Tumulong iti Nasaknap a Panagiwaras iti Kingdom News No. 35
1 Okupadotayto amin iti bulan ti Oktubre ken Nobiembre. Iti umuna a 11 nga aldaw ti Oktubre, agitukontayo kadagiti magasin a Pagwanawanan ken Agriingkayo! Kalpasanna, manipud iti Domingo, Oktubre 12, agingga iti Domingo, Nobiembre 16, makidanggaytayo iti sangalubongan a panagiwaras iti Kingdom News No. 35. Pribilehiotayto nga idanon ti napateg a mensahe kadagiti amin a tattao iti lugartayo. Dayta ti sungbat iti saludsod nga, “Addanto Ngata Tiempo nga Agiinnayat Amin a Tattao?” Kabayatan daytoy naisangsangayan a kampania, agiwarastayo iti Kingdom News No. 35 kadagiti aldaw ti lawas. Kadagiti ngudo ti lawas, malaksid pay iti panagitukon iti Kingdom News, itampoktayo dagiti agdama a ruar ti magasin.
2 Siasino ti Mabalin a Makiraman? Kas gagangay, dagiti panglakayen ti mangidaulo iti trabaho. Maragsakantayo amin nga agiwaras iti Kingdom News, ket awan duadua a nakaad-adunto ti agibumbunannag nga ag-auxiliary pioneer iti maysa wenno dua a bulan kabayatan ti kampania. Dagiti dadduma nga agibumbunannag kalikagumanda ti mangbusbos iti ad-adu nga oras iti ministerio ngem iti gagangay.
3 Adda kadi iyad-adalanyo iti Biblia a nabayagen nga agad-adal iti libro a Pannakaammo ken dandanin makualipikar a makiraman iti tay-ak ti serbisio? Nalabit ikamakamnan ti agbalin a di nabautisaran nga agibumbunannag tapno makiraman iti kampania ti Kingdom News. Simple laeng a presentasion ti kasapulan iti panangiparang iti tract. Kas pagarigan, mabalin a kunaen ti maysa: “Nakapatpateg daytoy a mensahe isu nga iti daytoy a bulan maiwarwaras daytoy iti sangalubongan iti 169 a pagsasao. Kayatko a maaddaankayo iti personal a kopiayo.” Uray dagiti ubbing mabalinda ti makiraman iti daytoy makaparagsak a trabaho.
4 Dagiti konduktor iti panagadal ti libro masapul a paregtaenda amin a miembro ti grupoda a makiraman a naan-anay iti panagiwaras iti Kingdom News No. 35. Nalabit adda met dagiti agibumbunannag a nagbalin a di aktibo ngem mabalin nga agaktiboda manen iti serbisio no adda mangparegta kadakuada. Sakbay ti kampania, rumbeng a sarungkaran dagiti panglakayen ti tunggal maysa kadagitoy tapno makitada no ania ti maaramidan tapno matulongan ida a makikadua kadagiti aduan kapadasan nga agibumbunannag iti daytoy a paset ti ministerio.
5 Kaanotayo nga Agtataripnong Para iti Serbisio? Amin daytoy a trabaho kalikagumanna dagiti kombeniente ken praktikal nga urnos iti grupo a panangasaba. No mabalin, maorganisar koma dagiti taripnong para iti serbisio iti kada aldaw iti tengnga ti lawas, kadagiti ngudo ti lawas, ken iti rabii. Rumbeng a maangay dayta kadagiti tiempo a mangipaay iti gundaway kadagiti agibumbunannag ken payunir a mangaprobetsar a naan-anay iti tiempo ti panangasaba. Mabalin met a mayurnos ti panagtataripnong iti mumalmalemen tapno mabenepisiaran dagiti ages-eskuela, dagiti makirelreliebo a trabahador, ken dadduma pay. Siguraduen koma ti manangaywan iti serbisio nga addan nawadwad a teritoria iti binalaybalay ken iti lugar ti negosio tapno mabalintay amin ti makiraman a naan-anay iti trabaho. Iti lugar nga adu ti agibumbunannag, utobenda koma no mano ti agtrabaho iti maysa a paset ti teritoria.
6 Dagidiay Ngay Awan Kadagiti Pagtaenganda? Kalikagumantayo nga ad-adu koma a tattao ti makasaritatay a personal tapno ilawlawagtayo no apay a rumbeng a basaenda ti Kingdom News No. 35. Gapuna no awan madanonyo iti pagtaengan, isuratyo ti direksion ket sumublikayo iti sabali nga oras. No diyo latta madanon dagitoy a bumalay agingga iti maudi a lawas ti kampania, mabalinyo ti mangibati iti Kingdom News iti ruangan iti lugar a di makita dagiti aglabas. Kadagiti lugar a pagnaedan, alibtakanyo nga itukon ti Kingdom News kadagidiay magmagna iti lansangan. No tartrabahuenyo dagiti aw-away ken no adu unay ti teritoria ket saan a maileppas kabayatan ti kampania, mabalin ti mangibati iti Kingdom News iti damo nga ibibisita kadagiti pagtaengan a diyo nadanon ti bumalay.
7 Aniat’ Panggeptayo? Ikagumaan koma dagiti kongregasion nga usaren amin dagiti abastoda a Kingdom News a mangsaknap iti amin a teritoriada sakbay nga agngudo ti kampania inton Nobiembre 16. No medio nalawa ti teritoria ti kongregasionyo ken no natalged ti agtrabaho nga agmaymaysa imbes nga adda kaduana, nalabit makitayo a praktikal nga aramiden ti kasta. Makatulong daytoy kadakayo tapno ad-adu dagiti maikari a tattao a mapakaammuanyo iti naimbag a damag. (Mat. 10:11) Nalabit nasayaat no iggemyo ti sumagmamano a tract ken ikabilyo ti Biblia iti bassit a bag, imbes nga agusar iti dakkel a bag. Siguraduenyo ti mangsalimetmet iti nasayaat a rekord kadagidiay pakasarakanyo iti interes.
8 Nakasaganakayo Kadin a Mangrugi? Rumbeng a panunoten a nasakbay dagiti panglakayen no mano ti kanayonan a magasin a kasapulan ti kongregasion ken agpedidoda koman. Saan a kasapulan nga agpedido iti Kingdom News No. 35, yantangay addan naipatulod iti kada kongregasion. Kadagidiay umdas ti teritoriada, 250 a kopia ti iwaras ti tunggal special, regular, ken auxiliary pioneer, idinto ta 50 a kopia ti maited kadagiti agibumbunannag. Adu ti trabaho nga aramidentayo. Magagarankay kadi a makiraman iti daytoy makaparagsak a trabaho? Awan duadua a magagarankayo. Tumulongtay koma iti inggat’ kabaelantayo iti kasaknapan a pannakaiwaras ti nagpateg a naibatay-Biblia a mensahe iti Kingdom News No. 35!