Epektibokayo Koma iti Ministerioyo

¹ Simmipnget ti tangatang, ket pumigpigsa ti nakaam-amak a daranudor nga uray la makatitileng. Bimmaba ti kasla asuk nga ulep. Ania dayta? Pangen dagiti minilion a dudon a naan-anay a mamaglangalang iti daga! Daytoy a buya a dineskribir ni propeta Joel ket adda kaitungpalanna itatta iti trabaho a panangasaba dagiti napulotan nga adipen ti Dios ken dagiti kakaduada, ti dakkel a bunggoy.

² Kuna Ti Pagwanawanan a Mayo 1, 1998, panid 11, parapo 19: “Ti buyot dagiti dudon ti Dios iti agdama a panawen naan-anay a nangasabada ‘iti ili’ ti Kakristianuan. (Joel 2:9) . . . Kalkalay-atenda pay laeng amin a bangen, serserkenda dagiti minilion a balay, as-asitganda dagiti tattao iti lansangan, makisarsaritada kadakuada iti telepono, ken kasaoda ida iti aniaman a posible a pamay-an bayat nga iwarwaragawagda ti mensahe ni Jehova.” Saan aya a naindaklan a pribilehio ti makiraman iti daytoy trabaho nga impaannong ti Dios?

³ Saan a kas kadagiti literal a dudon, a mangan laeng ti panggepda, datayo kas ad-adipen ni Jehova maseknantayo unay iti biag dagidiay kaskasabaantayo. Kayattayo a tulongan dagiti sabsabali tapno maammuanda dagiti nadayag a kinapudno a linaon ti Sao ti Dios ken tapno matignayda a mangaramid kadagiti addang a mangiturong iti agnanayon a pannakaisalakanda. (Juan 17:3; 1 Tim. 4:16) Gapuna, kayattayo nga epektibo koma ti panangitungpaltay iti ministeriotayo. Aniaman a metodo ti maaramat iti panangasaba, usigentayo koma no ar-aramidentayo met laeng dayta iti wagas ken iti tiempo a mangibunga kadagiti kasayaatan a resulta. Yantangay “ti buya daytoy a lubong agbaliwbaliw,” nasayaat unay nga usigentay dagiti metodo ken wagastayo tapno sigurado a mapagballigiantay ti karit iti panagbalin a nabunga inggat’ mabalin.​—1 Cor. 7:31.

⁴ Nupay ikagumaantayo a kasarita dagiti tattao iti adu a pamay-an, ti trabaho a panagbalaybalay isu pay laeng ti kangrunaan a paset ti ministeriotayo. Masansan aya a diyo madandanon dagiti tattao iti pagtaenganda wenno maranaanyo ida a matmaturog? Anian a makapaupay dayta tangay diyo maiburay kadakuada ti mensahe ti naimbag a damag! Kasanoyo a mapagballigian daytoy a karit?

⁵ Mannakibagay ken Nainkalintegankayo Koma: Idiay Israel idi umuna a siglo, iti rabii ti panagkalap dagiti mangngalap. Apay nga iti rabii? Nupay narigat daytoy kadakuada, dayta ti kasayaatan a tiempo a panagala iti adu nga ikan. Dayta ti tiempo a kaaduan ti makalap. Maipapan iti daytoy, kinuna Ti Pagwanawanan a Hunio 15, 1992: “Rebbeng met nga adalentayo ti teritoriatayo tapno mapantayo agdaklis, no ar-arigen, inton ti kaaduan kadagiti tao ket addada idiay pagtaengan ken umawatda.” Ti naannad a panangpaliiw kadagiti nakayugalian ti kagimongan iti dadduma a pagilian ipakitana nga iti adu a lugar, nupay addada tattao a madanontayo iti pagtaengan kadagiti agsapa ti Sabado ken Domingo, masansan a di nasayaat ti reaksionda iti ibibisitatayo iti dayta a tiempo. No kastoy ti kasasaad iti lugaryo, mabalinyo kadi nga ipapaaldaw ti oras a panangasabayo wenno ipamalemyo pay ketdi? Nasayaat daytoy a pamay-an tapno maparang-aytay ti kinaepektibo ti ministeriotayo ken tapno maipakitatay ti konsiderasion kadagiti kaarrubatayo. Maysa dayta a pakakitaan ti pudno a Nakristianuan nga ayat.​—Mat. 7:12.

