Iti panangituray ti Dios, agkaykaysa ken agkakappia idi ti amin a parsua

Apay a Kasapulantayo ti Pagarian ti Dios?

Idi naparsua da Adan ken Eva, ti Namarsua kadatayo, nga agnagan Jehova, ti kakaisuna nga Agturay. Naayat ti panangiturayna. Inaramidna ti Hardin ti Eden a napintas a pagnaedan ti tao. Inikkanna pay ida iti nagadu a makan ken makapnek a trabaho. (Genesis 1:28, 29; 2:8, 15) Natalna pay laeng koma ti sangatauan no nagtultuloyda a nagpasakup iti naayat a panangituray ti Dios.

Ni Adan a nakaiggem iti maiparit a bunga nga inted ni Eva. — Linaksid dagiti immuna a tao ti Dios kas Agturay

Ibaga ti Biblia nga adda rebelioso nga anghel, a naawagan idi agangay iti Satanas a Diablo, a nangkarit iti kalintegan ti Dios a mangituray. Imparipiripna a naragragsak kano ti tao no saanda nga agpaidalan ken agpaituray iti Dios. Nakalkaldaang ta tinulad ti immuna a nagannaktayo a da Adan ken Eva ti inaramid ni Satanas ket nagrebeldeda iti Dios.—Genesis 3:1-6; Apocalipsis 12:9.

Gapu ta linaksid da Adan ken Eva ti Dios kas Agturay, napukawda ti Paraiso a pagtaenganda ken ti namnamada nga agbiag nga agnanayon nga addaan iti perpekto a salun-at. (Genesis 3:17-19) Naapektaran met dagiti nagbalin nga annakda iti desisionda. Kuna ti Biblia a gapu ta nagbasol ni Adan, “simrek ti basol iti lubong ken ti ipapatay babaen ti basol.” (Roma 5:12) Nagbunga ti basol iti sabali pay a nakalkaldaang a pasamak. Kuna ti Biblia: “Iturturayan ti tao ti padana a tao iti pakadangranna.” (Eclesiastes 8:9) Iti sabali a pannao, no iturayan dagiti tattao ti bagida, sigurado a saan a nasayaat ti resultana.

NANGRUGI TI PANAGTURAY TI TAO

Ni Nimrod a sipapangas a nakatakder. Iti likudna, agibangbangon dagiti tattao iti pasdek. — Nagrebelde ni Nimrod ken ni Jehova

Ni Nimrod ti kaunaan a tao a nagturay a nadakamat iti Biblia. Binusorna ti panangituray ni Jehova. Sipud idi kaaldawan ni Nimrod, inabuson dagiti mannakabalin a tattao ti autoridadda. Agarup 3,000 a tawenen ti napalabas, insurat ni Ari Solomon: “Nakitak ti lua dagiti maidaddadanes, ket awan ti mangliwliwa kadakuada. Nabileg dagiti mangidaddadanes.”—Eclesiastes 4:1.

Kasta met la ita. Idi 2009, imbaga ti maysa a publikasion ti United Nations a ti dakes a panangituray ti “maysa kadagiti kangrunaan a makagapu iti amin a kinadakes a mapaspasamak ita.”

ORASEN TAPNO AGTIGNAY!

Kasapulan ti lubong dagiti nasaysayaat nga agturay ken nasaysayaat a gobierno. Ket dayta ti inkari ti Namarsua kadatayo!

Dagiti ladawan: Dagiti resulta ti turay ti tao. 1. Babai a taga-Asia a nakatugaw iti narugit a kalsada nga ubba-ubbana ti anakna. 2. Masakit a lakay iti ospital. 3. Dagiti soldado iti paggugubatan. 4. Dagiti makapungtot ken agririaw nga agprotprotesta a nakaiggemda kadagiti banner. 5. Babai ken ti balasitangna a nakatakder iti ruar ti balayda bayat a kitkitaenda ti nabuong a sarming ti ridawda. 6. Maysa a naasuk a siudad nga addaan kadagiti kable ti koriente. — Uray ti kasayaatan a gobierno ti tao, saanna a nasolusionan dagiti nakaro a problema ti sangatauan

Nangipasdek ti Dios iti Pagarian, wenno gobierno, a mangsukatto iti amin a turay ti tao, “ket daytanto laeng ti agtalinaed iti agnanayon.” (Daniel 2:44) Daytoy ti Pagarian nga ikarkararag ti minilion. (Mateo 6:9, 10) Ngem saan a ti Dios ti mangituray iti daytoy a gobierno. Imbes ketdi, adda inapointaranna nga Agturay a nagbiag idi kas tao. Asino dayta?