‘Agbalinkayo a Nabaknang iti Nasayaat nga Ar-aramid’

¹ Bayat dagiti naudi a tawen ti naregta a ministeriona, nasged a nakipagtrabaho ni apostol Pablo kada Timoteo ken Tito. Iti tunggal maysa kadakuada, nagsurat iti agpada a sasao ti pammaregta. Kinunana ken ni Tito a “dagidiay namati iti Dios maipamaysada ti pampanunotda iti panangtaginayon kadagiti nasayaat nga aramid.” (Tito 3:8) Kinunana ken ni Timoteo a dagidiay mangisaad iti namnamada iti Dios rumbeng nga “agbalinda a nabaknang iti nasayaat nga ar-aramid.” (1 Tim. 6:17, 18) Nasayaat daytoy a balakad para kadatayo amin! Ngem ania ti manggutugot kadatayo a mangitungpal iti nasayaat nga aramid iti biagtayo? Ken ania dagiti espesipiko nga ar-aramid a mabalintayo nga itungpal iti masanguanan?

² Matignaytayo nga agbalin a nabaknang kadagiti nasayaat nga ar-aramid gapu iti pammati ken panagayattayo ken ni Jehova ken gapu iti naisangsangayan a namnama nga impaayna kadatayo. (1 Tim. 6:19; Tito 2:11) Nangnangruna bayat daytoy a paset ti tawen, mapalagipantayo a ni Jehova imbaonna ti Anakna ditoy daga tapno mangalangon kenkuana ken mangilukat iti dalan ti biag para kadagiti amin a maikari a tattao. (Mat. 20:28; Juan 3:16) Daytoy ti mailawlawag a naimbag bayat ti Panglaglagip iti ipapatay ni Kristo inton Marso 28. Gapu iti namnamatayo a magun-od ti biag nga agnanayon, saantayo kadi a matignay a mangaramid iti amin a kabaelantayo nga ‘agbalin a nabaknang iti nasayaat nga ar-aramid’? Siempre matignaytayo! Ania nga ar-aramid ti mabalintayo nga itungpal ita?

³ Nasayaat nga Ar-aramid nga Itungpaltayo Inton Marso ken Kalpasanna: Sigurado a tumabunotayo iti Memorial​—ti kapatgan a pagteng ti tawen para kadagiti Saksi ni Jehova iti sangalubongan. (Luc. 22:19) Ngem kayattayo nga iranud ti rag-o dayta nga okasion iti ad-adu pay a tattao no mabalin. Kitaenyo ti report ti serbisio iti 2002 Tinawen a Libro, ket makitayo nga idi napalabas a tawen kadagiti adu a daga iti sangalubongan, mamitlo, mamimpat, maminlima, wenno ad-adu pay a daras nga ad-adu ti timmabuno iti Memorial ngem iti bilang dagiti agibumbunannag. Kasapulan la ketdi ti naanep a panangikagumaan ti amin a kakabsat iti kongregasion tapno nasaknap a maiwaras ti imbitasion para iti Memorial iti intero a teritoriada. Gapuna, kayattayo a busbosen ti adu a tiempo no mabalbalin manipud ita agingga Marso 28 a mangawis kadagiti tattao a tumabuno iti Memorial, a tulongan ida a mangadal iti maipapan iti namnama a pannakaisalakan.

⁴ Masansan a nasayaat ti paniempo bayat ti Abril ken bakasion dayta dagiti estudiante. Kasanotayo nga epektibo a mausar dagitoy a paborable a gundaway iti panagbalin a “nabaknang iti nasayaat nga ar-aramid”? Babaen ti agtultuloy a narayray a pannakiraman iti trabaho a panangikasaba iti naimbag a damag, nga agbalin a “naregta iti nasayaat nga ar-aramid.” (Tito 2:14; Mat. 24:14) No saankayo a makapagserbi nga auxiliary pioneer inton Marso, maaramidyo kadi dayta inton Abril ken/wenno Mayo? No agpayunirkayo inton Marso, maitultuloyyo kadi?

