‘Saantay Koman nga Agpalpalikaw!’
1 Adda kadin nakasabaanyo a bimmallaet kabayatan ti presentasionyo a kunana: “Aniat’ masapulyo? Saankayon nga agpalpalikaw!” Aniat’ maadaltayo iti kasta a kapadasan?
2 Saan a makaan-anus ti adu a tattao itatta. Kayatda a maammuan no siasinotayo ken no apay a simmarungkartayo. No maammuanda a ti panggep ti isasarungkartayo ket maipapan iti Biblia, didan kayat ti dumngeg. Saan a napateg iti biag ti adu a tattao ti panagbasa iti Biblia ken panagsasarita maipapan kadagiti naespirituan a banag. Kasanotay a maallukoy ti kakasta a bumalay tapno makisaritada koma kadatayo iti sumagmamano a minuto maipapan iti Biblia?
3 No Ania ti Kaepektibuan: Nasken unay nga ipakita iti bumalay a ti Biblia ket mangipaay kadagiti praktikal a solusion kadagiti parikut a pakaseknanna ken aramidenyo dayta iti sumagmamano laeng a sasao. Ti kaepektibuan a presentasion itampokna ti espesipiko a saludsod a nairanta a mamagpanunot iti bumalay, a sarunuen ti kasuratan a mangsungbat iti saludsod. Mabalin a maragsakankayo a mangpadas iti dadduma kadagiti sumaganad a singasing. Nairantada a tumulong kadatayo a ‘saanen nga agpalpalikaw’ bayat a gutugotentayo ti interes ti bumalay.
4 Iti teritoria nga ayan dagiti tattao a masansan nga agkuna a saanda nga interesado, mangpataudkayo iti saludsod a pakaseknanda a mismo:
◼ “Bayat nga umadanitayo iti sumaganad a milenio, panagkunam adda ngata nasaysayaat a pangnamnamaan wenno awan? [Palubosanyo a sumungbat.] Impadto ti Biblia dagiti nariribuk a pasamak a makitkitatayo ita ken no anianto ti pagbanaganda.” Basaenyo ti 2 Timoteo 3:1, 2, 5 ken Proverbio 2:21, 22.
◼ “Maseknan unay ti pagiliantayo no maipapan iti salun-at. Ammom kadi nga inkari ti Dios a risutennanto a mamimpinsan amin a parikut iti salun-at?” Basaenyo ti Apocalipsis 21:3, 4.
◼ “Aniat’ panagkunayo a pagsayaatanna iti lugartayo no amin nga agnanaed ditoy ket iyaplikarda dagiti prinsipio ti Biblia?” Basaenyo ti Mateo 22:37-39.
5 Yantangay annongentayo nga ikasaba ti naimbag a damag ti Pagarian, no mabalin iturongtayo koma ti atension iti maaramidanto ti Pagarian. Mabalinyo a kunaen:
◼ “Ammoyo kadi a ti kadadaanan a libro ditoy lubong, nga isu ti Biblia, impadtona nga addanto maymaysa a gobierno iti intero a lubong?” Basaenyo ti Daniel 2:44.
◼ “Panagkunayo, ania ngata ti kasasaad no ni Jesu-Kristo ti agturay ditoy daga?” Basaenyo ti Salmo 72:7, 8.
6 Iti teritoria nga ayan dagiti tattao a relihioso, mabalinyo a padasen ti maysa kadagitoy nga introduksion:
◼ “Adu a tattao ti mailupitlupit gapu iti relihionda wenno gapu iti kolor ti kudilda. Panagkunayo, kasanot’ panangmatmat ti Dios iti kasta a panangidumduma?” Basaenyo ti Aramid 10:34, 35.
◼ “Ammotayo a nagaramid ni Jesu-Kristo iti adu a milagro idi kaaldawanna. No mabalinyo koma ti agkiddaw kenkuana iti maysa pay a milagro, aniat’ kiddawenyo?” Basaenyo ti Salmo 72:12-14, 16.
7 No di kayat ti bumalay a luktan ti ridaw, mabalinyo nga irugi ti saritaan a kastoy ti kunaenyo:
◼ “Kaaduan a tattao ita naumadan a makangkangngeg kadagiti parikut. Kayatda a maammuan no kasano a marisut dagita. Sigurado a kasta met ti kayatyo. Ngem sadino ti pakasarakantayo kadagiti napaypayso a solusion kadagiti parikuttayo?” Palubosanyo a sumungbat. Basaenyo ti 2 Timoteo 3:16, 17.
8 Apay a Diyo Padasen Dayta? Ti simple ken ababa a saludsod ket masansan nga umdasen a mangtukay iti interes ti bumalay. Adda maysa a babai a dati a bumusbusor ngem pinastrekna iti pagtaenganna ti dua a sister idi insaludsod ti maysa kadakuada: “Maibagam kadi no ania daydiay Pagarian nga ikarkararagmo iti Kararag nga Amami?” Nasdaaw ti babai iti dayta a saludsod, ket immanamong nga agadal iti Biblia. Maysa itan a dedikado nga adipen ni Jehova!
9 No kasarsaritayo ti bumalay, natural koma ti panagsaoyo. Agsaokayo a sipapasnek. Dakdakkel ti posibilidadna a mangipangag dagiti tattao no patienda a pudno nga interesadotayo kadakuada.—Ara. 2:46, 47.
10 Maysa a karit ita ti panangikasaba iti naimbag a damag. Adda dagiti bumalay nga agsuspetsa kadagiti dida am-ammo. Dadduma ti okupado unay ket dida kayat a masayang ti tiempoda. Ngem masiguradotayo nga adu pay ti mabirokan a maikari. (Mat. 10:11) Nalabit nabalballigi ti panangikagumaantayo a mangbirok kadakuada no ababa laeng ken ‘saan a nalikaw’ dagiti presentasiontayo!