Saludsod
◼ Ania ti rumbeng a laglagipentayo no agusartayo iti cellular phone ken electronic pager?
Iti nganngani sadinoman nga ayantayo, mabalin a makasaritatayo ti maysa a tao babaen dagita nga alikamen. Nupay makatulong ti cell phone ken pager, masapul a liklikantayo nga usaren dagitoy kadagiti saan a maitutop a tiempo tapno saan a masinga ti ministerio wenno dagiti Nakristianuan a gimongtayo. Kasano a makasinga dagitoy?
Utobenyo ti epektona no aguni ti cell phone wenno ti pager-tayo bayat nga adda kaskasabaantayo. Ania ngata ti panunoten ti bumalay? Ania ti maibatitayo nga impresion no isardengtayo a kasabaan ta sungbatantayo ti awag? Saantayo la ketdi a kayat ti makaaramid iti aniaman a manglapped kadagiti sabsabali a dumngeg iti mensahe ti Pagarian. (2 Cor. 6:3) Gapuna, no agitugottayo iti cell phone wenno pager, nasken nga iddepentayo tapno saan a makasinga kadatayo wenno kadagiti sabsabali bayat a makipaspasettayo iti ministerio iti tay-ak.
No ngay agur-uraytayo bayat a mangaskasaba dagiti sabsabali? No mangasaba ti rantatayo iti dayta a kanito, saan kadi a rumbeng a naipamaysa ti panunottayo iti dayta nga aktibidad? Gapu iti panagraemtayo iti sagrado a panagserbi, pangngaasiyo ta aramidenyo iti sabali a tiempo ti di nasken a personal a banag wenno sosial a paginteresanyo. (Roma 12:7) Siempre, mabalinyo ti umawag tapno mangasaba wenno makitinnulag a mangaramid iti dayta.
Nangnangruna a ditay agusar iti cell phone no agmanmanehotayo, yantangay ipakita dagiti panagsirarak nga adu ti mapaspasamak nga aksidente gapu iti dayta. Nasken nga agtungpaltayo a kanayon iti aniaman a linteg a mangiparparit iti panagusar iti cell phone bayat nga agmanmaneho.
Tumabunotayo kadagiti Nakristianuan a gimong, asamblea, ken kombension tapno agdayaw ken ni Jehova ken paisuro kenkuana. No matmatantayo a sagrado dagitoy nga okasion, saan aya a matignaytayo koma a mangiddep iti cell phone wenno pager tapno saan a makasinga kadatayo wenno kadagiti sabsabali? No adda ti banag a masapul a tamingentayo a dagus, nasken nga aramidentayo dayta iti ruar ti pagtataripnongan. Ngem no saan a naganat, tamingentayo koma dagiti personal ken sekular a banag sakbay wenno kalpasan ti tiempo ti panagdayawtayo.—1 Cor. 10:24.
Ti panangusartayo iti cellular phone wenno aniaman nga elektroniko nga alikamen kanayon koma nga ipakitana ti konsiderasion kadagiti sabsabali ken nauneg a panangipateg kadagiti naespirituan a banag.