Baro a Programa iti Espesial nga Aldaw ti Asamblea
1 Apay a masapul nga iwaragawagtayo ti naimbag a damag nga awan sarday? Ania dagiti kasapulan ti panagbalin a manangikasaba ti naimbag a damag? Kasano a maigay-at uray dagiti managbabain wenno di matimtimek nga iranud ti naimbag a damag iti sabsabali? Masungbatan dagitoy ken dadduma pay a makagutugot-panunot a salsaludsod iti programa ti espesial nga aldaw ti asamblea a mangrugi inton Marso, iti tema a “Kualipikado a Ministro iti Naimbag a Damag.”—2 Cor. 3:5.
2 Estoriaento dagiti agtutubo ti makaparegta a kapkapadasan no kasano a nasarangetda ti panangituggod dagiti kapatadanda. Maipaayan dagiti nagannak iti naayat a pammaregta iti kasapulan a panangsanay kadagiti annakda kas ministro ti Dios. Matulongantayto amin a mangipateg iti panagkasapulan a mangasaba, a bendision kadatayo a mismo ken kadagidiay dumngeg kadatayo.—1 Tim. 4:16.
3 Sigurado a maysanto a tampok dayta nga aldaw ti bautismo. Masapul nga ipakaammo a nasaksakbay ti asinoman nga agngayangay a mabautisaran iti espesial nga aldaw ti asamblea iti mangidaulo a manangaywan tapno nawaya a mayurnos dagiti panglakayen ti panangirepaso kadagiti naikeddeng a saludsod kadagiti kandidato ti bautismo.
4 Ti kangrunaan a diskurso nga itedto ti bumisita a managpalawag ti sabali pay a tampok. Napauluan dayta iti “Kualipikado ken Nakabalan kas Ministro ti Dios.” Malawaganto dagiti uppat a kangrunaan a probision a mangkabal kadatayo kas ministro, ken saklawen ti palawag dagiti makapabileg pammati a kapadasan.
5 Agplanokayo itan a tumabuno iti intero a programa. Siguraduenyo nga awisen dagiti interesado ken estudiante ti Biblia tapno magunggonaanda met iti daytoy aldaw ti teokratiko a pannakaisuro. Iti kastoy a wagas masigurado a datayo dagiti “makaanayen a kualipikado” a ministro ti naimbag a damag.