Itultuloyyo ti Mangasaba!
1 Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Daytoy ti gapuna a tinudingannatayo a mangikasaba iti naimbag a damag. (Mat. 24:14) No maawatantayo no apay a rumbeng nga itultuloytay ti mangasaba, dinatay lapdan ti aniaman a pannakaupay wenno pakasingaan a mabalin a sumangbay kadatayo.
2 Apay nga Itultuloytayo? Adu dagiti pakasingaan iti lubong, isut’ gapuna a malipatan wenno tagilag-anen dagiti tattao ti ibagbagatayo kadakuada. Masapul nga itultuloytay nga ipalagip kadakuada ti mensahe ti Dios maipapan iti pannakaisalakan. (Mat. 24:38, 39) Maysa pay, kanayon nga agbaliwbaliw ti kasasaad ti biag dagiti tattao. Mabalin a kellaat nga agbaliw uray dagiti kasasaad ti lubong. (1 Cor. 7:31) Inton bigat, iti sumaganad a lawas, wenno iti sumaganad a bulan, mabalin a sumangbay kadagiti tattao a kaskasabaantayo dagiti baro a parikut wenno pakaseknan a mangtignay kadakuada a sipapasnek a mangipangag iti naimbag a damag nga idanontayo. Dikay kadi agyaman ta saan a simmardeng ti Saksi a nangidanon kadakayo iti kinapudno?
3 Panangtulad iti Asi ti Dios: Siaanus nga impalubos ni Jehova nga aglabas ti panawen sakbay a dusaenna dagiti nadangkes. Babaen kadatayo, agtultuloy nga aw-awisenna dagiti nalinteg nga agturong kenkuana tapno maisalakanda. (2 Ped. 3:9) Sungsungbatantayo ti biag dagiti tattao no ditay ipakaammo kadakuada ti naasi a mensahe ti Dios ken pakdaaran ida maipapan iti sumungsungad a panangukom ti Dios iti amin a di mangtallikud kadagiti dakes nga aramidda. (Eze. 33:1-11) Nupay adda dagiti di mangipangag iti ikaskasabatayo, masapul a ditay guminad iti panagreggettayo a tumulong kadagiti napasnek a tattao a mangipateg iti naindaklan nga asi ti Dios.—Ara. 20:26, 27; Roma 12:11.
4 Panangipakita iti Ayattayo: Ni Jehova a Dios, babaen ken Jesu-Kristo, ti nangibilin a maikasaba ti naimbag a damag iti intero a daga. (Mat. 28:19, 20) Uray no saan a mangipangag dagiti tattao, maipakitatayo ti ayat ken debosiontayo iti Dios babaen ti agtultuloy a panangaramid iti umiso.—1 Juan 5:3.
5 Determinadotay koma nga agtultuloy a mangasaba! Sireregta nga aramidentay dayta bayat nga addatay pay laeng iti ‘aldaw ti panangisalakan’ ni Jehova.—2 Cor. 6:2.