Trabaho a Supsuportaran ti Dios
1 Kadagiti adipen ti Dios ita, manmano ti addaan iti nangato nga edukasion, kinabaknang, wenno nalatak iti agdama a sistema ti bambanag. Gapuna, ibilang ti dadduma a tattao a saan a napateg ti ministeriotayo. (Isa. 53:3) Nupay kasta, nangyeg iti liwliwa ken namnama iti minilion a tattao iti intero a lubong ti trabahotayo a panangisuro iti Biblia. Kasano a nagun-od dagiti ordinario a tattao dagiti kasta a nagsayaat a resulta? Babaen laeng iti suporta ti Dios. (Mat. 28:19, 20; Ara. 1:8) “Ti Dios pinilina ti minamaag a bambanag ti lubong,” inlawlawag ni apostol Pablo, “tapno maibabainna dagiti masirib a tattao.”—1 Cor. 1:26-29.
2 Dagiti apostol ken dagiti dadduma pay a Kristiano idi umuna a siglo ket ‘awan adalda ken gagangay.’ (Ara. 4:13) Ngem situtured nga intungpalda ti annongenda a mangikasaba iti naimbag a damag, ket binendisionan ni Jehova dagiti panagreggetda. Iti laksid dagiti lapped ken ibubusor, “nagtultuloy a rimmang-ay ken nagballigi ti sao ni Jehova.” Awan ti makapasardeng iti trabaho gapu ta supsuportaran ti Dios. (Ara. 5:38, 39; 19:20) Kasta met laeng iti moderno a panawen. Uray ti nakaro nga ibubusor dagiti nabileg nga agtuturay dina mapasardeng ti agtultuloy a panagballigi ken irarang-ay ti naimbag a damag.—Isa. 54:17.
3 Pakaidayawan Amin ti Dios: Rumbeng kadi nga agpasindayagtayo gapu iti naanamongan a takdertayo kas ministro ti Dios? Saan. Maipapan iti Nakristianuan a ministerio, insurat ni Pablo: “Addaankami itoy a gameng kadagiti damili a basehas, tapno ti pannakabalin a nalablabes ngem ti gagangay biang koma ti Dios ket saan nga agtaud iti bagbagimi.” (2 Cor. 4:7) Binigbig ni Pablo a maitungpalna laeng ti ministeriona babaen ti bileg nga ipapaay ti Dios.—Efe. 6:19, 20; Fil. 4:13.
4 Bigbigentayo met a maitungtungpaltayo ti trabaho a panangasaba gapu laeng ta ‘nagun-odtayo ti tulong a naggapu iti Dios.’ (Ara. 26:22) Babaen ti kasta a sangalubongan a panangiwaragawag, us-usarennatayo ni Jehova iti naisangsangayan a pamay-an tapno agkintayeg dagiti nasion kas tanda ti nakaam-amak a panangukom a dandanin dumteng. (Hag. 2:7) Anian a pribilehio ti panagbalintayo a ‘katrabahuan ti Dios’ iti nadayag a naespirituan a panagani!—1 Cor. 3:6-9.