Regular a Pannakigimong—Rumbeng nga Ipangpangruna
1 Ipangpangruna dagiti Kristiano a pamilia ti regular nga itatabuno kadagiti gimong ti kongregasion. Ngem mabalin a maysa a karit daytoy gapu kadagiti agdama a kasasaad iti biag. Dagiti kadi trabaho iti balay, sekular a panggedan, wenno leksion iti eskuelaan, ket ag-agawendan ti panawen a nailatang para iti panagdayaw ken ni Jehova? No matmatantayo dagiti bambanag a kas iti panangmatmat ni Jehova, matulongantayo a mangtaginayon kadagiti banag a rumbeng nga ipangpangrunatayo.—1 Sam. 24:6; 26:11.
2 Idi nangayo ti maysa a lalaki nga Israelita iti aldaw ti Sabbath, inggagarana a di inkabilangan ti panangmatmat ni Jehova. Mabalin nga inkalinteganna a para met iti pamiliana wenno bassit laeng a banag daytoy. Ngem babaen ti naipataw a pannusa, impakita ni Jehova a serioso a banag ti panangaramid kadagiti gagangay nga aktibidad kadagiti tiempo a naituding iti panagdayaw.—Num. 15:32-36.
3 Panangsango iti Karit: Adu dagiti mangikagkagumaan a di mangipalubos a ti sekular a trabahoda ti manglapped iti pannakigimongda. Sinango dagiti dadduma daytoy a karit babaen ti pannakisaritada kadagiti amoda, pannakisinnukat iti oras ti panagtrabaho kadagiti katrabahuanda, panangbirok iti ad-adda a maitutop a trabaho, wenno panangpasimple iti panagbiagda. Awan duadua a makaay-ayo unay iti Dios dagiti kasta a panagsakripisio maipaay iti pudno a panagdayaw.—Heb. 13:16.
4 Makakarit met ti panageskuela. “Aramidek ti dadduma a homework-ko sakbay dagiti gimong sa ituloyko dagiti dadduma kalpasan ti gimong,” kuna ti maysa nga agtutubo. No saan a maaramid ti amin a homework kadagiti rabii a maangay dagiti gimong, dagiti dadduma a nagannak ilawlawagda kadagiti mannursuro a ti itatabuno kadagiti Nakristianuan a gimong ket maysa a banag nga ipangpangruna ti pamiliada.
5 Nasken ti panagtitinnulong ken nasayaat a panagplano tapno mairingpas dagiti trabaho iti pagtaengan kas panagsagana iti nasapa nga itatabuno kadagiti gimong kas pamilia. (Prov. 20:18) Uray dagiti ubbing pay nga annak ket mabalin a masursuruan nga agrubuat ken agsagana a mapan makigimong iti naituding nga oras. Babaen ti ulidan dagiti nagannak, maitukitda kadagiti annakda ti kinapateg dagiti gimong.—Prov. 20:7.
6 Bayat a kumarkaro dagiti pakasuotan iti agdama a sistema ti bambanag, napateg a tabunuantayo a kanayon dagiti gimong ti kongregasion. Sapay koma ta itultuloytayo a matmatan dagiti bambanag kas iti panangmatmat ni Jehova ken ipangpangrunatayo ti regular nga itatabuno kadagiti gimong.—Heb. 10:24, 25.