Eskediul ti Pamilia—Dagiti Gimong ti Kongregasion
1 No maysaka a Kristiano nga ama wenno ina, kayatmo a dumakkel dagiti annakmo a mangayat ken agserbi ken ni Jehova ket, inton kamaudianna, magun-odda ti biag nga agnanayon iti baro a lubong nga inkari ti Dios. Kasano a matulongam ida a mangipangpangruna iti biagda ti panagdayaw ken ni Jehova? Ti kangrunaan a pamay-an ket babaen ti ulidan nga ipakpakitam. (Prov. 20:7) Maipapan iti ulidan nga impakita ti Saksi nga inana, kinuna ti maysa a kabsat a babai: “Pulos a saankami a nagsalsaludsod no mapankami makigimong wenno saan.” Indakdakkel daytoy a kabsat ti pannakigimong.
2 Maawatan kadi ti pamiliayo ti panggep dagiti gimong ti kongregasion? Dagiti masursurotayo kadagitoy a gimong pabilgennatayo nga agtultuloy a mangaramid iti pagayatan ti Dios, ken napateg a gubuayan ti pammaregta ti naragsak a pannakilangen kadagiti kakabsattayo. (Isa. 54:13; Roma 1:11, 12) Nupay kasta, kangrunaan a panggep dagiti kasta a gimong ti panangidaydayaw ken ni Jehova “iti tengnga dagiti naguummong a reprep.” (Sal. 26:12) Dagiti gimong ti kongregasion ikkandatayo kadagiti gundaway a mangipakita iti ayattayo ken ni Jehova ken agdayaw kenkuana.
3 “Itultuloyyo ti Agaluad a Siiinget”: Ti panangipateg iti sagrado a panggep dagiti gimongtayo ti mangtignay kadatayo nga ‘agtultuloy nga agaluad a siiinget’ tapno saan nga in-inut a maipaugalitayo ti lumangan kadagiti gimong gapu kadagiti saan unay a napateg a banag. (Efe. 5:15, 16; Heb. 10:24, 25) No mangaramidkayo iti eskediul ti pamiliayo, mabalinyo nga isurat nga umuna ti eskediul dagiti gimong ti kongregasion. Kitaenyo nga awan dagiti sabali nga aktibidad a manglapped iti pannakigimongyo. Siguraduenyo nga ipangpangruna ti pamiliayo ti itatabuno kadagiti gimong.
4 Saan kadi a maparegtatayo no mabasatayo ti maipapan kadagiti kakabsat nga uray no narigat ti kasasaadda, makatabunoda latta kadagiti gimong ken asamblea? Nupay mabalin a ti kasasaadyo ket saan a kas karigat ti kasasaadda, nalabit adda met dagiti karit a maipasango kadakayo. Ad-adda a pagbalbalinen ni Satanas a narigat para kadagiti adipen ti Dios ti agdayaw ken ni Jehova. Ngem inanamaenyo a mabigbigto dagiti annakyo ti napasnek a panangikagumaan ti pamiliayo a tumabuno kadagiti gimong ti kongregasion. Kinapudnona, no aramidenyo dayta, maipaayanyo ida iti naespirituan a sagut a pulos a didanto malipatan.