Maseknan ti Naindaklan a Namarsua Kadatayo!
1 Iti panangikagumaan ni Jehova a mangallukoy iti nasukir nga Israel, inyimtuodna: “Dika aya naammuan? Dika aya nangngeg? Ti agnanayon a Dios, ni Jehova, ti Namarsua kadagiti pungto ti daga.” (Isa. 40:28) Am-ammotay ti Naindaklan a Namarsua kadatayo, ken makitatay ti naayat a pannakaseknanna kadatayo. Nupay kasta, minilion a tattao ti agduadua iti kaaddana wenno adda kapanunotanda maipapan kenkuana a saan a mayataday iti masarakan iti Biblia. Kasanotay a matulongan ida?
2 Ti baro a libro nga Is There a Creator Who Cares About You? ket nairanta a pangtulong kadagita a tattao. Awisenna dagiti nasaririt a tattao nga agpanunot sigun kadagiti ebidensia. Dagiti makapainteres a material ken makaguyugoy nga argumento iti daytoy a libro kayawanna dagidiay mangbasa iti dayta.
3 Kabesaduenyo ti Libro a Creator: Adda koma pamalatpatanyo kadagiti kangrunaan a linaonna. Usigen ti kapitulo 2 agingga iti 5 no kasano a naadda ti uniberso, ti biag, ken ti tao ken no siasino ti makinggapuanan. Sukimaten ti kapitulo 6 agingga iti 9 ti Biblia ken ti Autorna ken, kangrunaanna, no mapagtalkan wenno saan ti rekord ti Genesis maipapan iti panamarsua. Mangipaay ti kapitulo 10 iti makapnek a sungbat iti maysa kadagiti karirikutan a saludsod ti tao: “No maseknan ti Namarsua, apay a nagadu ti agsagsagaba?”
4 Ikagumaanyo a Guyugoyen Dagidiay Agduadua: Adda argumento nga ipaay ti panid 78-9 iti libro a Creator a mausaryo a pangtulong kadagiti sabsabali a makagteng iti umiso a konklusion maipapan iti Dios. Saludsodanyo ida: “Adda kadi punganay ti uniberso?” Umanamong ti kaaduan nga adda. No kasta, isaludsodyo: “Timpuar kadi lattan dayta a punganay nga awan ti nangyussuat iti dayta wenno adda?” Bigbigen ti kaaduan a tattao nga adda nangyussuat iti dayta. Agturong daytoy iti maudi a saludsod: “Dayta kadi a punganay ti uniberso ket inyussuat ti agnanayon a banag wenno agnanayon a Persona?” Daytoy a metodo ituggodna dagiti adu a mangtarus a sigurado nga adda Namarsua.
5 Ti libro a Creator isu a talaga ti kasapulan ti adu a tattao. Iburayyo dayta kadagiti kakabagian, katrabahuan, kaeskuelaan, ken dadduma pay a gagayyemyo. Itugotyo iti pangasabaan tapno maipaimayo dayta kadagidiay masarakanyo nga agduadua maipapan iti kaadda ti Dios. No ad-adda a pamiliartayo iti daytoy a libro, ad-adda met a bumileg ti ayattay iti Namarsua kadatayo, a dayta ti mangtignay kadatayo nga agtultuloy a magna a mayannurot kadagiti nangato a pagalagadanna.—Efe. 5:1; Apoc. 4:11.