No Epektibo, Usarenyo!
1 Ti Ministeriotayo iti Pagarian di agsarday a mangipapaay kadatayo iti nadumaduma a naisingasing a presentasion nga usarentayo iti ministerio. Ipaayannatayo daytoy kadagiti baro nga ideya no kasano a gutugoten ti interes iti mensahe ti Pagarian. Nalabit ikagkagumaanyo a sursuruen ti maysa wenno ad-adu pay kadagitoy a presentasion iti kada bulan. Nupay kasta, nalabit mapaliiw ti dadduma nga agibumbunannag a kalpasan ti sumagmamano a daras a panangusarda iti maysa kadagita, adda manen dagiti baro a presentasion nga ipaay ti sumaganad a ruar Ti Ministeriotayo iti Pagarian. Nabatad a saan nga amin ket kabaelanda a sursuruen ti baro a presentasion a dida pay kabesado ti immun-una.
2 Siempre, addada rinibu a payunir ken dadduma pay nga agibumbunannag a mangbusbusbos iti adu a tiempo iti tay-ak ti serbisio. Maysa pay, adu ti kongregasion a makawanas iti intero a teritoriada iti sumagmamano laeng a lawas. Iti kakasta a kasasaad, apresiaren dagiti agibumbunannag no adda dagiti baro a wagas ken ideya iti panangisango iti mensahe. Daytoy ti tumulong kadakuada a mangparang-ay iti laingda. Pagbalinenna met ti ministerioda nga ad-adda a makapainteres ken nabunga ken tumulong kadakuada a mangsango kadagiti sumangbay a karit.
3 Iti aniaman a kasasaad, no adda presentasionyo nga epektibo a pangsukay iti interes, usarenyo latta! Saan a nasken nga isardengyo nga usaren ti epektibo a presentasion no nasayaat ti resultana. Ibagayyo laengen iti literatura a tukon iti dayta a bulan. Bayat a repasuenyo dagiti naisingasing iti Ministeriotayo iti Pagarian, kitaenyo dagiti makapainteres a punto a nalabit kayatyo nga inayon iti presentasionyo.
4 Gapuna inton umawatkayo iti baro a ruar Ti Ministeriotayo iti Pagarian, laglagipenyo a singasing laeng dagiti presentasion a linaonna. No mausaryo dagita, nasayaat. Ngem no addan us-usarenyo a presentasion nga epektibo iti teritoriayo, usarenyo dayta! Ti napateg ket ‘naan-anay nga itungpalyo ti ministerioyo’ iti nasayaat a wagas, a birokenyo dagiti maikari ken tulonganyo ida nga agbalin nga adalan.—2 Tim. 4:5.