Tagiragsakenyo ti Mangted iti Naan-anay a Panangsaksi
1 Pagragsakantay amin nga aramiden dagiti bambanag a nasayaat ti panangitungpaltayo. Kuna ti Marcos 7:37 a kastoy ti imbaga ti adu a tattao maipapan ken Jesus: “Naimbag ti panangaramidna kadagiti isuamin a bambanag.” Di pakasdaawan a tinagiragsak ni Jesus ti panagaramidna iti pagayatan ni Jehova! (Idiligyo ti Salmo 40:8.) Babaen ti panangpampanunot kadagiti sumaganad a singasing, makapagrag-otay met bayat a tungpalentayo ti bilin ni Jesus ‘a mangasabatayo kadagiti tattao ken mangipaay iti naan-anay a pangsaksi.’ (Ara. 10:42) Iti Enero itukontayo ti aniaman a 192-pinanidna a libro a naipablaak sakbay ti 1985 nga adda iti kongregasion wenno ti libro nga Agbiag nga Agnanayon. Kasanotay nga usaren dagitoy a publikasion a mangted iti naan-anay a panangsaksi?
2 Yantangay masansan a maseknan ti tattao maipapan kadagiti isyu a mainaig iti salun-at, mabalin a kastoy ti ibagayo:
◼ “Nupay adda dagiti napateg a nagapuanan iti tay-ak ti medisina, nakaad-adu ti agsagsagaba gapu iti sakit. Panagkunayo, apay a kastoy? [Palubosanyo a sumungbat.] Kinuna ni Jesu-Kristo a ti angol ket paset ti pagilasinan kadagiti maudi nga al-aldaw. (Luc. 21:11) Ngem deskribiren met ti Biblia nga addanto tiempo a maawan ti sakit. [Basaenyo ti Isaias 33:24.] Kitaenyo no kasano a daytoy a libro parayrayenna ti namnama iti dayta a pamunganayan a pannursuro ti Biblia.” Mangitampok kadagiti maitutop a komento iti libro nga ipakpakitayo sa itukonyo iti gagangay a kontribusion.
3 No mangaskasabakayo a di pormal kadagiti asideg ti pagtagilakuan, mabalin a kumablaawkayo sa isaludsodyo:
◼ “Madlawyo kadi a nguminngina unay dagiti gagatangen kadagitoy nga aldaw ken narigaten a bennaten ti matgedan? [Palubosanyo a sumungbat.] Panagkunayo addanto pay ngata tiempo a pudno a natalgedton ti ekonomia?” [Palubosanyo a sumungbat.] Kalpasanna mangitampok iti maitutop a Kasuratan a naadaw iti libro nga ituktukonyo. Sa ituloyyo a kunaen: “Ipakita daytoy a libro no kasano a risuten ti Dios, babaen iti Pagarianna, dagiti parikut a mangparparigat unay iti panagbiag kadagitoy nga aldaw.” Itukonyo ti libro iti gagangay a kontribusion. Mabalin nga ibagayo a tinagiragsakyo unay ti panagsaritayo, sa isaludsodyo: “Adda kadi pamay-an tapno maitultuloytanto daytoy a panagsaritata?” Iti kastoy a wagas mabalin a maalayo ti numero ti telepono dayta a tao wenno ti direksion ti pagtaenganna.
4 Mabalin nga adda gundawayyo a mangpadas iti daytoy a presentasion maipapan iti sangalubongan a talna, nga usarenyo ti libro nga “Agbiag nga Agnanayon”:
◼ “Panagkunayo, apay a nakarigrigat a ragpaten ti sangalubongan a talna? [Palubosanyo a sumungbat, kalpasanna ipakitayo ti ilustrasion iti panid 20-1.] Ladawan daytoy ti pasamak iti Biblia a nadeskribir iti Apocalipsis. [Basaenyo ti Apocalipsis 12:7-9, 12, iti mismo a parapo 17. Kalpasanna basaenyo ti kapsion nga adda iti ladawan.] Ti kinaawan talna ditoy lubong ket maysa kadagiti epekto ti pannakaigarangugong ti Diablo ditoy daga. Sungbatan daytoy a libro ti adu a napapateg a saludsod, ket maragsakanak a mangitukon kenka.” [Dakamatenyo ti kontribusion.]—Tapno maammuanyo ti dadduma pay a wagas a panangitukon iti libro nga Agbiag nga Agnanayon, kitaenyo ti makinlikud a panid ti Setiembre 1995, Pebrero 1995, Setiembre 1994, Setiembre 1993, a ruar Ti Ministeriotayo iti Pagarian.
5 No sublianyo dagidiay mangipakita iti interes, maikagumaanyo nga irugi ti panagadal iti Biblia babaen ti panangsurotyo iti daytoy a metodo:
◼ “Iti daydi naudi a panagsaritata, adda nadakamatmo a makapainteres unay a kapaliiwan. [Dakamatenyo ti komento ti indibidual.] Pinampanunotko dayta, ket kayatko nga iburay dagiti resulta ti panagsukimatko maipapan iti dayta a tema. [Mangdakamatkayo iti maitutop a kasuratan.] Itukonmi nga idaulo ti libre a panagadal a nakatulongen iti minilion a tattao a mangsukimat kadagiti pamunganayan a pannursuro ti Biblia iti ababa a tiempo. Ti kasta a panagsukimat mapatanorna ti panagtalekyo iti sigurado a pannakatungpal dagiti kari ti Dios.” Mangitampok iti sumagmamano a saludsod a masungbatanto. No agkedked iti naitukon a panagadal iti Biblia, ilawlawag nga addaantay met iti naisangsangayan ken napapartak a kurso nga agpaut laeng iti 15 minuto iti kada lawas iti las-ud ti 16 a lawas. Ipakitayo ti broshur a Kalikaguman, iturongyo iti leksion 1, sa isaludsodyo no mabalinyo nga idemostra ti umuna a leksion.
6 Laglagipenyo ti Agusar Kadagiti Handbill: Mabalin a mausar dagitoy a sieepektibo iti introduksionyo a mangparayray iti interes kadagiti naespirituan a banag, wenno mabalin nga itukon no dida awaten ti literatura. No aginteres, usarenyo ti nayimprenta a mensahe iti likudan ti handbill a mangparegta iti tao a mangawat iti panagadal iti Biblia iti pagtaengan ken tumabuno kadagiti gimongtayo.
7 Agbalinkayo a nasigo iti trabahoyo, ket pagrag-oanyonto dayta. Ganetgetanyo ti mangasaba a naan-anay, ket tagiragsakenyo ti naimbag a magapuananyo iti amin a benneg ti ministerio.—1 Tim. 4:16.