Naballigi a Panangasaba Babaen ti Telepono

¹ Kas Saksi ni Jehova, ti panggeptayo ket saan laeng a tapno makiraman iti panangikasaba ti naimbag a damag no di pay ket tapno idanon iti amin a tattao agingga’t mabalin ti mensahe ti Pagarian. (Ara. 10:42; 20:24) Bayat a ti trabaho a panagbalaybalay ti agtultuloy a kangrunaan a pamay-an tapno makasabaantayo dagiti tattao, ammotayo nga uray iti kastoy a sistematiko a pamay-an, saantayo a makasarita ti amin. Tapno ngarud ‘naan-anay a maitungpal ti ministeriotayo,’ usarentayo dagiti sabali a pamay-an​—agraman ti panangasaba iti telepono​—tapno masarakantayo dagiti arig karnero a tattao.—2 Tim. 4:5.

² Kadagiti adu a lugar, agnanaed dagiti tattao kadagiti nainget-pannakaguardiana nga apartment, aduan tattao a pasdek, wenno guardiado a komunidad, a mamagbalin a narigat ti panangasaba kadagiti tattao. Nupay kasta, nakasarita ti adu nga agibumbunannag dagitoy a tattao babaen ti telepono. Nupay nalabit saan a nalaka nga aramiden ti kastoy ditoy Pilipinas, mabalin a mangilista iti sumagmamano a numero ti telepono manipud iti telephone directory tapno makita dagiti address nga adda iti teritoria ti kongregasionyo. Kasta met, adu a mangaskasaba kadagiti lansangan, parke, wenno shopping mall ti mangilislista iti numero ti telepono dagidiay makasaritada.

³ Bumdengkayo aya a mangiraman iti ministerioyo ti panangasaba iti telepono? Kuna ti maysa a kabsat: “Diak kayat nga adda asinoman nga agtelepono kaniak iti pagtaengan tapno lakuannak iti uray ania a banag, isut’ gapuna a pagkedkedak idi ti kastoy a kita ti panangasaba.” Nupay kasta, kalpasan laeng ti namindua a panagtelepono, kinunana: “Magustuak dayta! Diak impagarup a maaramidko, ngem magustuak dayta! Kalmado dagiti tattao iti telepono, ken adda aminen a kasapulam. Epektibo unay daytoy!” Maysa a kabsat a babai ti addaan iti isu met laeng a reaksion: “Talaga nga awan ti gagarko iti panangasaba iti telepono. Kinapudnona, diak kayat nga aramiden dayta. Ngem pinadasko ket nasarakak a nabunga unay. Addaanak ti 37 a panagsarungkar manipud panangasaba iti telepono ken ad-adu nga iyad-adalan ngem iti kabaelak nga ikondukta!” No situtulokkayo a mangpadas iti panangasaba iti telepono, mabalin nga agballigikayo met.

⁴ Panangyurnos iti Panangasaba iti Telepono: Ti manangaywan iti serbisio ti mangimatmaton iti trabaho a panangasaba ti kongregasion. Depende iti kasapulan, mabalin a mangdutok ti bagi dagiti panglakayen iti sabali a panglakayen wenno kualipikado a ministerial nga adipen a tumulong kenkuana a mangyurnos iti panangasaba iti telepono.

⁵ Sadino ti pangalaanyo kadagiti numero ti telepono? No ti nainget-pannakaguardiana a patakder ket addaan ti bukodna a listaan ti telepono, mabalinyo nga alaen dagiti numero sadiay. No saan, mabalinyo a kopiaen ti nagan dagiti agnanaed iti dayta manipud iti directory nga adda iti lobby ket birokenyo dagita a nagan iti libro a nakailistaan dagiti numero ti telepono.

⁶ No sarungkaran dagiti panglakayen dagiti naidalit wenno baldado, alistoda koma a mangparegta kadagitoy a makiraman iti panangasaba iti telepono. Nalabit maysa a panglakayen ti agtelepono iti sumagmamano a tattao bayat nga agpaliiw ti agibumbunannag. Kalpasanna mabalin a ti agibumbunannag met ti agtelepono. Adu ti mangbusbusbos iti sumagmamano a minuto kada aldaw iti daytoy a trabaho, ket pudno a magustuanda.

⁷ Dagiti Singasing Tapno Agballigi: Idi imbaon ni Jesus dagiti adalanna a mangasaba, “imbaonna ida a sinagdudua.” (Luc. 10:1) Apay? Ammona a no adda kaduada, makaadal ken maparegtada ti maysa ken maysa. Pudno met dayta iti panangasaba iti telepono. No adda kaduayo nga agtelepono, makaadalkayo iti maysa ken maysa, mapagsaritaanyo ti resultana, ken makaipaaykayo iti singasing para iti sumaruno a pannakisarita. Uray bayat ti panagtelepono, matulonganyo ti maysa ken maysa a mangbirok iti umiso nga impormasion.

⁸ Tapno nalawag ti panunot ken konsentrasionyo, agtugaw iti lugar a mabalinyo nga ikabil iti sanguananyo dagiti usarenyo a mangasaba​—Biblia, libro a Panakirinnason, broshur a Kalikaguman, dagiti magasin, ken dadduma pay. Isuratyo ti sumagmamano a presentasion, ket ikabilyo iti lugar a nalakayo a mabasa. Sisasaganakayo a mangirekord kadagiti umiso ken kompleto nga impormasion, agraman ti petsa ken oras ti aldaw tapno ammoyo no kaano a surnadan ti nasarakan nga interes.

