Usarenyo Dagiti Agdama a Pasamak a Pangtukay iti Interes
1 Kayatyo kadi ti agtultuloy a maaddaan kadagiti nasayaat a kapanunotan a mamagtalinaed a baro iti ministerioyo ken mangtukay iti interes dagiti tattao iti mensahe ti Biblia? No kasta, usarenyo a pangirugi iti saritaan dagiti mapaspasamak iti lubong ken iti lugaryo. Mabalinyo a dakamaten dagiti agdama a pasamak iti lugar a pagnanaedanyo ken iti pagilianyo wenno dagiti internasional a damdamag. Kanayon nga agbaliwbaliw dagitoy. (1 Cor. 7:31) Usigenyo dagiti sumaganad a pagarigan.
2 Maseknan unay ti tattao kadagiti problema iti ekonomia ken iti kangina dagiti gagatangen. Gapuna, mabalinyo a kunaen:
◼“Nadamagyo kadin a ngimmato manen ti presio ti [dakamaten no ania dayta]?” Wenno mabalinyo a komentuan ti maipapan iti kinaawan panggedan no adda dakkel a kompania a nangikkat iti adu a trabahadorna. Depende iti kayatyo a pagturongan ti saritaan, mabalinyo a pasarunuan iti kastoy, “Pinampanunotyo kadin no apay a nakarigrigat ti agbirok iti pagbiag?” wenno “Panagkunayo, agnanayonto ngata a narigat ti agbirok iti pagbiag?”
3 Mabalin a pangibatayan iti sabali pay a saritaan dagiti damag iti kinaranggas, a kas kadagiti trahedia iti pamilia wenno kadagiti ages-eskuela. Mabalinyo nga iyimtuod:
◼ “Nabasayo kadin iti diario a [mangdakamat iti trahedia iti lugaryo]?” Sa isaludsodyo, “Ania ti pagarupenyo a pakaigapuan ti kasta unay a kaadu ti kinaranggas ditoy lubong?” wenno “Panagkunayo, addanto ngata tiempo a talaga a mariknatayo ti kinatalged?”
4 Mabalin met a makatukay iti interes dagiti damag maipapan kadagiti nadawel a layus, ginggined, wenno sibil a riribuk iti nagduduma a paset ti lubong. Kas pagarigan, mabalinyo nga isaludsod:
◼ “Mapabasol kadi ti Dios iti [mangdakamat iti natural a didigra]?” Wenno mabalinyo a dakamaten ti kaudian a panagbettak ti sibil a riribuk ket kunaenyo: “No kayat ti tunggal maysa ti talna, apay a nakarigrigat a gun-oden dayta?”
5 Kanayon a siputanyo dagiti agdama a pasamak a mabalinyo nga usaren iti introduksionyo. Masarakan dagiti makatulong a singasing iti sidong ti “Agdama a Paspasamak,” iti panid 10-11, iti libro a Panakirinnason. Nupay kasta, liklikanyo ti dumasig kadagiti politikal wenno sosial nga isyu. Imbes ketdi, iturongyo ti atension iti Kasuratan ken ti Pagarian ti Dios kas ti kakaisuna a permanente a solusion kadagiti parikut ti sangatauan.