Nasayaat a Kababalin—Galad a Pakabigbigan Dagiti Nadiosan a Tattao
1 Manmano itan ti addaan iti nasayaat a kababalin. Apay? Agap-apura dagiti tattao nga uray la masansan a malipatanda dagiti nadayaw nga ugali, kas iti panangibaga iti “Pangaasim,” “Pagyamanan,” wenno “Dispensarendak.” Kaaduanna, agparang nga iti natauan a kagimongan nasaknap ti kinaawan ti pannakaseknan ken konsiderasion. Ti Sao ti Dios impakpakaunana a dumakes dagiti kababalin kadagiti maudi nga aldaw idi kunaenna a dagiti tattao ‘managayatdanto iti bagbagida, napalangguad, natangsit, saan a managyaman, awanan nainkasigudan nga ayat, awanan panagteppel, awanan panagayat iti kinaimbag, ken natangken ti uloda.’ (2 Tim. 3:1-4) Dagiti kasta nga ugali mamataudda kadagiti dakes a kababalin. Kas nadiosan a tattao, masapul nga agaluad dagiti Kristiano tapno saanda a maaringan iti daytoy lubong nga awan panagraemna iti sabsabali.
2 Ania Dagiti Nasayaat a Kababalin? Madeskribir ti nasayaat a kababalin kas ti empatia kadagiti sabsabali, ti abilidad nga agbiag a sikakappia iti sabsabali. Dagiti aspeto ti nasayaat a kababalin ket nakonsiderasion, nadayaw, naasi, nasingpet, nataktika, ken mannakipagrikna. Mapatanor dagitoy a galad gapu iti panagayat ti maysa iti Dios ken kaarruba. (Luc. 10:27) Awan ti gatadda, ngem nakapatpategda unay iti panangpasayaat iti relasiontayo kadagiti sabsabali.
3 Impasdek ni Jesus ti perpekto nga ulidan. Sinalimetmetanna dagiti nadiosan a pagalagadan. Saan pulos a nagkamali. Inalagadna a kanayon ti Nabalitokan a Linteg: “Kas iti kayatyo nga aramiden kadakayo dagiti tattao, isu met laeng ti aramidenyo kadakuada.” (Luc. 6:31) Ditay kadi agamanga iti kinamannakipagrikna ken naayat a kababalin ni Jesus iti pannakilangenna kadagiti adalanna? (Mat. 11:28-30) Dagiti nasayaat a kababalinna ket saan a naibatay kadagiti pagannurotan nga intuyang dagiti libro ti etiketa. Nagubbogda manipud iti napudno ken manangapresiar a puso. Pinatanor ni Jesus dagiti nasayaat a kababalin manipud kinaagtutubona ken babaen ti panangyaplikarna kadagiti nadiosan a prinsipio. Masapul nga ikagumaantayo a tuladen ti nasayaat nga ulidanna.
4 Kaano a masapul nga iparangarang dagiti Kristiano dagiti nasayaat a kababalin? Kadagiti laeng kadi naisangsangayan nga okasion, no kayatda nga ipakita a nasingpetda? Masapul laeng aya dagitoy no adda kayatda a guyugoyen? Saan! Rumbeng nga ipakitatayo ti nasayaat a kababalin iti amin a gundaway. Kadagiti ania koma a partikular a pamay-an a pakaseknantayo daytoy iti pannakitimpuyogtayo iti maysa ken maysa iti kongregasion?
5 Idiay Kingdom Hall: Ti Kingdom Hall ket lugar a pagdaydayawantayo. Addatayo sadiay agsipud ta inawisnatayo ni Jehova a Dios. Iti dayta nga anag a datayo ket sangaili. (Sal. 15:1) Mapagulidanantayo kadi a bisita no addatayo iti Kingdom Hall? Umiso kadi ti panagkawkawes ken panaglanglangatayo? Siempre, liklikantayo koma ti agkawes a kasual wenno nailubongan. Tumabtabunoda man kadagiti kombension wenno gimong ti kongregasion, nakadkadlaw dagiti tattao ti Dios gapu iti nadayaw a langada a maitutop kadagiti mangibagbaga a nauneg ti panagraemda iti Dios. (1 Tim. 2:9, 10) Iti kasta, ipakpakitatayo ti maiparbeng a konsiderasion ken panagraem agpadpada iti nailangitan a Manangsangaili ken kadagiti dadduma a sangaili a naawis.
