“Iti Dios Amin a Bambanag Mabalin”
1 Ti kangrunaan a trabaho ti kongregasion Kristiano isut’ panangikasaba iti mensahe ti Pagarian iti sangalubongan. (Mat. 24:14) Nagdakkelan a trabaho dayta. Kadagiti adu nga agpalpaliiw, pagarupenda a saan laeng a dagiti banag a kupkupikopantayo ti kasapulan tapno maitungpal dayta. Kadagiti dadduma, narigat a panunoten no kasano a maitungpal daytoy nga annongen gapu ta maipaspasangotayo iti pannakauy-uyaw, ibubusor, ken pannakaidadanes. (Mat. 24:9; 2 Tim. 3:12) Kombinsido dagiti managduadua nga imposible a mairingpas daytoy a trabaho. Nupay kasta, kinuna ni Jesus: “Iti Dios amin a bambanag mabalin.”—Mat. 19:26.
2 Nagsayaat nga Ulidan a Tuladen: Inrugi ni Jesus ti ministeriona kas maysa a tao a maibusor iti intero a sistema ti bambanag. Tapno saan nga agballigi, di mailadawan ti panangibabain kenkuana dagiti bumusbusor, agingga iti nakas-ang a panangpapatayda kenkuana. Ngem buyogen panagtalek a kinuna ni Jesus idi kamaudiananna: “Pinarmekko ti lubong.” (Juan 16:33) Anian a nakaskasdaaw a nagapuanan!
3 Imparangarang dagiti adalan ni Jesus ti isu met laeng a natured nga espiritu ken regta iti Nakristianuan a ministerio. Adu ti nasapsaplit, nababaut, naipisok iti pagbaludan, ken napapatay pay ketdi. Ngem “agragrag-oda agsipud ta naibilangda a maikari a maibabain maigapu iti naganna.” (Ara. 5:41) Nupay di pagarupen nga agballigida, nairingpasda ti kasla imposible nga annongen a panangikasaba iti naimbag a damag “agingga iti kaadaywan a paset ti daga.”—Ara. 1:8; Col. 1:23.
4 No Kasanotay a Makapagballigi iti Kaaldawantayo: Sireregta met nga ar-aramidentayo ti trabaho a panangikasaba iti Pagarian iti laksid dagiti kasla di madaeran a lapped. Ngem agbalballigitayo nupay adda dagiti panangiparit, pannakaidadanes, pannakaibalud, ken dadduma pay a naranggas a tignay a pangpasardeng kadatayo. Kasano a posible daytoy?“‘Saan a babaen iti puersa militar, wenno uray babaen iti bileg, no di ket babaen iti espirituk,’ kinuna ni Jehova ti buybuyot.” (Zac. 4:6) Yantangay ni Jehova ti adda iti likudantayo, awan ti makapasardeng iti trabahotayo!—Roma 8:31.
5 No mangasabatayo, awan rason nga agalikakatayo wenno agamak wenno mariknatayo a ditay kabaelan. (2 Cor. 2:16, 17) Addaantayo kadagiti nabileg a rason a sipipinget nga agtultuloy a mangisaknap iti naimbag a damag ti Pagarian. Babaen ti tulong ni Jehova, mairingpastayo ti kasla “di mabalin”!—Luc. 18:27.