Dagiti Gimong Manggutugot iti Nasayaat nga Ar-aramid
1 Ti dua a napateg a paset ti panagdayawtayo isu ti itatabuno kadagiti gimong ti kongregasion ken pannakiraman iti tay-ak ti serbisio. Agdangdanggayda a dua. Adda impluensia dagitoy iti maysa ken maysa. Dagiti Nakristianuan a gimong iparegtada ti nasayaat nga ar-aramid, a ti kasayaatan kadagitoy ket ti trabaho a panangikasaba iti Pagarian ken panagaramid iti adalan. (Heb. 10:24) No isardengtay ti tumabuno kadagiti gimong, di agbayag nalabit sumardengtayon a mangasaba gapu ta saantay a magutugot a mangaramid iti dayta.
2 Kadagiti linawas a gimong, umawattayo iti naespirituan nga instruksion a nairanta a mangtignay kadatayo a mangasaba. Naynay a maipagpaganetget ti kinaganat ti tiempo, nga isu ti mangtignay kadatayo a mangidanon iti makaited-biag a mensahe ti Biblia kadagiti sabsabali. Maparparegta ken mapabpabilegtayo nga agan-anus iti trabaho a panangasaba. (Mat. 24:13, 14) Babaen ti pananggundaway kadagiti oportunidad nga agkomento kadagiti gimong, ad-adda a masanaytayo a mangyebkas iti pammatitayo iti imatang ti sabsabali. (Heb. 10:23) Babaen ti panagpasalista iti Teokratiko nga Eskuelaan ti Panagministro, masanaytayo nga agbalin nga ad-adda nga epektibo a ministro ken lumaingtayo a mangisuro.—2 Tim. 4:2.
3 No Kasano a Dagiti Gimong ti Serbisio Paregtaendatayo a Mangasaba: Maparegtatay amin a mangsukimat a nasaksakbay kadagiti material iti Ministeriotayo iti Pagarian. Kalpasanna maimaldit daytoy nga impormasion iti panunottayo bayat a tumabunotayo iti Gimong ti Serbisio ken maimatangantayo dagiti presentasion a maidemostra iti plataporma. No addatayo iti tay-ak ti serbisio, mabalintay a lagipen ti Ministeriotayo iti Pagarian, dagiti presentasion a naidemostra, ket iti kasta ad-adda nga epektibo ti panangasabatayo. Daytoy ti napadasanen ti adu nga agibumbunannag.
4 Kas pangsurnad kadagiti Gimong ti Serbisio, dadduma makitulagda kadagiti sabsabali tapno makapagkakaduada iti ministerio. Silalagip dagiti agibumbunannag kadagiti punto a maaramatda iti tay-ak ket magutugotda a mangpadas kadagitoy gapu ta dagitoy a gimong paregtaenna ida a makiraman iti trabaho a panangasaba iti kada lawas.
5 Awan maisandi kadagiti Nakristianuan a gimongtayo, a sadiay makalangentayo dagiti padatay nga agdaydayaw ken pakagutugotantayo kadagiti nasayaat nga aramid. Tapno rumang-ay ti ministeriotayo, masapul a regular a tumabunotayo kadagiti gimong ti kongregasion. Ipakitatay koma ti apresasiontayo iti daytoy nakaskasdaaw a probision ni Jehova a “saantay a baybay-an ti panagtataripnongtayo a sangsangkamaysa.”—Heb. 10:25.