6 Sabali pay a pamay-an a maipakitatayo ti nasayaat a kababalin isu ti itatabuno a nasapa kadagiti gimong. Kinaagpaysuanna, saan a kanayon a nalaka daytoy. Mabalin nga adayo unay ti pagnanaedan ti dadduma wenno adu ti kameng ti pamiliada nga agrubbuat. Mapadayawan a talaga ti panangikagumaanda a regular a tumabuno kadagiti Nakristianuan a gimong. Nupay kasta, napaliiw a kadagiti dadduma a kongregasion, agarup 25 porsiento kadagiti agibumbunannag ti ugalida a sumangpet kalpasan ti panglukat a kanta ken kararag. Serioso daytoy a banag. Rumbeng a laglagipentayo a ti nasayaat a kababalin ket mainaig iti panangikabilangan iti rikna ti sabsabali. Ni Jehova, ti naparabur a Nangsangaili kadatayo, inyurnosna dagitoy a naespirituan a piesta para iti pagimbagantayo. Maipakitatayo ti panagyaman ken pannakaseknantayo iti riknana babaen ti kinamanagsapsapatayo. Kasta met, ti isasangpet a naladaw kadagiti gimong ket makasinga ken mangipakita iti kinaawan panagraem kadagidiay nasapa.
7 No agtitipontayo, sipsiputantayo kadi no siasino dagiti damoda ti tumabuno? Ti panangabrasa kadakuada ket paset ti nasayaat a kababalin. (Mat. 5:47; Roma 15:7) Ti naayat a panangkablaaw, nabara a pannakialamano, nainggayyeman nga isem—babassit dagitoy a banag, ngem tumulongda a mangipabigbig a pudnotayo a Kristiano. (Juan 13:35) Kalpasan ti damo nga itatabunona iti Kingdom Hall, kinuna ti maysa a lalaki: “Iti maysa laeng nga aldaw, ad-adu ti naam-ammok a pudno a naayat a tattao nupay naan-anay nga estrangheroda, ngem iti naam-ammok iti simbaan a dimmakkelak. Nalawag a nabirokakon ti kinapudno.” Kas resultana, binaliwanna ti panagbiagna ket nabautisaran pito a bulan kalpasanna. Wen, kasta kabileg ti epekto dagiti nasayaat a kababalin!
8 Saanyo a liplipatan dagiti lallakay ken addaan iti an-annayen iti nagtetengngaantayo. No nasayaat ti kababalintayo kadagiti estranghero a maam-ammotayo, saan aya a kastatay met “nangnangruna kadagidiay nainaig kadatayo iti pammati”? (Gal. 6:10) Agaplikar daytoy a prinsipio: “Masapul nga ipakitaam ti konsiderasion ti kinatao ti maysa a lakay [wenno baket].” (Lev. 19:32) Saan koma a pulos a maliwayan dagitoy no agtataripnongtayo.
9 Panagatension a Naimbag: Nasayaat ti kababalintayo no umimdengtayo a naimbag no madama ti naespirituan nga instruksion. Bayat dagiti gimong ti kongregasion, agpalawag dagiti Kristiano a ministro ti Dios tapno maiburayda ti naespirituan a sagut a mangpabileg kadatayo. (Roma 1:11) Mangipakita a kurang ti panagraemtayo no agdungsa, mangngegda nga agngalngaltayo, maulit-ulit nga agarasaas iti katugawtayo, di nesesita a panagturong iti banio, agbasa iti di mainaig a banag, wenno agasikaso iti sabali a banag bayat ti gimong. Mapagulidanan koma dagiti panglakayen iti daytoy a banag. Ti Nakristianuan a kababalin tignayennatayo a mangipakita iti umiso a panagraem iti ispiker ken iti naibatay-Biblia a palawagna babaen ti naan-anay a panagatensiontayo kenkuana.