⁵ Mabigbig dagiti mangmangged a mabalinda ti mangasaba iti maysa nga oras wenno nasursurok pay bayat nga agturongda iti pagtrabahuan, mangasaba iti lansangan wenno agsarungkar kadagiti tattao nga agtartrabaho kadagiti pagnegosiuan a nasapa nga aglukat. Iti oras ti pangaldaw, busbosen ti dadduma ti sumagmamano a tiempoda tapno mangasaba. Nakita ti dadduma a mabalin ti mangyadal iti Biblia kadagiti katrabahuanda bayat dayta nga oras. Adu nga agtagtagibalay nga assawa a babbai ti nakailatang iti tiempo a mangasaba bayat nga adda dagiti annakda iti eskuelaan. Babaen ti nasapsapa a panagriing iti sumagmamano nga aldaw a mangaywan kadagiti annongen iti pagtaengan, ad-adu ti panawenda bayat ti aldaw a mangasaba ken mangisuro.—Efe. 5:15, 16.

⁶ Uray no dikayo makapag-auxiliary pioneer, mabalin a mayurnosyo ti eskediulyo tapno ad-adu ti maaramidanyo iti ministerio, nga aramidenyo ti amin a kabaelanyo nga ‘agaramid iti naimbag, nga agbalin a nabaknang iti nasayaat nga ar-aramid, nga agbalin a naparabur, sisasagana a mangiranud’ iti kinapudno kadagiti sabsabali.—1 Tim. 6:18.

⁷ Laglagipenyo ti Nagsayaat a Trabaho a Panagaramid iti Adalan: Kada tawen adda dagiti interesado a tumabuno iti Memorial. Mabalin kadi a ti dadduma iti kongregasion ipaayanda iti atension dagidiay tumabuno ngem saan pay nga agad-adal? Mabalin kadi a masarungkaran dagitoy tapno matulonganda a rumang-ay iti naespirituan? Mabalin a ti dadduma kadagitoy a tumabuno iti Memorial ket kabagian dagiti Saksi. Nalabit dagiti dadduma agad-adalda iti naglabas ket masapulda laeng ti maparegta tapno maituloy ti panagadal ken regular a pannakigimong. Anian a rag-otayo no makitatayo a makitimpuyogda kadatayo kas aktibo nga ad-adipen ni Jehova!

⁸ No ad-adda a makiramantayo iti ministerio bayat ti Marso ken kalpasanna, masapulantayo la ketdi ti ad-adu nga interesado a tattao a sarungkarantayo. Padasenyo ti mangibati kadakuada iti saludsod ket ikariyo a sungbatanyo dayta iti panagsubliyo. Adda panggapuantayo nga agsarungkar no aramidentayo dayta. Nasaysayaat no dagdagus nga agsarungkartayo. No saantayo a nairugi ti panagadal iti damo nga isasarungkar, agingga a posible ikagumaantayo nga irugi dayta inton agsublitayo.

⁹ No mangasabatayo iti lansangan, ikagumaantayo koma ti makisao kadagiti tattao. Adu nga agibumbunannag ti nakaala kadagiti nagan, address, ken numero ti telepono dagiti interesado a tattao a nakasaoda bayat ti panangasaba iti lansangan. No ti nakatungtongyo a tao ket saan nga agnanaed iti teritoriayo, agalakayo iti Please Follow Up (S-43) a pormas iti Kingdom Hall, suratanyo, ket itedyo iti sekretario ti kongregasion, nga isu ti mangipatulod iti dayta iti kongregasion a makinteritoria iti pagnanaedan dayta a tao. No saan a maaramidan dayta ti kongregasion, ipatulodna iti sanga nga opisina. Iti kasta a pamay-an, masukay ti interes dayta a tao.

