“Agtultuloykayo a Siririing”
1 Kalpasan ti panangdeskribirna kadagiti napateg a pasamak a mangtanda iti maudi nga al-aldaw daytoy a sistema ti bambanag, indagadag ni Jesus kadagiti adalanna nga ‘agtultuloyda a siririing.’ (Mar. 13:33) Apay a masapul nga agtultuloy a siririing dagiti Kristiano? Agsipud ta agbibiagtayo iti kapepeggadan a tiempo iti pakasaritaan ti tao. Saan a mabalin nga agtugleptayo iti naespirituan. Agresulta dayta iti ditay panangapresiar iti trabaho nga impaannong ni Jehova kadatayo iti daytoy tiempo ti panungpalan. Ania dayta a trabaho?
2 Iti intero a daga, paiwarwaragawag ni Jehova iti ilina ti naimbag a damag maipapan iti Pagarianna—ti kakaisuna a pangnamnamaan ti sangatauan. Ti nasinged a pannakipagtrabahotayo iti organisasion ti Dios ipabigbignatayo kas pudno a Kristiano a sipapanunot iti panawen ken iti kinapateg ti panangtulong kadagiti sabsabali a mangammo “kadagiti sasao ti agnanayon a biag.” (Juan 6:68) Babaen ti naregta a pannakiraman iti daytoy kapatgan a trabaho, pampaneknekantayo a siririingtay iti naespirituan.
3 Matignay a Mangasaba: Kas Saksi ni Jehova, positibotay koma iti ministeriotayo. Ti ayat iti Dios ken iti kaarruba tignayennatayo a personal a makiraman iti trabaho a panangasaba. (1 Cor. 9:16, 17) No aramidentay dayta, maisalakantay ti bagitayo agraman dagidiay agimdeng kadatayo. (1 Tim. 4:16) Determinadotayo koma a makiraman a regular ken napapaut no mabalbalin iti pannakaikasaba ti kasasayaatan a gobierno a mangituray iti sangatauan—ti Pagarian ti Dios!
4 Maipaganetget kadatayo ti kinaganat ti ministeriotayo gapu iti napateg a kinapudno—bumtak ti dakkel a rigat bayat nga ar-aramidentay pay laeng daytoy a trabaho. Yantangay ditay ammo ti aldaw ken oras, nasken nga agtalinaedtayo a siririing ken sisasagana iti amin a tiempo, nga agpannuraytayo ken Jehova a buyogen ti kararag. (Efe. 6:18) Agtultuloy a lumawa ti trabaho a panangasaba. Ngem din agbayag, madanonton ti tampok ti kadaklan a trabaho a panangasaba iti pakasaritaan ti tao.
5 Simamatalek a surotentayo ti bilin ni Jesus nga ‘agtultuloy a siririing.’ Ad-adda itan a kasapulan daytoy. Sapay koma ta agtignaytayo a buyogen ti kinaganat. Itatta ken iti inaldaw, agtalinaedtayo koma a napasnek, naridam, ken aktibo iti naespirituan iti panagserbi ken Jehova. Wen, ‘agtalinaedtayo koma a siririing ken sipupuot.’—1 Tes. 5:6.