⁹ Masansan a naannad dagiti tattao no makangngegda ti saan a pamiliar a boses iti telepono. Isut’ gapuna nga agbalinkayo a nabara, nainggayyeman, ken naannad. Ti bosesyo laeng ti mabalin a pangibatayan ti bumalay no kasano ti katatao ken kapudnoyo. Natanang ken agsao manipud iti pusoyo. Nainayad ken nalawag koma ti panagsaoyo ken mangngegda koma ti timekyo. Ikkanyo ti bumalay iti gundaway nga agsao. Usarenyo ti kompleto a naganyo, ken ibagayo nga agnanaedkayo iti isu met laeng a komunidad. Ditay kayat a panunoten dagiti tattao nga aglaklakotayo babaen ti telepono. Imbes nga ibagayo nga aw-awaganyo ti amin nga agnanaed iti maysa a pasdek wenno pasilidad, ibagayo nga isu a mismo ti rantayo a kasarita.

¹⁰ Dagiti Pannakisarita iti Telepono: Adu dagiti introduksion iti panid 9-15 iti libro a Panakirinnason a maibagay iti panangasaba iti telepono. Mabalinyo a kunaen: “Nagteleponoak agsipud ta saan a posible a makasaritakayo iti personal. Ti panggep no apay nga immawagak ket tapno kiddawek ti opinionyo maipapan iti nagpateg unay a saludsod.” Kalpasanna ibagayo ti saludsod.

¹¹ Ti umuna a presentasion iti sidong ti paulo a “Krimen/Kinatalged” ti mabalinyo nga usaren a kastoy: “Komusta. Siak ni ____. Agkakaarrubatayo met laeng. Ipasiguradok kadakayo a saanak nga aglaklako iti aniaman wenno agsursurbey. Immawagak gapu ta maseknanak iti personal a kinatalged. Agraraira ti krimen iti aglawlawtayo, ket apektaranna ti biagtayo. Iti panagkunayo, addanto kadi tiempo a mabalinan ti amin a tao ti magna iti kalsada iti rabii a sitatalged? [Palubosan a sumungbat.] Bay-anyo a basaek no ania ti inkari ti Dios nga aramidenna.”

¹² Nasayaat ti resulta ti direkta a panangitukon iti panagadal iti Biblia babaen ti telepono. Mabalin a maidemostra ti panagadal iti sumagmamano a minuto. Saludsodenyo no mabalin a masarungkaran iti pagtaenganna tapno maituloy ti panagadal, ngem no agkedked ti tao, itukon nga itultuloy ti panagadal babaen ti telepono iti sabali nga aldaw.

¹³ Iti ngudo ti saritaan, mangpanunotkayo iti banag a mabalin a panggapuanyo a mangsarungkar iti tao iti pagtaenganna wenno mangibuson iti literatura para kenkuana. No agkedked ti tao a mangited iti address-na, saludsodenyo no mabalin manen a teleponuanyo. Masapul iti sumagmamano nga awag sakbay a mariknana a natalged a mangawis kenka iti pagtaenganna.

¹⁴ Panagtignay nga Umuna: Inrugi ti 15-anyos a kabsat a babai ti mangasaba iti bigat babaen ti panagtelepono. Nakasaritana ti maysa a babai nga immanamong a mangala iti libro a Pannakaammo. Idi intulod ti kabsat a babai ti libro iti pagtaenganna, kayat a maammuan ti babai no kasano a naammuan ti kabsat ti numero ti teleponona, idinto ta saan met a nailista. Nagkamali gayam ti nai-dial ti kabsat! Nagpayadal ti babai ket maysa itan a di-bautisado nga agibumbunannag.

¹⁵ Maysa a kabsat a babai ti naikkan iti teritoria a kasabaanna babaen ti telepono ngem saanna nga inaramid dayta iti las-ud ti tallo a lawas gapu ta mabuteng. Ania’t nangted kenkuana iti tured a mangirugi? Nalagipna ti artikulo ti Agriingkayo! iti Enero 22, 1997, a napauluan iti “Inton Nakapuyak, Iti kasta Nabilegak.” Maipapan dayta iti maysa a Saksi a mangaskasaba babaen ti telepono iti laksid ti pisikal a limitasionna. Kinuna ti kabsat: “Nagkararagak ken Jehova maipaay iti bileg. Kiniddawko nga ipaayna kaniak dagiti umiso a sasao a mangasaba.” Ania ti resulta ti umuna nga aldaw a panangasabana iti telepono? Kunana: “Sinungbatan ni Jehova ti kararagko. Dimngeg dagiti tattao kaniak, ket nakayurnosak iti maysa a panagsarungkar.” Idi agangay ti panangasabana iti telepono ket nagresulta iti maysa a panagadal iti Biblia. Kunana kalpasanna: “Naminsan pay a sinuruannak ni Jehova nga agtalek kenkuana, saan nga iti bagik.”​—Prov. 3:5.

¹⁶ Ti panangipakaammo iti kinapudno babaen ti telepono ket nagbalin a naballigi a pamay-an ti panangikasaba iti naimbag a damag. Agsaganakayo a naimbag, ken makipaset a naimpusuan. Dikay maupay no saan a nasayaat ti reaksion dagiti damo a makasabaanyo iti telepono. Ikararagyo ti panangiwanwan ni Jehova, ken agimtuodkayo kadagiti dadduma a mangaskasaba iti kastoy a makapainteres a wagas. Buyogen ti tarigagay nga awan ti maliwayan iti teritoriatayo, naan-anay koma nga itungpaltayo ti ministeriotayo buyogen ti kinaganat.—Rom. 10:13, 14.