¹⁰ No makaalakayo iti numero ti telepono ngem saan nga address, agsarungkarkayo ngarud babaen ti panagtelepono iti dayta a tao. Isaganayo a nasaksakbay ti kayatyo nga ilawlawag. Nakasagana koma ti libroyo a Panakirinnason para iti nadaras a reperensia. Naballigi ti dadduma a nangyadal kadagiti indibidual babaen ti telepono, agraman dagidiay narigat a madanon iti pagtaenganda. Maysa a kabsat a babai ti nagkiddaw iti numero ti telepono kadagiti interesado a babbai a naam-ammona iti panangasaba iti binalaybalay, ket nagbanaganna nakairugi iti dua a panagadal iti Biblia.

¹¹ Makibinnadang Kadagiti Panglakayen iti Panangtulong Kadagiti Di Aktibo: Interesado unay dagiti panglakayen a mangipaay iti naayat nga atension kadagiti di aktibo. Adu kadagitoy ti nagtignay a mismo tapno tumabuno manen kadagiti gimong ti kongregasion. Mabigbigda a masapul ti nasinged a pannakitimpuyogda iti organisasion ni Jehova tapno maaddaanda iti naespirituan a kinatalged a nadeskribir iti Salmo 91. Dadduma kadagitoy ti nakasagana manen a makiraman iti tay-ak ti serbisio. No adda dagiti di aktibo a tumabuno iti Memorial ita a bulan, mabalin a kayatda ti personal a mayadalan iti Biblia. No kasta ti kasasaad, tudingan dagiti panglakayen ti maysa a kabsat a mangyadal kadagidiay agtarigagay a mayadalan. No makiddaw a tumulongkayo iti kastoy a pamay-an, maapresiar unay ti kooperasionyo.—Roma 15:1, 2.

¹² ‘Taginayonenyo Dagiti Nasayaat nga Aramid’: Adu a nag-auxiliary pioneer iti maysa wenno ad-adu pay a bulan ti nakabigbig a rimmang-ay ti aktibidadda iti tay-ak kadagiti simmaganad a bulan. Naam-ammoda dagiti interesado a tattao a masapul a masarungkaran. Daytoy ti nangtignay kadakuada nga agbalin nga ad-adda a naanep a mangasaba tapno makatungtongda manen dagiti interesado a tattao. Dadduma ti nakairugi iti panagadal, ket dayta ti nangtulong kadakuada nga ad-adda a makiraman iti ministerio.

¹³ Nakasarak dagiti dadduma iti kasta unay a rag-o iti ad-adu a pannakiraman iti trabaho a panangasaba ken panagaramid iti adalan isut’ gapuna a natignayda a mangtingiting iti prioridadda. Kas resultana, dadduma ti nangkissay iti sekular a trabahoda ket nagtultuloyda nga auxiliary pioneer. Dadduma ti nakapagserbi kas regular pioneer. Ad-adda a nagtalekda iti Dios ket saan a kadagiti banag a mabalin nga itukon ti lubong. Nabigbigda a ti panagbalin a “naparabur, sisasagana a mangiranud,” ket mangyeg iti nabaknang a bendision manipud ken ni Jehova ken nangpabileg iti namnamada a matagiragsak ti “pudpudno a biag.” (1 Tim. 6:18, 19) Siempre, no adu ti agpayunir, magunggonaan ti intero a kongregasion. Pagaayat dagiti payunir a saritaen dagiti kapadasanda ken awisenda ti sabsabali a makikadua kadakuada iti ministerio, ket daytoy ti mangpasayaat iti naespirituan a kasasaad ti kongregasion.

¹⁴ Agbalintayo koma amin a “nabaknang iti nasayaat nga ar-aramid” bayat ti tiempo ti Memorial ken kalpasanna babaen ti panangparang-ay iti pannakiramantayo iti Nakristianuan a ministerio. Ipakitatayo koma ti apresasiontayo iti inaramid ni Jehova a panangipaay kadatayo iti namnama nga agbiag nga agnanayon iti nalinteg a baro a lubong.—2 Ped. 3:13.