Saludsod

◼ Kasano a matulongan ti maysa a nabayagen a di aktibo tapno makakualipikar manen a kas agibumbunannag iti naimbag a damag?

Makaparagsak no ipakita ti maysa a di aktibo ti naimpusuan a tarigagayna nga agserbi ken Jehova. (Luc. 15:4-6) Mabalin nga impalubosna a malapdan nga agadal a personal, makigimong, ken makiraman iti tay-ak ti ministerio gapu iti ibubusor wenno kinarigat ti biag. Kasano a maipaay ti kasayaatan a tulong tapno rumang-ay iti naespirituan?

Datayo amin koma ti umuna a mangiparikna kenkuana iti pudpudno a Nakristianuan nga ayat. Naalibtak koma dagiti panglakayen a mangtingiting kadagiti espesipiko a kasapulanna iti naespirituan. (Sant. 5:14, 15) No nabiit la a nagbalin a di aktibo, mabalin nga umdas ti panangtulong ti maysa nga aduan iti kapadasan nga agibumbunannag tapno maparegta ti kabsat iti tay-ak ti serbisio. Nupay kasta, nalabit ad-adu a tulong ti kasapulan no nabayag a di nakitimpuyog iti kongregasion ti maysa a di aktibo. Mabalin a maitutop a personal a mayadalan iti Biblia babaen ti mayataday a publikasion tapno dumakkel ti pammati ken apresasionna. No kasta ti kasasaad, iyurnos ti manangaywan ti serbisio ti panangyadal ti maysa a kualipikado nga agibumbunannag. (Heb. 5:12-14; kitaenyo ti “Saludsod” iti Nobiembre 1998 a Ti Ministeriotayo iti Pagarian.) No adda am-ammoyo a makasapul iti kasta a tulong, ipakaammoyo iti manangaywan ti serbisio iti kongregasion.

Sakbay a maawis a makiraman iti ministerio ti maysa a nabayagen a di aktibo, maiparbeng a kapatang ti dua a panglakayen tapno maikeddeng no isut’ kualipikado nga agbalin nga agibumbunannag iti Pagarian. Surotenda ti isu met la a pamay-an a maaramid no kapatangda dagiti agngayangay nga agbalin nga agibumbunannag iti naimbag a damag. (Kitaenyo ti Nobiembre 15, 1988, Pagwanawanan, panid 17.) Rumbeng a reggetan ti di aktibo nga iranud ti naimbag a damag kadagiti sabsabali. Masapul met a matungpalna dagiti kangrunaan a pagannurotan a nailanad iti panid 98-9 iti libro a Ti Ministeriotayo ken tabunuanna a regular dagiti gimong ti kongregasion.

No adda ti nasayaat a naespirituan a rutina ti maysa nga agsubsubli, tumibker ken mataginayon ti nadekket a relasionna ken Jehova ken agtultuloy a makapagna iti dalan nga agturong iti biag nga agnanayon. (Mat. 7:14; Heb. 10:23-25) No ipakatna ti “amin a napasnek a panagregget” ken patanorenna dagiti Nakristianuan a galad a di agkupas saanton nga agbalin a “di aktibo wenno di nabunga” a Kristiano nga adalan.—2 Ped. 1:5-8.