Saludsod

◼ Kasanotayo a masigurado nga apagisu ti orastayo kadagiti gimong iti kongregasion?

Nagbiit nga aglabas ti oras no adda nasayaat nga ibagbagatayo kadagiti gagayyem. Gapu iti daytoy, mabalin a marigatantayo a mangiparang kadagiti pasettayo iti gimong iti naituding nga oras. Ania ti makatulong?

Mangrugi iti umiso nga oras. No aggigimong ti intero a kongregasion, mabalin a makatulong no awisen ti tallaong nga agtugawdan maysa wenno dua a minuto sakbay a mangrugi ti programa tapno naurnos ti panagrugi ti gimong iti naituding nga oras. (Ecl. 3:1) Dagiti gimong a pakairamanan dagiti babassit a grupo, kas iti taripnong sakbay ti panangasaba, ket saan koma a maitantan tapno laeng mauray dagidiay mabalin a naladaw a sumangpet.

Agsagana a naimbag. Ti tulbek iti apagisu nga oras ket ti panagsagana a nasaksakbay. Panunotem a nasayaat no ania ti panggep ti palawagmo. Ilasinmo dagiti kangrunaan a punto, ken ipaganetgetmo dagitoy. Dika pasinga kadagiti saan unay a napateg a detalye. Pagtalinaedem a simple ti palawagmo. No adda dagiti demostrasion wenno interbiu iti pasetmo, ensayuem ida a nasaksakbay. Aginggat’ mabalin, kitaem no apagisu ti orasyo bayat nga agen-ensayokayo.

Bingaybingayen ti material. No ti pasetmo ket palawag man wenno pagsasaritaan ti tallaong, makatulong no bingaybingayem ti materialmo iti kada benneg. Ikeddengmo no mano a minuto ti busbosem iti kada benneg, ken isuratmo dayta iti pingir ti notam. Kalpasanna, siputam ti orasmo bayat ti panagpalawagmo. Iti panagsasarita ti tallaong, liklikanyo ti nakaad-adu a komento iti panglukat a benneg tapno saankayo nga agap-apura a mangusig kadagiti napatpateg a punto nga adda iti ud-udina. Dagiti mangikonkondukta iti Panagadal iti Pagwanawanan rumbeng a mangipaayda iti umdas nga oras tapno masungbatan dagiti saludsod iti kahon a pangrepaso nga adda iti ngudo ti artikulo. Masapul nga agannadda met tapno dida mabusbos ti naituding nga oras para iti pangserra a kanta ken kararag.

Agngudo iti umiso nga oras. No ti gimong ket buklen ti nadumaduma a paset, kas iti Gimong ti Serbisio, silalagip koma ti tunggal ispiker no kaano a mangrugi ken agngudo ti pasetna. Kasano no lumbesen ti oras ti gimong? Ti maysa wenno ad-adu pay a kabsat mabalin a paababaenna ti pasetna babaen ti panangipamaysana kadagiti kangrunaan a punto ken panangikkatna kadagiti dadduma a detalye. Ti panangaramid iti daytoy ket maysa a pagilasinan iti nasigo a mannursuro.

Kas agdengdengngeg, matulongantayo ti kabsat a mangidadaulo babaen ti panangipaaytayo kadagiti ababa ken nasken laeng a komento. Gapuna, makatulongtayo amin tapno maangay dagiti gimongtayo a “sitatakneng ken sigun iti urnos.”​—1 Cor. 14:40.