⁶ Iti Filipos 4:5, palagipannatayo ni apostol Pablo a ‘maammuan koma dagiti isuamin a tattao ti kina-nainkalintegantayo.’ Maitunos iti daytoy naipaltiing nga instruksion, kayattayo ti agbalin a natimbeng ken nainkalintegan kadagiti metodotayo bayat nga itungpaltay ti annongentayo a mangasaba buyogen ti regta ken kinarayray. Ditay kayat a ‘medmedan ti mangisuro iti publiko ken iti binalay-balay,’ no di ket kayattayo a siguraduen nga aramidentay ti ministeriotayo iti binalaybalay kadagiti tiempo a maiparbeng ken nabunga. (Ara. 20:20) Kas kadagidiay mangngalap iti Israel idi umuna a siglo, maseknantay a mangirana iti ‘panagkalaptayo’ kadagiti tiempo nga ad-adda a nabunga, saan nga iti tiempo a kombeniente unay kadatayo.

⁷ Aniada a panagbalbaliw ti mabalin nga aramiden kadagiti lugar a di kayat dagiti tattao ti makasabaan iti bigbigat? Dadduma a panglakayen inyurnosda ti pannakiraman dagiti kakabsat iti sabsabali a porma ti ministerio, kas ti panangasaba iti lansangan, lugar ti negosio, wenno panagsarungkar, sakbay nga agbalaybalayda. Dagiti dadduma a kongregasion impapaaldawda ti oras ti taripnong a maipaay iti panangasaba, wenno iti agmatuon pay ketdin. Kalpasanna, agbalaybalaydan a dagus sadanto agsardeng sakbay a mumalem. Iti dadduma a teritoria, nalabit kalpasan ti pangngaldaw ti kasayaatan a panagtataripnongda a maipaay iti panangasaba, imbes nga iti agsapa. Mabalin a makatulong unay dagita a panagbalbaliw tapno ad-adda a nabunga ti trabaho a panagbalaybalay.

⁸ Mannakaawat ken Nataktikatayo Koma: No kasaritatay dagiti tattao iti binalaybalay, nagduduma ti reaksionda iti mensahetayo. Sidadaan nga umawat ti dadduma a bumalay, di mangikankano ti dadduma, ken addada dagiti mannakisupiat wenno mannakiapa. No adda makisupiat, palagipannatayo ti panid 7 ti Panakirinnason Manipud kadagiti Kasuratan a ditay kalkalikaguman ti ‘makiinnabak iti supiat’ “kadagidiay awan panagraemda iti kinapudno.” No bumusor ti bumalay, nasaysayaat a pumanawtayon. Ditay koma pagpungtoten dagiti tattao babaen ti panangpilit kadakuada a makisarita kadatayo wenno mangawat iti panirigantayo. Ditay ipilit ti mensahetayo kadagiti tattao. Di nainkalintegan dayta ken mangpataud iti problema kadagiti sabsabali a Saksi ken iti sapasap a trabahotayo.

⁹ Sakbay a trabahuen ti maysa a teritoria, nainsiriban a sukimaten ti territory card di la ket ta addada naisurat a direksion dagidiay nangibaga kadatayo a ditay mapmapan kadakuada. No adda, maibaga koma iti tunggal agibumbunannag nga agtrabaho iti dayta a kalsada no sadino ti dida papanan. Awan koma ti agaap-apan kadagitoy a pagtaengan no saan nga ibilin ti manangaywan iti serbisio.​—Kitaenyo ti “Saludsod” iti Hunio 1994 a Ministeriotayo iti Pagarian.

¹⁰ Maparang-aytay ti kinaepektibotayo babaen ti panagbalin a mannakaawat bayat nga agbalaybalaytayo. Managpaliiwkayo koma bayat nga umasidegkayo iti pagtaengan. Nakaserra amin aya dagiti kortina? Awan kadi a pulos ti maallingagyo? Mabalin a daytoy ti mangipasimudaag a matmaturog dagiti bumalay. Nalabit nabungbunganto ti pannakisarita iti bumalay no sumublitayo. Nalabit nasaysayaat no labsantay pay laeng daytoy a pagtaengan, nga isurattayo ti numero ti balay. Mabalinyo a sublian dayta a balay sakbay a panawanyo ti teritoria wenno inotaryo a sumublikayto kalpasan ti sumagmamano nga oras.