10 Kanayonanna, gapu iti konsiderasiontayo agpada iti ispiker ken kadagiti agdengdengngeg, saan koma a masinga ti panagtataripnongtayo gapu kadagiti electronic pager ken cellular phone.
11 Dagiti Kababalin ken Annak: Alerto koma a kanayon dagiti nagannak a mangsiput iti kababalin dagiti annakda iti Kingdom Hall. No mangrugi nga agsangit wenno agalikuteg ti maysa nga ubing bayat ti gimong ket singaenna ti sabsabali, nasaysayaat no dagus a mairuar ti ubing tapno pasardengen daytoy. Mabalin a narigat daytoy no dadduma, ngem laglagipenyo a daytoy ti mangipakita a sipapanunottayo iti rikna ti sabsabali. Dagiti nagannak nga adda naalikuteg nga ubbingda masansan a pilienda ti agtugaw iti likud ti pagtataripnongan tapno bassit laeng ti masingada no kas pagarigan ta kasapulan a panawanda ti tugawda. Siempre, dagiti dadduma a tumabuno maipakitada ti maiparbeng a konsiderasion kadagiti pamilia babaen ti panangbakanteda iti makinlikud a pagtugawan tapno aramaten dagita a pamilia, no kasapulan.
12 Masapul a sipapanunot met koma dagiti nagannak iti kababalin dagiti ubbingda sakbay ken kalpasan dagiti gimong. Saan koma nga agtataray dagiti ubbing iti uneg ti pasdek, ta mabalin nga agresulta daytoy iti aksidente. Mabalin a napeggad met ti panagtataray iti ruar ti Kingdom Hall, nangruna iti rabii ta nasipnget. Ti panagaariwawa iti ruar ket makasinga kadagiti kaarruba ken saan a nasayaat ti iyanninawna no maipapan iti panagdayawtayo. Makomendaran dagiti nagannak a mangikagkagumaan a mangasikaso kadagiti ubbingda agpadpada iti uneg ken ruar ti Kingdom Hall agsipud ta tumulong daytoy iti makaay-ayo a panagtitimpuyogtayo a sangsangkamaysa.—Sal. 133:1.
13 Iti Panagadal ti Libro: Apresiarentayo ti kinamanangsangaili dagiti kakabsattayo a mangipapausar iti pagtaenganda a pakaangayan dagiti gimong ti kongregasion. Mabalin a ramanenna daytoy ti dakkel a panagsagana ken panagsakripisioda. No tumabunotayo, nasken a nasayaat ti kababalintayo ken ipakitatayo ti panagraem ken konsiderasion iti sanikuada. Rumbeng nga agpigadtayo a naimbag sakbay a sumrektayo tapno saan a marugitan ti datar wenno alpombra. Rumbeng nga asikasuen dagiti nagannak dagiti ubbingda, a siguraduenda nga agtalinaed dagitoy iti paset ti pagtaengan a pagad-adalan iti libro. Nupay mabalin a bassit ti grupo ken medio impormal ti kasasaad, liklikantay koma dagiti tignay a mangipakita iti kinaawan panagraem iti pagtaengan ti sabsabali. Kaduaen koma dagiti nagannak dagiti babassit nga annakda no agusarda iti banio. Kanayonanna, agkawestayo koma a kas iti panagkawestayo no mapantayo iti Kingdom Hall yantangay ti panagadal iti libro ket maysa a gimong ti kongregasion.
14 Nasken Dagiti Nasayaat a Kababalin: Saan laeng a pagimbagan ti ministeriotayo ti panangalagad iti Nakristianuan a kababalin no di pay ket ad-adda a pasayaatenna ti relasiontayo iti sabsabali. (2 Cor. 6:3, 4, 6) Kas agdaydayaw iti naragsak a Dios, natural koma kadatayo ti agisem, mannakibagay, ken uray iti panangaramid iti babassit a naasi a bambanag a mangparagsak iti sabsabali. Dagitoy a nasayaat a galad pagbalinenna a makaay-ayo ti biagtayo kas nadiosan a tattao.