Agbiagka a Silalagip iti Aldaw ni Jehova
1 “Ti dakkel nga aldaw ni Jehova asidegen. Asidegen dayta, ket mapagdardaras iti kasta unay.” (Sof. 1:14) Ni Sofonias ken ti 11 pay a maaw-awagan kas Segundario a Propeta nagbiagda a silalagip iti aldaw ni Jehova. No usigentayo dagiti naipaltiing a suratda iti Panagadal iti Libro ti Kongregasion kas naibalabala iti libro nga Agbiagka a Silalagip iti Aldaw ni Jehova, makapagsaganatayo iti dayta a nakaam-amak nga aldaw.—Sof. 2:2, 3.
2 Dagiti Naisangsangayan a Pasetna: Saan a naipamaysa ti libro nga Aldaw ni Jehova kadagiti simboliko a kaipapanan wenno iti bersikulo por bersikulo a pannakailawlawag dagiti 12 a naimpadtuan a libro no di ket ilawlawagna no kasano a dagitoy a naipaltiing a sursurat ket agaplikar kadagiti kasasaad a pakaipaspasanguantayo iti inaldaw. Ipaganetgetna a masapul a silalagiptayo a nakaas-asidegen ti aldaw ni Jehova ket dayta koma ti mangapektar iti desision ken tigtignaytayo. Nailawlawag iti daytoy a libro no kasano nga agaplikar iti kaaldawantayo ti insurat dagitoy a propeta mainaig iti biag ti pamilia, relasion kadagiti kapammatian, panangpili iti paglinglingayan, iti ministeriotayo, ken iti panangpilitayo iti karera.
3 Iyam-ammo ti Benneg 1 daytoy a libro no siasino dagiti 12 a propeta ken no ania dagiti insuratda. Ania dagiti kasasaad a nakaipasanguanda a pakaipaspasanguantayo met ita? Naipamaysa ti Benneg 2 kenni Jehova ken kadagiti kualidadna. Ania ti inlawlawag dagitoy a propeta mainaig ken Jehova ken iti personalidadna? Ti Benneg 3 ket maipapan iti konduktatayo ken iti wagas a pannakilangentayo kadagiti sabsabali. Kadagiti ania a praktikal a wagas a mabalintayo nga ay-aywen ti Dios iti inaldaw? Ilawlawag ti Benneg 4 no kasano ti agbiag a siraragsak bayat nga ur-urayentayo ti aldaw ni Jehova.
4 Agplanokayo Itan Tapno Magunggonaankayo: Determinadokayo koma itan a mangaramid kadagiti napateg a banag tapno magunggonaankayo a naan-anay manipud iti panangadal iti libro nga Aldaw ni Jehova, a mangrugi iti lawas ti Agosto 4, 2008! Iplanoyo ti tumabuno a linawas iti Panagadal iti Libro ti Kongregasion. Isaganayo a naimbag ti tunggal leksion, a basaenyo dagiti teksto ken kitaenyo no ania ti pakainaigan dagita iti material. Utobenyo ti impormasion babaen ti panangisaludsodyo iti bagbagiyo: ‘Kasanok nga iyaplikar daytoy nga impormasion iti pagtaengan, iti eskuelaan, iti pagtrabahuan, iti ministerio, ken iti pannakilangenko kadagiti Kristiano a kakabsat?’ Nakasaganakayo koma nga agkomento bayat ti itatabunoyo iti panagadal iti libro tapno makapagpipinnaregtakayo.—Roma 1:12.
5 Sapay koma ta ti panangusigtayo iti libro nga Aldaw ni Jehova isagananatayo itan tapno ‘makaandurtayo iti sidong’ ti “nakaam-amak unay” nga aldaw ni Jehova. Pudno a nakaas-asidegen dayta nga aldaw!—Joel 2:11.