‘Iburayyo ti Kararuayo’ Kadagiti Iyad-adalanyo
1. Ania ti nasken nga aramiden tapno matulongan ti mayad-adalan iti Biblia?
1 Tapno ti maysa a mayad-adalan iti Biblia ket matulongan nga agdedikar, adda nasken a maaramid malaksid iti regular a panangyadal kenkuana iti Biblia. Ni apostol Pablo inyarigna ti relasionna kadagiti iyad-adalanna iti maysa nga agtagtagibi nga ina a mangtartaripato kadagiti annakna. Pakaragsakantayo met a mangipaay iti ‘bukodtayo a kararua’ tapno matulongantayo dagiti iyad-adalantayo nga agmataengan iti naespirituan.—1 Tes. 2:7-9.
2. Apay a nasken a mangipakitatayo iti personal nga interes, ken kasano a maaramid dayta?
2 Mangipakita iti Personal nga Interes: Bayat a ti mayad-adalan iti Biblia iyap-aplikarna dagiti maad-adalna, ti konsiensiana ti mangtignay kenkuana a mangguped iti nasinged a pannakitimpuyogna kadagidiay saan a mangan-annurot kadagiti prinsipio iti Biblia. (1 Ped. 4:4) Mabalin a busoren ti pamiliana. (Mat. 10:34-36) Mabalintay a tulongan a mangep-ep iti ladingitna babaen ti panangipakita iti nabara a personal nga interes. Insingasing ti maysa nga aduan kapadasan a misionero: “Saankayo nga agdardaras a pumanaw kalpasan ti panagadalyo. No mabalin, mangbusboskayo iti gundaway a makisarita kadakuada.” Sisasaganakayo koma a mangitukon iti praktikal a tulong iti iyad-adalanyo. Kas pagarigan, mabalinyo kadi a teleponuan wenno sarungkaran no masakit? Mabalinyo kadi ti makikatugaw iti iyad-adalanyo bayat dagiti gimong ket tulonganyo a mangaywan kadagiti annakda?
3. Kasanotay a matulongan ti iyad-adalantayo nga umawat iti pammaregta iti kongregasion?
3 Tulong Manipud iti Kongregasion: No mangaskasabakayo iti asideg ti pagtaengan ti iyad-adalanyo, apay a dikay sumarungkar biit ket iyam-ammoyo ti kaduayo? No mayanatup, pasaray mangawiskayo iti nagduduma nga agibumbunannag, agraman dagiti panglakayen, a mangkadua kadakayo a mapan iti iyad-adalanyo. Kasta met, di agbayag kalpasan a maipasdekyo ti panagadal iti Biblia iti maysa nga interesado, paregtaenyo a tumabuno kadagiti gimong iti Kingdom Hall. Dayta ti mangted kenkuana iti gundaway a mangtagiragsak iti makapabileg a timpuyog dagiti kameng ti kongregasion a mabalinna nga ibilang kas naespirituan a pamiliana.—Mar. 10:29, 30; Heb. 10:24, 25.
4. Ania ti mabalin a magunggonatayo no naaneptayo?
4 Kasta unay ti ragsak ti nagannak no ti siaanep a panangtulongna kadagiti annakna ket agresulta iti panagdesisionda nga agserbi ken Jehova ken magna iti kinapudno. (3 Juan 4) Kasta met ti mariknatayo bayat nga ipapaaytayo ti kararuatayo a tumulong kadagiti iyad-adalantayo iti Biblia.