¹¹ Nupay di igaggagara, nalabit adda matukaytay ti turogna wenno madisturbotayo. Nalabit masuron wenno makapungtot pay. Aniat’ rumbeng nga aramidentayo? Ibalakad ti Proverbio 17:27: “Ti nalamiis ti nakemna tao a mannakaawat.” Nupay saan a gapu iti ministeriotayo nga agpadispensartayo, mabalintay ti agpadispensar gapu iti di naintiempuan nga ibibisitatayo. Sidadayaw a damagentayo no kaano ti nasaysayaat a tiempo a panagsublitayo. Ti napasnek nga ebkas ti pannakaseknantayo kenkuana babaen ti naalumamay a timek masansan a pakalmaenna ti kasta a tao. (Prov. 15:1) No ibaga kadatayo ti bumalay nga iti rabii ti regular a panagtrabahona, mabalin nga inotar dayta iti territory card tapno mayurnos iti umiso a tiempo dagiti sumaganad nga ibibisita.

¹² Kasapulan met ti pannakaawat bayat nga ikagumaantayo a trabahuen a naan-anay ti teritoriatayo. Yantangay adu ti tattao a di madanon iti pagtaengan iti damo nga ipapantayo, nasken ti kanayonan a panagreggettayo a mangdanon kadakuada tapno maiburaytay kadakuada ti mensahe ti pannakaisalakan. (Roma 10:13) Ipakita dagiti report a no dadduma addada agibumbunannag nga agkarasubli iti agmalem iti isu met laeng a pagtaengan tapno ikagumaanda a danonen dagiti tattao iti pagtaengan. Mapaliiw daytoy dagiti kaarruba. Nalabit adda di nasayaat nga epekto ti ‘panagkaralabas’ dagiti Saksi ni Jehova kadakuada. Kasano a maliklikan daytoy?

¹³ Usarenyo ti pannakaawat. No sublianyo ti pagtaengan gapu ta iti damo ket diyo nadanon ti bumalay, adda kadi pakakitaan nga addan ti bumalay? No adda sursurat a nakarungarong iti mailbox wenno makita a nakasuksok iti ruangan, nalabit awan pay tao iti pagtaengan ket saan a daytoy ti nasayaat a tiempo nga ipapan manen. No awan madanon kalpasan ti namin-anon a panangpadas iti sabasabali nga oras iti dayta nga aldaw, kas koma iti rabii, baka mabalin a kasarita ti bumalay babaen ti telepono. No saan, mabalin a siaannad a mangibati iti tract wenno handbill iti ruangan, aglalo no masansan a mawanas ti teritoria. Nalabit madanonto iti sumaganad a pannakatrabaho ti teritoria.

¹⁴ Ditay koma baybayagen ti makisarita iti ruangan no matudtuduan ti bumalay. No pastrekendatayo, agannadtay koma a di marugitan ti suelo. Ammotay koma ti ar-aramidentayo no dumuklos ti agtataul nga aso. No mangasabakayo kadagiti apartment, diyo unay pigsaan ti agsao ken dikay mangpataud iti ringgor a makadisturbo kadagiti bumalay ken mangipadlaw iti kaaddayo.

¹⁵ Naurnos ken Nadayawtayo Koma: Babaen ti nasayaat a panangorganisar saantayo nga aguummong iti dadakkel ken nakadidillaw a grupo idiay teritoria. Nalabit agdanag ti dadduma a bumalay no addada luglugan nga agsangpet iti sanguanan ti balayda sa makitada ti adu nga agibumbunannag. Ditay kayat nga ipadlaw a kasla ketdin “rarautentayo” dagiti pagnanaedanda. Nasaysayaat nga iyurnos ti pannakatrabaho ti teritoria kabayatan ti taripnong sakbay ti panangasaba. Ti babassit a grupo dagiti agibumbunannag, kas ti sangapamiliaan, ket saan unay a makapakigtot kadagiti bumalay ken nalaklaka nga urnosen bayat a matartrabaho ti teritoria.

¹⁶ Tapno naurnos kasapulan a siputan a naimbag dagiti nagannak ti kondukta dagiti annakda bayat nga agtartrabahoda iti teritoria. Natalna koma dagiti ubbing no makikaduada kadagiti nataengan iti binalaybalay. Saan koma a mapalubosan dagiti ubbing nga agay-ayam wenno agpalpaliwaweng, a pakasimronan dagiti agindeg wenno aglabas.

