“Ipakitayo a Managyamankayo”
1 Nasanay ti kaaduan kadatayo manipud kinaubing a mangibaga iti “pangngaasim” ken “pagyamanan” no adda nangipakita kadatayo iti kinaimbag. Balakadannatayo ni Pablo a kanayon nga ‘agyamantayo,’ ket nangnangruna nga agyamantayo koma ken Jehova. (Col. 3:15, 16) Ngem kasanotay a maipakita ti panagyamantayo iti Naindaklan a Namarsua kadatayo? Ken ania dagiti makagapu nga agyamantayo kenkuana?
2 Insurat ni apostol Pablo: “Pagyamanan iti Dios, ta itedna kadatayo ti balligi babaen ken Apotayo a Jesu-Kristo!” (1 Cor. 15:57) Iti tinawen a Memorial, mapalagipantayo iti aglaplapusanan nga ayat nga impakita ti Dios ken ni Kristo iti panangipaayda iti subbot. (Juan 3:16) Yantangay napasaranen ti kaaduan kadatayo ti natayan kadagiti patpatgen, anian a yamantayo iti kari ni Jesus a panagungar! Malapunos ti pusotayo iti panagyaman no panunotentayo ti namnama a makalasat iti panungpalan daytoy a sistema ket pulos a dinto matayen. (Juan 11:25, 26) Narigat ti bumirok iti sasao a pangyebkas iti panagyaman iti adu a nakaskasdaaw a bendision a masagraptayto pay iti masungad a Paraiso a daga. (Apoc. 21:4) Adda kadi pay nasaysayaat a rason ti siasinoman nga ‘agyaman’ iti Dios?
3 No Kasano nga Ipakita ti Panagyaman iti Dios: Kanayon a maitutop nga iyebkas babaen ti kararag ti panagyamantayo ken Jehova gapu iti kinaimbagna. (Sal. 136:1-3) Matignaytayo met a mangipakita iti panagyaman kenkuana iti dadduma pay a nasayaat a pamay-an. Kas pagarigan, sigurado a tumabunotayto inton Domingo, Marso 23, iti Panglaglagip iti ipapatay ni Kristo. Pagragsakantayo a ‘pagdayaw ken Jehova ti kukuatayo’ tapno tumulong a mangpaadda kadagiti material a kasapulan ti lokal a kongregasion ken iti sangalubongan a trabaho. (Prov. 3:9) Naan-anay a suportarantayo dagiti panglakayen ken makikooperar kadakuada, iti kasta maipakitatayo ti panagyaman ken Jehova iti tulong nga ipapaayna baeten kadakuada. (1 Tes. 5:12, 13) Inaldaw nga ikagumaantayo a taginayonen ti natakneng a kababalin a pakaidayawan ti nagan ti Dios. (1 Ped. 2:12) Maay-ayo ni Jehova kadagitoy a pammaneknek ti panagyamantayo.—1 Tes. 5:18.
4 Ti Kasayaatan a Panangipakita iti Panagyamantayo: Mairaman kadagiti kasayaatan a panangipakita iti naimpusuan a panagyaman iti Namarsua kadatayo ti amin-kararua a pannakiraman iti trabaho a panangikasaba iti Pagarian, panangidaydayaw iti nagan ni Jehova, panangyebkas iti panagyaman iti kararag, ken sisusungdo a panangidepensa iti kinapudno. Maragsakan ni Jehova a makakita kadatayo a mangipaay iti sagrado a panagserbi a maitunos iti pagayatanna a “maisalakan koma dagiti amin a kita ti tattao.” (1 Tim. 2:3, 4) Dayta ti gapuna a nakaad-adu dagiti agibumbunannag a mangipangpangag iti awis nga agparang iti Pebrero a Ti Ministeriotayo iti Pagarian nga ag-auxiliary pioneer iti maysa a bulan wenno nasursurok pay iti Marso, Abril, ken Mayo. Makapagpayunirkayo kadi iti Abril? iti Mayo?
5 No matungpalen ti namnamatayo nga agbiag nga agnanayon, ad-adunto pay ti panggapuantayo nga agtultuloy nga agyaman a sirarag-o ken Jehova.—Sal. 79:13.