Agtultuloykayo a “Mangpataud iti Adu a Bunga”
1 Iti simboliko a sasao, inyarig ni Jesus ti bagina kas ti pudno a puon ti ubas, ni Amana ti Agtaltalon, ket dagiti napulotan iti espiritu a pasurotna dagiti nabunga a sanga ti ubas. Iti panangdeskribirna iti trabaho ti simboliko nga Agtaltalon, impaganetget ni Jesus ti kinapateg ti panagtalinaed iti puon ti ubas. (Juan 15:1-4) Ti leksion ket tunggal maysa nga addaan iti nasinged a personal a relasion ken Jehova nasken nga agbalin a kas iti nabunga a sanga ti “pudno a puon ti ubas,” ni Jesu-Kristo. Nasken nga itultuloytayo ti mangpataud iti adu a bunga agpada iti “bunga ti espiritu” ken bunga ti Pagarian.—Gal. 5:22, 23; Mat. 24:14; 28:19, 20.
2 Bunga ti Espiritu: Marukod ti panagrang-aytayo iti naespirituan babaen ti panangiparangarangtayo iti bunga ti espiritu. Ikagkagumaanyo kadi a parayrayen dagiti bunga ti espiritu ti Dios babaen ti regular a panangadal ken panangutob iti Sao ti Dios? (Fil. 1:9-11) Dikay bumdeng a mangikararag iti nasantuan nga espiritu, a makapataud kadagiti galad a pakaidayawan ni Jehova ken makatulong iti panagtultuloyyo a rumang-ay iti naespirituan.—Luc. 11:13; Juan 13:35.
3 Ti panangparayray kadagiti bunga ti espiritu tulongannatayo met nga agbalin a naregregta a ministro. Kas pagarigan, ti ayat ken pammati tignayennatayo a mangilatang iti tiempo a makiraman a regular iti ministerio nupay okupadotayo. Dagiti galad a kas iti talna, mabayag a panagitured, kinamanangngaasi, kinaalumamay, ken panagteppel tulongannatayo a makilangen a nasayaat kadagiti bumusbusor. Gapu iti rag-o, mariknatayo ti pannakapnek iti ministerio uray no saan nga interesado dagiti tattao.
4 Bunga ti Pagarian: Kayattayo met ti mangpataud kadagiti bunga ti Pagarian. Ramanen dayta ti panangidaton iti ‘sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti nagan ni Jehova.’ (Heb. 13:15) Aramidentayo daytoy babaen ti sireregta ken sipipinget a panangibunannag iti naimbag a damag. Ikagkagumaanyo kadi ti mangpataud iti ad-adu pay a bunga ti Pagarian babaen ti panangparang-ay iti personal a ministerioyo?
5 Impasimudaag ni Jesus a nagduduma ti kaadu ti bunga dagiti matalek a pasurotna. (Mat. 13:23) Gapuna, saan a rumbeng nga idiligtayo ti bagitayo kadagiti sabsabali no di ket itedtayo ti amin a kabaelantayo ken Jehova. (Gal. 6:4) Ti napudno a panangsukimat iti personal a kasasaadtayo babaen ti panangusar iti Sao ti Dios tulongannatayo a mangitultuloy a mangipadayag ken Jehova babaen ti ‘panangpataud iti adu a bunga.’—Juan 15:8.