Sirarag-o a Dayawen ni Jehova
iti Inaldaw-aldaw!
1 Ti nakaskasdaaw a langlangit ideklarada ti dayag ni Jehova iti “inaldaw-aldaw.” (Sal. 19:1-3) No dagiti awan timekna, awan angesna a parparsua ket kanayon nga idayawda ni Jehova, saan kadi a matignaytayo a nasaririt a tattao a mangipigsa iti timektayo a mangidayaw kenkuana iti amin a tiempo gapu kadagiti awan kapada a galad ken gapuananna? Siasino pay ti ad-adda a maikari iti narag-o a panangidayawtayo no di ti nadaeg a Namarsuatayo?—Sal. 145:3, 7.
2 Iti Inaldaw-aldaw: Nagsurat ti napaltiingan a salmista: “Inaldaw-aldaw nga ibagayo ti naimbag a damag ti panangisalakanna. Ta ni Jehova naindaklan ken rebbengna ti maidaydayaw unay.” (Sal. 96:2, 4) Agaplikar kadi laeng daytoy kadagiti payunir? Saan! Kayat aya a sawen daytoy a datayo amin ket masapul a makisao iti sabsabali maipapan ken Jehova iti uray kaano ken sadino no adda gundawaytayo, uray kadagiti aldaw a saantay nga agbalaybalay iti ministerio? Wen! Naganat unay ti panangidayaw ken Jehova iti inaldaw ken panangibaga iti sabsabali ti maipapan iti panangisalakanna. Masapul a maammuan dagiti tattao a ni Jehova ti Agnanayon nga Ari ken intednan ti sangalubongan a panagturay iti naipadayag nga Anakna, ni Jesu-Kristo. Ti ayattay ken Jehova ken kadagiti tattao ti mamagsao kadatayo maipapan iti daytoy a mensahe ken ti paraburna a pannakaisalakan iti uray sadino a pakasarakan iti tattao.—Sal. 71:15.
3 Kada aldaw iti naindagaan a ministeriona, intuyang ni Jesu-Kristo ti kasayaatan nga ulidan kas prangka a managdayaw ken Jehova. Kinunana: “Daydayawenka iti publiko, Ama, Apo ti langit ken daga.” (Mat. 11:25) Kas iti sinaona, sadinoman ti ayan ni Jesus, indayawna ni Jehova iti publiko. Ken sadinoman ti ayan ti bunggoy—iti sinagoga man, idiay templo ti Jerusalem, iti tapaw ti bantay, wenno iti igid ti baybay—indayawna ni Jehova. No sisisinged a surotentay ti addang ni Jesus babaen iti panangsalimetmet iti inaldaw, ti di agbalbaliw nga aktibidad iti panangitan-ok ken Jehova iti publiko, masagraptayo dagiti narag-o, naragsak a resultana.
4 Panangsungbat iti Ayab: Sungbatanyo aya ti ayab a mangidayaw iti publiko ken Jehova iti kada aldaw? Laglagipenyo, saan a lapped ti edad. Awisen ti Salmo 148:12 dagiti babbaro, babbalasang, nataengan, ken agtutubo a mangidayaw ken Jehova. Dakayo nga agtutubo, idayawyo kadi ni Jehova kadagiti kaeskuelaan ken mamaestroyo bayat ti baro a tawen a panageskuelayo? Dakayo a natataengan, maipangpangngeg aya kadagidiay katrabahuanyo iti lugar ti panggedanyo maipapan ken Jehova ken dagiti panggepna, no adda gundawayyo nga agsasarita? Agsaotay koma amin iti maipapan ken Jehova a kas paset ti biagtayo no kasano a ti panaganges ken pannangan ket pasetna. Uray di agimdeng iti sawentayo dagiti awan interesna a tattao, adda Maysa nga agimdeng, ket gunggonaannatayo.—Mal. 3:16.
5 Bayat nga umasideg ti panagngudo ti sistema, agsaknap ti ayab agingga iti ungto ti daga: “Dayawenyo ni Jah, dakayo a tattao!” (Sal. 106:1) Sapay koma ta ti pukkaw ti panagdayawtayo ket pumigpigsa iti kada aldaw nga aglabas tapno maammuanda amin daydiay Maysa nga agnagan Jehova a Kangatuan iti amin a daga.—Sal. 83:18.