United by Divine Teaching—Maysa a Buya ti Pudno a Panagkaykaysa Dagiti Agkakabsat
Maysa a manangaywan iti sirkito ti nakikadua iti panangyadal iti Biblia iti maysa a babai a di pay nakapadas a makigimong iti kongregasion. Inawisna ti babai a mangbuya iti video a United By Divine Teaching. Nakigimong iti dayta a lawas ket kinunana a naragsakan unay iti itatabunona. Apay a kasta ti kaepektibona daytoy a video? Nagustuanna ti nabuyana a nagsayaat a panagkaykaysatayo kas agkakabsat iti tengnga ti naranggas, napnuan gura a lubong.—Juan 13:35.
Buyaenyo daytoy a video tapno maammuan ken mariknayo ti talna ken ayat a tagtagiragsaken dagiti Saksi ni Jehova iti intero a daga. Kalpasanna, utobenyo dagitoy a saludsod:
(1) Apay a maitutop a “Nadiosan a Panangisuro” ti tema ti 1993-94 a kombension?—Mik. 4:2.
(2) Aniat’ kaipapananna kadagiti dadduma a pamilia ti kinapudno a masarakan iti Biblia? Aniat’ kaipapananna dayta kadakayo?
(3) Apay a napateg ti agpaisuro ken ni Jehova?—Sal. 143:10.
(4) Ania dagiti pakarigatan iti panangisagana kadagiti internasional a kombension?
(5) Ania ti nakitayo a kaitungpalan ti Salmo 133:1 ken Mateo 5:3 kadagiti Nakristianuan a kombension a tinabunuanyo?
(6) Ania a publiko a pammaneknek ti mangipakita iti nabileg nga epekto ti nadiosan a sursuro?—Apoc. 7:9.
(7) Ania ti kadakkelan pay laeng a bautismo dagiti pudno a Kristiano?
(8) Ania a sasao da Mikias, Pedro, ken Jesus ti matungtungpal kadagiti Saksi ni Jehova?
(9) Para kadakayo, ania ti mangpaneknek a saan laeng a tagtagainep ti maysa a naragsak ken nagkaykaysa a natauan a pamilia?
(10) Kadagiti siasino nga ipabuyayo daytoy a video, ken apay?
Kalpasan a nabuyana daytoy a video, kastoy ti nagsayaat a konklusion ti maysa a kabsat a babai: “Gapu iti video, ad-adda a silalagipak a nagadu a kakabsat a Kristiano iti sangalubongan ti sisusungdo nga agserserbi ken Jehova iti daytoy a mismo a kanito. . . . Anian a nagpateg ti panagkaykaysatayo nga agkakabsat!”—Efe. 4:3.