Dagiti Kombension Distrito ken Internasional Gutugotendatayo a Mangidayaw iti Dios!
Dagiti “Idayawyo ti Dios” a Kombension Distrito ken Internasional ket nangipaay iti nagdakkel a pammaneknek. Dagitoy nagpateg a teokratiko nga okasion nagserbida a mangitan-ok iti nagan ni Jehova ken mangparayray iti abilidadtayo a ‘mangipaay ken Jehova ti dayag a kukua ti naganna.’ (Sal. 96:8) Pudno, maikari a maidaydayaw gapu kadagiti nakaskasdaaw a parsuana, a mangyanninaw kadagiti nakaskasdaaw a galadna.—Job 37:14; Apoc. 4:11.
Babaen ti panangusar kadagiti sumaganad a saludsod agraman ti personal a notayo, agsagana ken makiramankayo iti panangrepaso iti programa ti kombension a maangay iti lawas ti Pebrero 23.
1. Kasano a ti awan biagna a parsua maidaydayawna ti Dios, ken kasano a naiduma dayta iti wagas dagiti tattao a mangidayaw kenkuana? (Sal. 19:1-3; “Dagiti Parsua Ipaduyakyakda ti Dayag ti Dios”)
2. Ania a kinapudno a mapaspasamak ita ti iladladawan ti panagbalbaliw ti langa ni Jesus, ken iti ania a pamay-an a magutugot dagiti Kristiano iti daytoy a kinapudno? (Pannakatema a palawag, “Dagiti Nadayag a Naimpadtuan a Sirmata Gutugotendatayo!”)
3. Kasanotayo a masukay ti kinapakumbaba nga imparangarang ni propeta Daniel, ken kasanotayo a magunggonaan iti panangaramid iti dayta? (Dan. 9:2, 5; 10:11, 12; “Maipalgak Kadagiti Napakumbaba ti Dayag ni Jehova”)
4. (a) Ania dagiti tallo a banag a masursurotayo iti padto ni Amos maipapan iti panangukom ti Dios? (Amos 1:3, 11, 13; 9:2-4, 8, 14) (b) Ania a praktikal a leksion ti masursuro dagiti Saksi ni Jehova ita manipud iti ehemplo a pakaballaagan a masarakan iti Amos 2:12? (“Ti Padto ni Amos—Ti Mensahena Para iti Kaaldawantayo”)
5. (a) Ania dagiti peggad ti nalabes a panaginum iti arak, uray no saan a mabartek ti maysa a tao? (b) Kasano a risuten ti nalabes a panaginum iti arak? (Mar. 9:43; Efe. 5:18; “Liklikanyo ti Silo ti Nalabes a Panaginum iti Arak”)
6. Kasanoka a magunggonaan iti baro a publikasion a ‘Kitaem ti Nasayaat a Daga’? (“‘Ti Nasayaat a Daga’—Panirpatan iti Paraiso”)
7. Ania dagiti tallo a pamay-an a mabalintayo nga ‘iyanninaw ti dayag ni Jehova a kasla kadagiti sarming’? (2 Cor. 3:18; “Iyanninawtayo ti Dayag ni Jehova a Kasla Kadagiti Sarming”)
8. Ania ti gubuayan ti di nainkalintegan a pananggura, ken ania ti makatulong kadatayo nga agtalinaed a natarnaw iti laksid ti kasta a pannakagura? (Sal. 109:1-3; “Magurgura nga Awan Gapgapuna”)
9. Ania ti panangmatmat ni Kristo iti kinatan-ok, ken kasano a maammuan ti maysa a tao a nasken a patanorenna a naan-anay daytoy a galad? (Mat. 20:20-26; “Panangtulad iti Panangmatmat ni Kristo iti Kinatan-ok”)
10. Ania ti makatulong kadatayo nga agtalinaed a nakired iti naespirituan iti laksid ti pannakabannogtayo iti pisikal? (“Nabannog Ngem Saan a Napaksuyan”)
11. Ania ti dadduma kadagiti us-usaren ni Satanas a mangitandudo iti kinaulbod, ken ania ti maitutop a Nainkasuratan nga aramiden no adda dagiti aggandat a mangdadael iti pammatitayo? (Juan 10:5; “Agannadkayo iti ‘Timek Dagiti Ganggannaet’”)
12. (a) Kasano a matulad dagiti nagannak ti ulidan ni Jesus a nailanad iti Marcos 10:14, 16? (b) Ania ti magustuam iti baro a libro nga Agsursuroka iti Naindaklan a Mannursuro? (“Dagiti Annaktayo—Napateg a Tawid”)
13. Kasano a dagiti agtutubo idaydayawda ni Jehova? (1 Tim. 4:12; “No Kasano nga Idaydayaw Dagiti Agtutubo ni Jehova”)
14. Ania dagiti eksena iti drama a “Situtured a Panangsaksi iti Laksid ti Ibubusor” ti nabati iti panunotmo?
15. Kasanotayo a matulad ti ulidan nga impaay (a) da Pedro ken Juan? (Ara. 4:10) (b) ni Esteban? (Ara. 7:2, 52, 53) (c) ti kongregasion Kristiano idi umuna a siglo? (Ara. 9:31; drama ken ti palawag nga “Ipakaammoyo ti Naimbag a Damag ‘nga Awan Sarday’”)
16. (a) Determinadotayo a mangidayaw iti Dios kadagiti ania a wagas? (b) Ania ti manamnamatayo no iyaplikartayo dagiti nasursurotayo iti “Idayawyo ti Dios” a Kombension? (Juan 15:9, 10, 16; “‘Agtultuloykayo a Mangpataud iti Adu a Bunga’ a Pakaidayawan ni Jehova”)
No utobentayo dagiti nagsayaat a naespirituan a banag a nasursurotayo iti kombension, matignaytayo a mangyaplikar kadagiti naadaltayo. (Fil. 4:8, 9) Daytoy ti mangpabileg iti determinasiontayo a ‘mangaramid iti amin a banag a maipaay iti dayag ti Dios.’—1 Cor. 10:31.