Rumangrang-ay ti Pudno a Panagdayaw
Idiay Makindaya a Europa
1 Naregta a manangaskasaba iti Pagarian dagiti Kristiano idi umuna a siglo. Naragsakanda idi a dagiti kongregasion ‘immadu ti bilangda iti inaldaw-aldaw.’ (Ara. 16:5) Gapu iti natured a panangaskasabada, nakagteng ti pudno a panagdayaw idiay Asia, Africa, ken Europa, a nangibunga iti nabaknang a pannakaani dagiti manamati.
2 Iti daytoy tiempo ti panungpalan, agtultuloy a rumangrang-ay ti pudno a panagdayaw, nangnangruna kadagiti pagilian ti Makindaya a Europa. Kadagiti pagilian a dati a pangiparparitan ti gobierno iti trabahotayo agingga idi apagtapog ti dekada 1990, sagsagrapentay itan ti naisangsangayan nga irarang-ay. Ipakita ti 1999 Yearbook a dua kadagita a pagilian, ti Russia ken Ukraine, nagreport ti tunggal maysa iti nasurok a 100,000 nga agibumbunannag a nakiraman iti ministerio iti publiko. Kadagiti 15 a teritoria ti dati a Soviet Union, nanipud idi 1991, nasurok a 220,000 a tattao ti nangidedikaren iti bagbagida ken Jehova ket nabautisarandan! Gapu iti daytoy a napartak nga irarang-ay, nasken ti panagibangon iti adu a baro a Kingdom Hall ken Assembly Hall ken nasken met a palawaen ti adu a pasilidad dagiti sanga nga opisina.
3 Maipapautang itan ti dadduma a Kingdom Hall Fund ti Sosiedad kadagiti kongregasion iti pagpagilian nga agkasapulan unay iti ad-adu a Kingdom Hall ngem awan umdas a sanikuada ken nakaro ti parikut iti ekonomia. Iti nagbaetan ti Marso 1996 ken Oktubre 1998, inaprobaran ti Sosiedad ti 359 a Kingdom Hall loan request manipud kadagiti sanga nga opisina a mangimatmaton kadagiti 11 a pagilian ti Makindaya a Europa. Dagiti maipapaay a pundo ket maus-usar a panggatang iti lote ken materiales a pagbangon kadagiti baro a Kingdom Hall ken tumulong kadagiti kongregasion a mangpasayaat kadagiti datin a pasilidad. Dagiti retrato a naipakita ditoy ipaayandatayo iti ideya no kasano a nagunggonaan dagiti kakabsattayo idiay Makindaya a Europa kadagiti kontribusion iti Kingdom Hall Fund ti Sosiedad idiay Estados Unidos ken iti dadduma pay a pagilian.
4 Idi 1998, rimmang-ay ti Bulgaria iti 12 a porsiento, ket naragsakan dagiti kakabsat idi naidedikar ti kaunaan a Kingdom Hall-da idi Abril iti dayta a tawen. Tinagiragsak ti Croatia ti 4 a porsiento nga irarang-ay, ket agibangbangon ita dagiti kakabsat sadiay iti ad-adu pay a Kingdom Hall, a mangidur-as iti pudno a panagdayaw. Idiay Hungary, agarup 80 a Kingdom Hall ti us-usaren dagiti 144 a kongregasion. Kayatna a sawen a kadagiti 235 a kongregasion iti dayta a pagilian, 61 a porsiento ti addaan iti bukodda a pagdaydayawan. Idiay Macedonia, ti programa a panagibangon iti Kingdom Hall ket nakaileppasen iti dua a baro a pasdek, ket adu pay ti maibangbangon. Idi kalgaw ti 1999, naileppas ti doble a Kingdom Hall iti kabesera a siudad ti Skopje. Saan a nakurkurang ngem innem a kongregasion ti mabalin a mangusar iti daytoy a pasdek.
5 Itay napan a tawen idiay Russia, agpromedio iti nasurok a 260 a tattao ti mababautisaran iti kada lawas! Kas panangtulad iti maar-aramid iti sabsabali a pagilian, nangorganisaren ti sanga nga opisina ti Russia iti 12 a Regional Building Committee iti intero a naglawa a teritoriada, a tumulong kadagiti proyekto a panagibangon iti Kingdom Hall iti masanguanan. Iti makin-amianan a paset ti St. Petersburg, ibangbangondan ti kaunaan nga Assembly Hall iti dayta a pagilian, a makalaon iti 1,600 a pagtugawan. Karaman met iti dayta a pasilidad ti lima a Kingdom Hall a ti tunggal maysa makalaon iti 200 a pagtugawan. Tapno maserbian dagiti naespirituan a kasapulan dagiti kakabsattayo ken ti adu nga interesado idiay Ukraine, naileppasen ti 84 a Kingdom Hall ken 80 ti madama a maibangbangon.
6 Saantay kadi a maragsakan iti daytoy nga irarang-ay idiay Makindaya a Europa? Sadinoman ti pagnanaedantayo, ti irarang-ay ti pudno a panagdayaw ipalagipna kadatayo a saan a mangidumduma ti Dios ket ti kinaanusna kaipapananna ti pannakaisalakan ti “dakkel a bunggoy.” (Apoc. 7:9; 2 Ped. 3:9) Anian a pribilehiotayo tangay adda bassit a maitultulongtayo iti naespirituan nga irarang-ay dagiti sabsabali, uray dagidiay adda iti adayo a dagdaga! Ipasigurado kadatayo ti Proverbio 28:27 a “ti mangted iti napanglaw dinto makurangan.” Ti kinatuloktayo a tumulong iti pannakasulnit dagitoy a paggastuan iti panagibangon ket mangibunga iti “panamagpapada” kadagiti material a banag, a makatulong iti isuamin a mangsagrap iti kinaragsak nga ibunga ti panangted ken ti rag-o nga ibunga ti pannakakita iti irarang-ay ti pudno a panagdayaw iti sangalubongan.—2 Cor. 8:14, 15; Ara. 20:35.
[Ladawan iti panid 3]
Săcele, Romania
[Ladawan iti panid 3]
Maardu, Estonia
[Ladawan iti panid 3]
Sevnica, Slovenia
[Ladawan iti panid 3]
Tiszavasvári, Hungary
[Dagiti Ladawan iti panid 4]
Jūrmala, Latvia
[Dagiti Ladawan iti panid 4]
Tallinn, Estonia
[Ladawan iti panid 4, 5]
Taurage, Lithuania
[Ladawan iti panid 4, 5]
Belgrade, Yugoslavia
[Dagiti Ladawan iti panid 5]
Prievidza, Slovakia
[Ladawan iti panid 5]
Mátészalka, Hungary
[Dagiti Ladawan iti panid 6]
Vranov nad Topl’ou, Slovakia
[Ladawan iti panid 6]
Ruma, Yugoslavia
[Dagiti Ladawan iti panid 6]
Tornakalns, Latvia