Ti Sao ti Dios Mangiwanwan
1 “Agbibiagtayo iti lubong nga aduan problema ngem narasay ti solusion kadagita. Adu a milion dagiti agbisbisin. Umad-adu dagiti maidalit iti droga. Agraira dagiti pamilia a masinasina. Agdinamag dagiti agkakabagian nga agririnnames ken kinaranggas iti pamilia. Main-inut a masabsabidongan ti ang-angsentayo ken in-inumentayo. Sa, umad-adut’ mabikbiktima kadatayo gaput’ krimen.”
2 Kasta ti panangirugi ti libro a Ti Biblia—Saot’ Dios wenno iti Tao? Ti introduksionna ket ad-adda a naintiempuan ita ngem idi a naipablaak ti libro pito a tawenen ti napalabas. Nasken a maammuan dagiti tattao a ti Sao ti Dios mangiwanwan ken mangipaay kadagiti solusion iti amin a problema a mangparparigat kadakuada. Ikagumaantayo a tulongan dagiti tattao iti Disiembre babaen ti panangitukon kadakuada iti New World Translation ken ti libro a Ti Biblia—Saot’ Dios wenno iti Tao? Siempre, ti panangibati iti literatura ket pangrugian laeng. Masapul a sumarungkartayo nga addaan kalat a mangirugi iti panagadal iti Biblia. Manamnamatayo ti tulong no reggetantayo dayta. (Mat. 28:19, 20) Adtoy ti sumagmamano a maisingasing a presentasion:
3 No makasarakkayo iti nataengan, mabalinyo nga ipadas daytoy:
◼ “Maisaludsodko: Idi agtutubokayo, kasano ti pannakilangen dagiti tattao iti maysa ken maysa iti komunidad? [Palubosanyo a sumungbat.] Naiduma unay itan dagiti bambanag, saan kadi? Ania ti pagarupyo a makagapu? [Palubosanyo a sumungbat.] Kinapudnona, makitkitatayon ti kaitungpalan ti maysa a padto iti Biblia. [Basaenyo ti 2 Timoteo 3:1-5.] Malaksid iti daytoy, ikari ti Biblia ti nasaysayaat a lubong iti asidegen a masakbayan. Dayta ti gapuna a parparegtaenmi ti tunggal maysa nga agbasa iti Biblia. Nadlawyo kadi a nakalawlawag dagiti sao a naaramat iti daytoy a Biblia, ti New World Translation, a binasak?” Ilawlawagyo a naisurat daytoy iti moderno nga Ingles. Ipakitayo ti libro a Ti Biblia—Saot’ Dios wenno iti Tao? ken iturongyo iti kapitulo 10, a mangilawlawag iti sabali pay a padto a makitkitatayo a matungtungpalen. Itukonyo ti Biblia ken ti libro.
4 No sarungkaranyo ti maysa a nataengan a napaimaanyo iti Biblia ken libro, mabalinyo a kunaen:
◼ “Iti napalabas a panagsaritatayo, naganamongantayo a nagrakayan ti moderno a kagimongan no maidilig iti kasasaad ti biag iti sumagmamano laeng a napalabas a tawen. Nupay kasta, kayatko nga ipakita kadakayo nga ikarkari ti Biblia ti adayo a nasaysayaat a lubong iti masanguanan. [Basaenyo ti Apocalipsis 21:3, 4.] Daytoy ti mangparegta kadatayo a mangusig no ania pay ti kuna ti Biblia.” Luktanyo ti libro a Saot’ Dios iti kapitulo 14 ket basaenyo ti parapo 3-4. Itukonyo ti libre a panagadal iti Biblia iti pagtaengan.
5 No makasaoyo ti maysa nga agtutubo, mabalinyo a kunaen:
◼ “Kayatka a saludsodan: Kas agtutubo, iti panagkunam adda kadi panggapuam a manginanama iti masanguanan? Ania ngata ti adda iti masanguanan? [Palubosanyo a sumungbat.] Makaparagsak ta adda pudno a panggapuantayo a manginanama iti masakbayan. [Basaenyo ti Salmo 37:10, 11.] Tangay nagduduma ti panangmatmat dagiti tao iti Biblia, impablaakmi daytoy a libro, Ti Biblia—Saot’ Dios wenno iti Tao? Imutektekam dagiti rason nga ipaayna no apay a basaentayo ti Biblia. [Basaenyo ti parapo 16-17 iti panid 10-11.] No makombinsirtayo a pudno ti Biblia, addaantayo iti natalged a namnama iti masanguanan. Ragsakek nga ibati kenka daytoy a libro babaen ti bassit a kontribusion.”
6 No sarungkaranyo ti maysa nga agtutubo a nangala iti libro a “Saot’ Dios,” mabalinyo a rugian babaen ti panangikuna iti kastoy:
◼ “Naragsakanak a nakangngeg a maseknanka iti masakbayan. Mabalin a malagipmo pay nga adda impakitak kenka a teksto iti Biblia a mangikarkari kadatayo iti naragsak ken natalged a masakbayan. Adtoy ti sabali pay. [Basaenyo ti Apocalipsis 21:3, 4.] Mangipaay ti libro nga imbatik kenka iti makapnek a pammaneknek a ti Biblia ket Sao ti Dios, saan nga iti tao. Imutektekam no kasano nga apektarannatayo daytoy. [Basaenyo ti parapo 1-2 iti panid 184-5.] No kayatmo, maragsakanak a pagadalanta ti Biblia nga awan bayadna.” No kayatna ti agadal, damagenyo no adda Bibliana. No awan, itukonyo ti New World Translation.
7 Ti tao a dina ammo no sadino ti pagpaiwanwananna tapno mapagballigian dagiti parikut iti biag mabalin a mangipangag babaen iti kastoy a wagas ti pannakisarita:
◼ “Agbibiagtayo iti tiempo a gistay amin ket mapasanguan kadagiti serioso a problema. Adu dagiti agturong iti amin a kita dagiti mammagbaga tapno agpaiwanwan. Sadino ti pagarupyo a pakasarakan iti nasimbeng a balakad a pudno a pakagunggonaantayo? [Palubosanyo a sumungbat.] Ipakita ti Biblia a kasapulantayo ti pannarabay.” Basaenyo ti Jeremias 10:23. Ukagenyo Ti Biblia—Saot’ Dios wenno iti Tao? iti panid 187 ken basaenyo ti parapo 9. “Tulongannakayo daytoy a libro a mangipateg no kasanonto a mapunas dagiti amin a problematayo iti sidong ti Pagarian ti Dios.” Itukonyo ti libro.
8 No iti damo nga isasarungkar ket nagsaritaanyo ti maipapan iti panagkasapulan ti tao iti pannarabay, mabalinyo nga ituloy ti saritaan iti panagsubliyo babaen ti panangikuna iti kastoy:
◼ “Idi damo a nagam-ammotayo, naganamongantayo a masapul nga agpaiwanwantayo iti Dios tapno mapagballigian dagiti parikut iti biag. Maipanggep iti dayta, panagkunak magustuanyo ti panggibus a komento iti libro a naibatik kadakayo. [Basaenyo ti parapo 12-13 iti panid 189 iti libro a Saot’ Dios.] Ragsakek nga itukon kadakayo ti libre a panagadal iti Biblia iti pagtaenganyo, ket nakasaganaak a mangidemostra iti dayta ita.”
9 Bendisionan ni Jehova ti panagreggettayo a tumulong kadagiti nataengan ken agtutubo a mangapresiar iti pateg ti Sao ti Dios ken iti panangiwanwanna iti biagtayo.—Sal. 119:105.