagiti naimbag a banag” kadagiti sabsabali manipud iti pagpempenan ti gamengtayo.—Mat. 12:35; Luc. 6:45.