¹⁷ Nasken met ti kinatimbeng no maipapan iti panagmerienda. Kuna Ti Ministeriotayo iti Pagarian, a Hunio 1995, panid 3: “No rummuartayo iti tay-ak ti serbisio, mabalin a mapukawtay ti napateg a tiempo babaen ti panagkape [wenno panagmerienda]. Nupay kasta, . . . no dakes ti panniempo, ti panagmerienda ket mangrepresko ken tumulong kadatayo nga agtultuloy pay. Nupay kasta, adu ti mayat a kupado iti panangasaba kadagiti tattao imbes a makilangen iti kakabsat kadagiti pagkapean [wenno panagmerienda] iti tiempo a nairanta iti ministerio.” Nupay personal a desision ti panagsardeng tapno agmerienda, napaliiw a no dadduma, agdadanon ti adu a kakabsat iti maysa a tianggi wenno restawran. Malaksid pay iti kaadu ti tiempo a mabusbos koma iti panagserbi, mabalin a makigtot dagiti sabsabali a parokiano gapu iti kaadda ti adu a tattao. No dadduma, pagiinnistoriaanda iti napigsa dagiti kapadasanda iti panangasaba iti dayta nga agsapa, ket makadadael daytoy iti dignidad ti ministeriotayo ken mangpakapuy iti kinaepektibona. Buyogen ti pannakaawat, maliklikan dagiti agibumbunannag ti agaaripuno iti maysa a pasdek ken ti di nasken a panangbusbos iti tiempo a para iti ministerio.

¹⁸ Adu ti nangtagiragsak kadagiti nasayaat a resulta babaen ti panangdanonda kadagiti tattao iti sadinoman a pakasarakan kadakuada​—kadagiti lansangan, paradaan, parke, ken iti dadduma pay a publiko a lugar. Uray kadagitoy a luglugar, kayattay ti mangipaay iti nasayaat a pammaneknek, saan laeng a babaen kadagiti saotayo no di pay ket babaen ti kinanainkalintegantayo. Siguraduen koma dagiti agibumbunannag iti kada kongregasion nga ipakita ti respetoda kadagiti pagbeddengan ti teritoriada tapno saanda a makariribuk kadagiti tattao kadagiti lugar ti komersio ken paradaan wenno kadagiti empleado iti lugar ti negosio, kas kadagiti paggasolinaan, a silulukat iti 24 nga oras. Tapno sigurado a maitungpaltay ti ministeriotayo iti naurnos, nadayaw a wagas, trabahuentay laeng ti naituding a teritoriatayo malaksid no adda espesipiko nga urnos nga inaramid ti Congregation Service Committee ti sabali a kongregasion, tapno tulongantay ida.​—Idiligyo ti 2 Corinto 10:13-15.

¹⁹ Kadagiti dadduma a kongregasion nga aduan kadagiti lugar a mabalin a pangasabaan iti publiko, inorganisarda dagitoy kas teritoria. Kalpasanna adda territory card a maited iti indibidual nga agibumbunannag wenno iti maysa a grupo. Makatulong daytoy iti ad-adda nga epektibo a panangwanas ken tapno saan unay nga adu ti agibumbunannag nga agtrabaho nga aggigiddan iti isu met laeng a lugar, maitunos iti prinsipio iti 1 Corinto 14:40: “Ti isuamin a bambanag maaramid koma a sitatakneng ken addaan urnos.”

²⁰ Kanayon koma a nadayaw ti personal a langatayo ken mangipabigbig kadatayo kas ministro nga agaw-awit iti nagan ni Jehova. Pudno met dayta kadagiti alikamentayo. Dagiti rutrot a bag ken daan unayen wenno nakarugrugit a Biblia ket makaperdi iti mensahe ti Pagarian. Naikuna a ti panagkawkawes ken panaglanglanga “isu ti nalaka a pakabigbigan iti kagimongan ken mangted iti impormasion kadagiti makaimatang no asino ken no aniaka ken no sadino ti pakaibagayam.” Gapuna, saan koma a nasariwakka no di ket nadalimanek koma ti panaglanglangatayo. Saan met koma a naparayag wenno nagarbo unay, no di ket kanayon koma a “maikari iti naimbag a damag.”​—Fil. 1:27; idiligyo ti 1 Timoteo 2:9, 10.

²¹ Iti 1 Corinto 9:26, kuna ni apostol Pablo: “Ti wagas a panagtarayko ket di mapagduaduaan; ti wagas a panangiturongko kadagiti danogko ket saan a kasla panangkabkabil iti angin.” Kas panangtulad ken Pablo, determinadotayo a maaddaan iti epektibo, nabunga a ministerio. Bayat a naregtatayo a makiraman iti trabaho a panangasaba kas paset ti “buyot dagiti dudon” nga us-usaren ni Jehova itatta, sapay koma ta usarentayo ti Nakristianuan a kinanainkalintegan ken pannakaawat bayat nga idanontayo ti mensahe ti pannakaisalakan kadagiti amin iti teritoriatayo.