‘Nasubok No iti Pannakaikari’—Kasano?
1 Gapu iti agtultuloy nga irarang-ay iti organisasion ni Jehova, agtultuloy ti panagkasapulan kadagiti kualipikado a kakabsat a lallaki nga agserbi kas ministerial nga ad-adipen. Kaaduan a kakabsat a lallaki a di pay nadutokan, a pakairamanan dagiti tin-edyer, tarigagayanda ti agserbi iti kongregasion. No maipaayanda iti kanayonan a trabaho, mariknada a makatulongda ken adda maaramidanda. Ti ad-adda pay nga irarang-ayda ket agpannuray iti ‘pannakasubokda no maipapan iti pannakaikari.’ (1 Tim. 3:10) Kasano a maaramid daytoy?
2 Ti Akem Dagiti Panglakayen: Kas paset ti panangirukod iti maysa a kabsat kadagiti Nainkasuratan a kualipikasion para kadagiti ministerial nga adipen a masarakan iti 1 Timoteo 3:8-13, suboken dagiti panglakayen no maikari ti maysa a kabsat a mangibaklay iti responsabilidad. Mabalin a dutokanda a mangaramid kadagiti makatulong a serbisio a mainaig iti panagited iti magasin ken literatura, panagyawat iti mikropono, panangmantener iti Kingdom Hall, ken dadduma pay. Paliiwen dagiti panglakayen no kasano ti panangmatmat ken panangasikasona kadagiti annongenna. Kitaenda dagiti galadna no isu ket mapangnamnamaan, managsapsapa, naanep, naemma, natulok, ken mannakibagay. (Fil. 2:20) Mapagulidanan aya iti panagkawkawes ken panaglanglangana? Napasnek kadi iti responsabilidadna? Kayatda a makita iti “nasayaat a kababalinna dagiti aramidna buyogen ti kinaalumamay iti sirib.” (Sant. 3:13) Talaga aya nga ikagkagumaanna ti tumulong iti kongregasion? Tungtungpalenna aya ti bilin ni Jesus a ‘panagaramid kadagiti adalan’ babaen ti naregta a pannakiraman iti tay-ak ti ministerio?—Mat. 28:19; kitaenyo ti Setiembre 1, 1990, a Pagwanawanan, panid 18-28.
3 Nupay awan espesipiko a kababaan nga edad ti madutokan a ministerial nga adipen, dakamaten ti Biblia dagita a kakabsat a kas “lallaki nga agserbi.” Saantayo a namnamaen nga addada iti apagtapog wenno katengngaan ti kinatin-edyerda, nangnangruna ta nadakamat ti posibilidad a kaadda ti asawa ken annakda. (1 Tim. 3:12, 13) Dagita a lallaki saanda koma a tumulok “kadagiti tarigagay a naikasigudan iti kina-agtutubo” no di ket seriosoda koma, a nasayaat ti pakasarsaritaanda ken nadalus ti konsiensiada iti imatang ti Dios ken kadagiti tattao.—2 Tim. 2:22.
4 Nupay mausar ti nainkasigudan nga abilidad, ad-adda a napateg ti kababalin ken espiritu dayta a tao. Sipapakumbaba kadi a tarigagayan ti maysa a kabsat a lalaki nga idayaw ti Dios ken agserbi kadagiti kakabsatna? No kasta, bendisionanto ni Jehova ti panagreggetna a rumang-ay iti kongregasion.